हःनालुलु
| हःनालुलु | |
| राज्य | हवाई |
| को-अर्डिनेटत | |
| लागा | |
| ई लागा | {{{time_zone}}} |
| जनसंख्या (2001) - जनघनत्व |
३७१,६५७ - |
होनोलुलु वा हःनालुलु संयुक्त राज्य अमेरिकाया हवाइइ राज्यया राजधानी व दकलय् चकंगु नगर ख। थ्व नगर ओआहु तापूइ ला। थ्व नगरस हलिंया थीथी थासं मनू चाहिलेत वइगु या। नगरया मू लागाय् वाइकिकि, आला मोआना, काकाआको, काइमुकि, कापाहुलु, चाइनाताउन, कहाला, आइना हाइना, वार्द भिलेज, साल्त लेक आदि ला।
होनोलुलु खँग्वःया हवाई भासय् अर्थ "आश्रय बन्दरगाह" वा "शान्त बन्दरगाह" ख। थुकिया पुलांगु नां "कौ" ख। कौया क्षेत्र वर्तमान नुआनु एभिन्यु निसें अलाकेआ स्ट्रिट व होटल स्ट्रिट निसें क्वीन स्ट्रिट तक्कया थासय् दयाच्वन। कौ दयाच्वंगु थाय् वर्तमान डाउनटाउन जिल्लाया केन्द्र ख। बन्दरगाहया रुपय् थ्व नगर भिंगु थासय् दूगु कारणं हवाई द्वीपपुचः व व्यापक प्रशान्त क्षेत्रय् थ्व नगरया ऐतिहासिक वृद्धि व महत्त्व दु। होनोलुलु सन् १८४५ निसें हवाई टापुया राजधानी जुयाच्वंगु दु, दकलय् न्हापां स्वतन्त्र हवाई राज्यया, व सन् १८९८ निसें अमेरिकी भूभाग व हवाई राज्यया राजधानी। थ्व नगरय् सन् १९४१या डिसेम्बर ७ खुनु जापान साम्राज्यं लिक्कया पर्ल हार्बरय् आक्रमण यायेधुंका हलिमय् नांजाल। थ्व घटनां संयुक्त राज्य अमेरिकायात निक्वःगु विश्वयुद्धय् प्रवेश याकल। थ्व बन्दरगाह छगू मू अमेरिकी नौसेना आधार केन्द्र जुयाच्वंगु दु। थ्व नगरय् संयुक्त राज्य अमेरिकाया प्रशान्त ख्यःया लःखःतेगु केन्द्र दु। थ्व हलिंया दकलय् तःधंगु नौसेना कमाण्डया होस्टिंग खः।
जनसंख्या
[सम्पादन]सन् २०००या जनगणना कथं थ्व थाय्या जनसंख्या ३७१६५७ दु धा:सा थ्व थासय् १५८६६३ खा छें दु[१]।
भूगोल
[सम्पादन]थ्व शहरया अक्षांश २१.३०८९५ उत्तर व देशान्तर १५७.८२६१८२ पश्चिम खः ()। थ्व थासय् २२१९६८३९२ वर्ग मिटर (८५.७०२४७९ वर्ग माइल) बँ दु धा:सा ५०११९६६९ वर्ग मिटर (१९.३५१३१३ वर्ग माइल) ल दु[१]।
नगरया त्वाःतेगु धलः
[सम्पादन]- डाउनटाउन होनोलुलु: हवाईया वित्तीय, व्यावसायिक व सरकारी केन्द्र ख। प्रशान्त महासागरया लःया सिथय् अलोहा टावर दु। थ्व टावर यक्व दँ तक हवाईया दकलय् तजाःगु भवन जुयाच्वन। वर्तमानया दकलय् तजाःगु भवन ४३८-फिट (१३४ मिटर) फर्स्ट हवाईयन सेन्टर ख। थ्व टावर किङ्ग व बिशप स्ट्रिटय् दु। हवाई प्यासिफिक विश्वविद्यालयया डाउनटाउन क्याम्पस नं थन हे दु ।
- द आर्ट डिस्ट्रिक्ट होनोलुलु: थ्व त्वाः डाउनटाउन व चाइनाटाउनया पूर्वी सिथय् ला। थ्व १२-ब्लकया क्षेत्र ख गुकियात बेथेल एण्ड स्मिथ स्ट्रिट व निमित्ज राजमार्ग व बेरेटानिया स्ट्रिटं घेरेयाना तःगु दु-थ्व थासय् यक्व कला व सांस्कृतिक संस्थात दु। थ्व त्वाः चाइनाटाउन ऐतिहासिक जिल्ला दुने ला, गुकिलि न्हापाया होटल स्ट्रिट भाइस जिल्ला नं ला।
- क्यापिटल डिस्ट्रिक्ट: थ्व थाय् डाउनटाउन होनोलुलुया पूर्वी भागय् ला। थ्व थाय् हवाई राज्य सरकारया वर्तमान व ऐतिहासिक केन्द्र ख। थन हवाइ राज्यया क्यापिटल भवन, इओलानि लाय्कू, होनोलुलु हाले (सिटी हल), राज्य पुस्तकालय, व जुजु कामेहामेहा १ या शालिक, नापं यक्व सरकारी भवन दु।
