न्यु यर्क राज्य

न्यु यर्क राज्य वा न्यूयोर्क संयुक्त राज्य अमेरिकाया छगु राज्य खः। थ्व राज्य उत्तरपूर्वी संयुक्त राज्य अमेरिकाय् दु। मध्य-एटलान्टिक राज्यय् छगू थ्व राज्य एटलान्टिक महासागर, न्यु इङ्गल्यान्द। क्यानाडा, व ग्रेट लेक्सया सीमाय् ला। लगभग १ कोटी ९६ लख बासिन्दा दूगु थ्व राज्य संयुक्त राज्य अमेरिकाया प्यंगूगु दकलय् अप्व जनसंख्या दूगु राज्य व सन् २०२३ तक्क दकलय् अप्व घनत्व दूगु ८गु राज्य ख। न्यूयोर्क क्षेत्रफल कथं २७गु दकलय् तःधंगु संयुक्त राज्य अमेरिकाया राज्य ख, गुकिया सकल क्षेत्रफल ५४,५५६ वर्ग माइल (१४१,३०० वर्ग किमि) दु।

न्यूयोर्कया भूगोलय् विविधता दु। थ्व राज्यया दक्षिणपूर्वी भाग, दाउनस्तेतया नामं म्हसीकिगु या। थन संयुक्त राज्य अमेरिकाया दकलय् तःधंगु नगर न्यूयोर्क नगर दु। नापं थन लङ आइल्यान्द क्षेत्र दु: थ्व देय्या दकलय् अप्व जनसंख्या दूगु टापु ख। थ्व नापं दाउनस्तेतय् उपनगर (सबर्ब) व तःमि एन्क्लेभया लोवर हडसन स्वनिगः दु। दाउनस्तेत न्यूयोर्क महानगरीय क्षेत्रया केन्द्र ख व वृहद नगरीय क्षेत्र ख। थ्व थासय् राज्यया स्व ब्याय् निब्या मनू दु। क्षेत्रकथं यक्व तःधंगु अपस्टेट क्षेत्र ग्रेट लेक्सं लेक च्याम्पलेन तक्क न्यनाच्वंगु दु व थुकिलि एडिरोन्ड्याक पर्वत व क्याटस्किल पर्वत (एपलेशियन पर्वतया भाग) ला। पूर्व-पश्चिम दिशाय् दूगु मोहाक खुसिया स्वनिगं अपस्टेटया अप्व हिमाली क्षेत्रयात निगू ब्वय् ब्वथला उत्तर-दक्षिण हडसन खुसिया स्वनिगलय् राज्यया राजधानी अल्बानीया लिक्कसं वनि। बफेलो व रोचेस्टर नगर पश्चिमी न्यूयोर्क ग्रेट लेक्स क्षेत्रया छगू भाग ख व ओन्टारियो पुखु व इरी पुखुया सीमाय् ला। मध्य न्यूयोर्कय् सिराक्यूज नगर दु। राज्यया मध्य व पश्चिमी भागया दथुइ, न्यूयोर्कय् फिंगर लेक्स दु, थ्व छगू ​​लोकंह्वाःगु पर्यटकीय गन्तव्य ख। दक्षिणय्, पेन्सिलभेनिया नापं राज्यया सीमाय् , दक्षिणी टियर एलेघेनी पठारया च्वका दु, गुकिलि एपलेशियनया दकलय् उत्तरी भाग ला।

न्यूयोर्क मूल १३गू उपनिवेशय् छगू ख गुकिलिं संयुक्त राज्य अमेरिका दयेकल। थौंकन्हय्या न्यूयोर्कया क्षेत्रय् दकलय् न्हापाया युरोपियनत थ्यंगु ई तक्क द्वलंद्वः दँ न्ह्यःनिसें अल्गोन्कियन व इरोक्वाइस कन्फेडेरेसीया मूल अमेरिकीया जनजातित च्वनाच्वंगु ख। सन् १६०९इ हेनरी हडसनया अभियानं उत्पन्न डचतयेसं सन् १६२१इ न्यू नेदरल्याण्डया बहुजातीय उपनिवेश पलिस्था यात। इंग्ल्याण्डं सन् १६६४इ डचतेगु ल्हातं थ्व उपनिवेश कब्जा यात व थुकिया नां न्यूयोर्क प्रान्त तल। अमेरिकी क्रान्तिकारी युद्धया इलय् उपनिवेशवादीतेगु छगू पुचः अन्ततः स्वतन्त्रता स्थापित यायेत सफल जुल, व राज्यं सन् १७८८इ तत्कालीन न्हुगु संयुक्त राज्य अमेरिकाया संविधानयात अनुमोदन यात। १९गु शताब्दीया सुरुइ निसें न्यूयोर्कया थःगु भित्री भागया विकास, १९गु शताब्दीया निर्माणं शुरु जुल। थ्व ईलय् इरि नहर दयेकल गुकिलिं संयुक्त राज्य अमेरिकाया मेमेगु क्षेत्र स्वया थ्व क्षेत्रयात अतुलनीय फाइदा बिल। थ्व राज्यं वइगु शताब्दीइ थःगु राजनीतिक, सांस्कृतिक व आर्थिक आधिपत्य दयेकल, गुकिलिं थ्व राज्ययात " एम्पायर स्तेत"या उपनाम दत। २०गु शताब्दीया उत्तरार्धय् औद्योगिकीकरणं राज्यया अर्थतन्त्रया छगू भागय् ह्रास वःसां २१गु शताब्दीइ न्यूयोर्कयात सृजनात्मकता व उद्यमशीलता, सामाजिक सहिष्णुता, व वातावरणीय स्थायित्वया छगू वैश्विक नोडया रुपय् कायेगु यानाच्वंगु दु।

थ्व राज्यं हलिंया दक्वं थासं पाहांपिन्त आकर्षित याइ, सन् २०२२इ अमेरिकाया छुं नं राज्य स्वया दकलय् अप्व पिनेया मनू दु। थ्व राज्यया यक्व थाय् नांजा, गुकिलि सन् २०१३य् हलिंया दकलय् अप्व पर्यटक जुइगु झिगु पर्यटक आकर्षणया थासय् प्यंगु थाय् थन ला: टाइम्स स्क्वायर, सेन्ट्रल पार्क , नायाग्रा फल्स, व ग्रान्ड सेन्ट्रल टर्मिनल। न्यूयोर्कय् करिब २०० कलेज व विश्वविद्यालय दु , गुकिलि आइभी लीगया दुजः कोलम्बिया विश्वविद्यालय व कर्नेल विश्वविद्यालय ला, व विस्तारित स्टेट युनिभर्सिटी अफ न्यूयोर्क नं ला, गुकिलि राष्ट्रया दकलय् तःधंगु विश्वविद्यालय प्रणाली दु। न्यूयोर्क नगरय् संयुक्त राष्ट्र संघया मुख्यालय दु, व थ्व नगरयात गबलें गबलें हलिंया दकलय् महत्त्वपूर्ण सांस्कृतिक, वित्तीय, व संचार माध्यम केन्द्रविन्दु, व हलिंया राजधानी नगरया रुपय् वर्णन यानातःगु दु।

स्वया दिसँ

स्वापू दुगु च्वसु

• संयुक्त राज्य अमेरिका

पिनेया स्वापूत

• अमेरिकी सरकारया वेबथाय्