Jump to content

इन्दियानापोलिस

विकिपिडिया नं

इन्दियानापोलिस अमेरिकाया इन्डियाना राज्यया राजधानी ख। साधारन भासय् थ्व नगरयात इन्दि धका म्हसीकिगु या। थ्व नगर इन्दियाना राज्यया राजधानी व दकलय् चकंगु नगर ख। थ्व नगर मेरियन काउन्तिया मूकुथि नं ख। सय् २०२०स मंका राज्य अमेरिकाया तथ्याङ्क कथं थ्व नगर व मेरियन काउन्तिया जनसंख्या ९,७७,२०३ दयाच्वन। थ्व नगर नापं मेरियन काउन्ति दुने दूगु अर्ध-स्वायत्त नगर पालिकातेगु जनसंख्या ८,८७,६४२ दयाच्वन। थ्व संरा अमेरिकाया १५गू दकलय् अप्व जनसंख्या दूगु नगर ख। शिकागो व कोलम्बस ओहायो धुंका संरा अमेरिकाया मिडवेस्टय् थ्व ३गूगु दकलय् आपा जनसंख्या दूगु नगर ख। नापं, फिनिक्स, एरिजोना; अस्तिन, तेक्सास; व कोलम्बस, अहायो धुंका थ्व नगर संरा अमेरिकाया ४गूगु दकलय् आपा जनसंख्या दूगु राज्यया राजधानी ख। इन्दियानापोलिस महानगरीय क्षेत्र २१,११,०४० म्ह मनू नापं अमेरिकाया ३३गू दकलय् आपा जनसंख्या दूगु महानगरीय क्षेत्र ख। थ्व नगर ३६८ वर्ग माइल (९५० वर्ग किमी) क्षेत्रय् दयाच्वंगु दु। क्षेत्रफल कथं थ्व नगर संरा अमेरिकाया १८गू दकलय् तःधं नगर ख।

थ्व नगर दूगु थासय् आदिवासी अमेरिकनतेगु बसोबास १०,००० ईसा पूर्व निसें जूगु दसु दु। सन् १८१८स आदिवासी जाति लेनपतेसं थःगु थाय् सेन्त मेरीया सन्धिया अन्तर्गत त्वतल। सय् १८२१स इन्दियानापोलिसया पलिस्था इन्दियाना राज्य सरकारया न्हूगु मूकुथिया कथं जुल। व्हाइट खुसिया सिथय् १ वर्ग माइल (२.६ वर्ग किमी)या ग्रिडस भाजु अलेक्जेन्दर राल्स्तन व भाजु एलियास पाइम फोर्डह्यामजुं नगरया नक्सा दयेकादील। राष्ट्रीय व मिशिगन राज्यया राजमार्ग व रेल लं न्ह्यथने धुंका थ्व नगर दयेकेज्या (निर्माण) व ल्ह्येज्या (परिवहन)या केन्द्रया कथं चकना वन। ल्ह्येज्याया कुथिया कथं थ्व नगरयात निता नामं म्हसीकिगु या: "अमेरिकाया क्रसरोद" व "रेललं नगर"। सन् १९७०स नगर-काउन्ति एकिकरण(गुकियात यूनिगोभ धका नं म्हसीकिगु या) धुंका स्थानीय सरकार प्रशासनया भाला नगरप्रमुखया अध्यक्षताय् दूगु २५म्ह-सदस्यीय नगर-काउन्ति परिषदं याइ।

स्वयादिसँ[सम्पादन]