- काकाआको डाउनटाउन व वाइकिकी दथुइ च्वंगु छगू हल्का-औद्योगिक जिल्ला ख। थन वंगु दशकय् तःधंगु पुनःनिर्माणया कुतः जूगु दु। थ्व थासय् निगु मू पसःया थाय् दु, वार्द वेरहाउस व वार्द सेन्तर। हावर्ड ह्युज कर्पोरेशनं वइगु दशकय् वार्द सेन्तरयात वार्द भिलेजय् हिलेगु योजना दयेकूगु दु। जोन ए बर्न्स स्कूल अफ मेडिसिन व हवाई विश्वविद्यालयया मानोआया छुं भाग नं थन हे दु। एहिमे मारु घटनाय् सीपिनिगु स्मारक काकाआको वाटरफ्रन्ट पार्कय् दु।
- आला मोआना काकाआको व वाइकीकी दथुया छगू जिल्ला ख। थन दूगु आला मोआना सेन्टर "हलिमया दकलय् तःधंगु खुला सपिङ सेन्टर" ख व हवाईया दकलय् तःधंगु सपिङ मल ख। आला मोआना सेन्टरय् ३०० स्वया अप्व रेन्तल स्पेस दु व थ्व थाय् पर्यटकतेगु दथुइ तसकं लोकंह्वा। आला मोआनाय् नं होनोलुलु डिजाइन सेन्टर व आला मोआना बीच पार्क दु। थ्व निगु पार्क होनोलुलुया निगूगु दकलय् तःधंगु पार्क खः।
- वाइकिकी होनोलुलुया पर्यटकीय जिल्ला ख। थ्व त्वाः आला वाइ नहर व प्रशान्त महासागरया दथुइ डायमण्ड हेडया लिक्क ला। यक्व होटल, पसः, व नाइटलाइफया अवसर कालाकाउआ व कुहिओ एभिन्युया नापं दु। थ्व थाय् आगन्तुक व स्थानीय मनूतय् निंतिं छगू हे लोकंह्वाःगु थाय् खः। थन दँय् दँसं द्वलंद्व पर्यटक/पाहां वइ। ओआहुया अप्वः धया थें होटल वाइकिकिइ दु ।
- मानोआ, मोइलिइलि, व माकिकी डाउनटाउन व वाइकिकीया लिक्कया क्षेत्रय् च्वंगु आवासीय त्वाः ख। मानोआ भ्याली हवाई विश्वविद्यालयया मू क्याम्पसया थाय् खः ।
नुआनु व पाउओआ होनोलुलु शहरया अन्तर्देशीय उच्च-मध्यम वर्गीय आवासीय जिल्ला ख। प्रशान्तया राष्ट्रिय स्मारक केन्द्र पञ्चबल क्रेटरय् दु।
- पालोलो व काइमुकी डायमण्ड हेडं मानोआ व माकिकीया पूर्वय् लाःगु त्वाः ख। पालोलो भ्याली मानोआया समानान्तर दु अले थ्व छगू आवासीय क्षेत्र खः। काइमुकी मू कथं डायमण्ड हेडया ल्यूने वाइआले एभिन्यु केन्द्रित व्यावसायिक केन्द्र दूगु छगू आवासीय त्वाः ख। शामिनेद विश्वविद्यालय काइमुकीइ दु।
- वाइआलाए व काहाला डायमण्ड हेडया प्रत्यक्ष पूर्वय् होनोलुलुया उच्च वर्गीय जिल्ला ख, गन यक्व मूया छेँ दु। थ्व त्वालय् वाइलाए कन्ट्री क्लब व फाइभ स्टार कहाला होटल एण्ड रिसोर्ट नं दु ।
- पूर्वी होनोलुलुइ आइना हाइना, निउ स्वनिगः, व हवाई काइया आवासीय समुदाय दु। थुकियात उच्च-मध्यम वर्गीय त्वाःया रुपय् कायेगु या। वाईआले ʻइकी व हवाई लोआ रिजया अपस्केल गेटेड समुदाय नं थन दु।
- कालिही व पालामा यक्व सरकारी आवास विकास दुगु मध्यम वर्गया त्वाः ख। लोवर कालिही, समुद्रपाखेया औद्योगिक जिल्ला खः।
- साल्ट लेक व आलिआमानु (अधिकांश) होनोलुलु जिल्लाया पश्चिमी भागया आवासीय क्षेत्र खः। थ्व थाय् होनोलुलु अन्तर्राष्ट्रिय विमानस्थलं तापाक्क मदु।
- मोआनालुआ होनोलुलुया पश्चिमी भागय् दूगु निगु त्वाः व छगू स्वनिगः ख। थन ट्रिपलर आर्मी मेडिकल सेन्टर दु।
- कामेहामेहा हाइट्स छगू उत्तरी उपनगर ख।
- म्याककुली छगू पूर्वी उपनगर ख।
लिधंसा
[सम्पादन]- ↑ १.० १.१ अमेरिकी जनगणना २००१. जुन २९, ई सं २००७ कथं।
