भर्मोन्त
भर्मोन्त संयुक्त राज्य अमेरिकाया छगु राज्य ख। थ्व राज्य संयुक्त राज्य अमेरिकाया न्यु इङ्ग्ल्यान्द लागाया पूर्वोत्तर राज्यय् छगू राज्य ख। भर्मोन्तया दक्षिणय् म्यासेच्युसेत्स, पूर्वय् न्यु ह्याम्प्शायर, पश्चिमय् न्यु यर्क राज्य व उत्तरय् क्यानादाया क्वेबेक प्रान्त ला। सन् १७९१स संरा अमेरिकाया संघय् १४गू राज्यया कथं थ्व राज्य स्वीकृत जूगु ख। न्यु इङ्ग्ल्यान्दया राज्यय् एत्लान्तिक महासागरनाप सीमा मदूगु थ्व हे छगू जक राज्य ख। सन् २०२०स अमेरिकन जनगणना कथं थ्व राज्यया जनसंख्या ६,४३,५०३ दु। वायोमिङ्ग धुंका अमेरिकाया दकलय् म्हो जनसंख्या दूगु राज्य थ्व हे ख। क्षेत्रफलया दृष्टिं थ्व राज्य अमेरिकाया ६गु दकलय् चिधंगु राज्य ख। राज्यया राजधानी मोन्तपेलियर अमेरिकाया दकलय् म्हो जनसंख्या दूगु राज्यया राजधानी ख। नापं, थ्व नगर स्वया अप्व जनसंख्या दूगु नगर बर्लिङ्गतन थ्व राज्यया दकलय् तःधंगु नगर ख।
थ्यं-मथ्यं १२द्व दँनिसें आदिवासी अमेरिकनत थ्व थासय् बसोबास याना वयाच्वंगु दसु दु। युरोपियनत थन थ्यंबिले थ्व लागाय् अल्गोंक्वियन भाय् ल्हाइपिं अबेनाकी व इरोक्वियन भाय् ल्हाइपिं मोहाकतेगु प्रतिस्पर्धी जनजातित थ्व थासय् दयाच्वन। १७गू शताब्दीइ फ्रेञ्च उपनिवेशवादीतेसं थ्व थाय्यात फ्रान्सया साम्राज्यया अधीनय् न्यू फ्रान्सया उपनिवेश जूगु घोषणा यात। ग्रेट ब्रिटेनया साम्राज्यं एत्लान्तिक तटया नापं दूगु दक्षिणी भूमिइ थःगु उपनिवेश दयेकेधुंका थ्व राज्य दूगु थासय् थ्व निगु साम्राज्यतेगु उत्तर अमेरिकाया धेधेबल्ला न्ह्यथन। सन् १७६३स ७ दँया हतालय् बुइधुंका फ्रान्सं मिसिसिपि खुसिस्वया पूर्वय् थःगु अधीनय् लाकातःगु क्षेत्र ग्रेट ब्रिटेनयात लःल्हात। थ्व धुंका थ्व क्षेत्र पूर्ण रुपय् ग्रेट ब्रिटेनया अधीनय् लात।
अनंलि, थ्व राज्य नापंया ब्रिटिश १३गू उपनिवेशय् विशेष रूपं न्यू ह्याप्शायर व न्यूयर्कं कनेक्तिकत खुसिया पश्चिमय् दयाच्वंगु न्यु ह्याम्प्शायर ग्रान्तया अधीनय् लाःगु, वर्तमानय् थ्व राज्यया क्षेत्रया सीमाय् विवाद शुरु यात। न्यू यर्कया प्रान्तीय सरकारं थ्व इस क्षेत्रय् च्वनिपिन्त भूमि अनुदान मीगु ज्यायात। थ्व ज्या न्यू ह्याम्प्शायरया सरकारया न्हापाया भूमि अनुदान विपरित जुल। न्यू यर्कं ब्यूगु बुंया भ्वँ ज्यना च्वं वइपिं मनूतेगु विरुद्धय् व न्यू ह्याम्प्शायरं इनातःगु बुंयाभ्वं दूपिंनिगु हितया रक्षाया निंतिं छगू अर्धसैनिक टुकडी गठन जुल, थ्व मिलिशियाया नां ग्रीन माउन्टेन बोइज मिलिशिया ख। अंततः, न्यू ह्याम्प्शायरया बुँभ्वं दुपिं मनुतेगु छपुचलं अमेरिकी क्रान्तिकारी हताःया हुनी छगू स्वतन्त्र राज्यया कथं सन् १७७७स भर्मोन्त गणराज्यया पलिस्था यात। थ्व गणराज्यं अमेरिकाया सकल राज्यय् दकलय् न्ह्यः दासप्रथा अन्त यात।
१९गू शदीया इलय् भर्मोन्त दासप्रथा उन्मूलनवादी अभियानया छगू बलाःगु गढ जुयाच्वन। थ्व राज्यय् कापःया मिलतेगु तसकं विकास जूगुलिं थ्व राज्यया अर्थतन्त्र दक्षिणी कपाय्नाप स्वानाच्वन। अथेजुसां अमेरिकी गृहयुद्धय् थ्व राज्यं उत्तरी सेनाय् महत्वपूर्ण रुपं ब्वति काल।
थ्व राज्यया भूगोल ग्रीन माउन्तेनं चिह्नित यानातःगु दु। थ्व पर्वःझ्वः राज्यया मध्य भागं उत्तर-दक्षिणया दिशाय् विस्तारित दु। थ्व पर्वःझ्वलं राज्यया पूर्वी भागय् अवस्थित कनेक्तिकत खुसि स्वनिगःयात पश्चिमय् दूगु श्याम्प्लेन व मेमेगु स्वनिगःस्वया बायातःगु दु। राज्यया अधिकांश भूभाग तःसिमा व कोनिफर सिमां भुनातःगु दु धाःसा अधिकांश चकं भूमि बुंज्याया निंतिं छ्येलीगु या। जलवायु कथं थ्व राज्यय वर्खाय् ताःन्वइगु व आर्द्र जुइगु या धाःसा चिकुलाय् ख्वांउसेच्वनिगु व च्वापु गाइगु या।
लिधंसा
[सम्पादन]