इसिडोर आइज्याक रबि (जुलाई २९, १८९८ – जनवरी ११, १९८८) छम्ह अमेरिकी भौतिक विज्ञानी ख गुम्हेस्यां सन् १९४४ य् भौतिक शास्त्रय् नोबेल सिरपाः त्याकादिल। वय्कलं आणविक चुम्बकीय अनुनाद (nuclear magnetic resonance) सीकादिल गुकियात म्याग्नेतिक रेजनेन्स इमेजिङ्ग (एमआरआई) य् छ्यलिगु या। वय्कः अमेरिकाय् माइक्रोवेभ राडार व माइक्रोवेभ ओभनय् छ्यलीगु क्याभिटी म्याग्नेट्रोनया ज्या याइपिं न्हापांपिं वैज्ञानिकत मध्ये छम्ह नं खः।
राइमानो , ग्यालिसियाय् छगू परम्परागत पोलिश-यहूदी परिवारय् जन्म जूम्ह रबि मचाबिले अमेरिकाय् वल व न्यूयोर्कया लोअर ईस्ट साइडय् पालन जुल। सन् १९१६य् वय्कः इलेक्ट्रिकल इन्जिनियरिङया विद्यार्थीया रुपय् कर्नेल विश्वविद्यालयय् प्रवेश यानादिल, तर याकनं हे थःगु विषय रसायन शास्त्रय् हिलादिल। लिपा, वय्कःयात भौतिक शास्त्रय् रुचि दत। वय्कलं कोलम्बिया विश्वविद्यालयय् थःगु अध्ययनयात निरन्तरता बियादिल, गन वय्कःयात छुं क्रिस्टलया चुम्बकीय संवेदनशीलताया थेसिसया निंतिं वय्कःया डाक्टरेट उपाधि लःल्हात। सन् १९२७इ वय्कः युरोपय् झाल, गन वय्कलं उगु ईया यक्व बांलाःपिं भौतिक विज्ञानीत नापलाना ज्या यानादिल।
सन् १९२९य् रबी अमेरिका लिहां झाल, गन कोलम्बियां वय्कःयात प्राध्यापकया पदया प्रस्ताव बिल। ग्रेगरी ब्रेइटया सहकार्यय् वय्कलं ब्रेइट–रबि समीकरण दयेकादिल व स्टर्न–गेर्लाच प्रयोगयात परमाणु न्यूक्लियसया गुण पुष्टि यायेत परिमार्जन यायेफइगु अनुमान यानादिल। वय्कःया परमाणुया म्याग्नेतिक मोमेन्त (magnetic moment) व परमाणु स्पिन (nuclear spin)यात थुइकेत आणविक चुम्बकीय अनुनाद (nuclear magnetic resonance) छ्येलेगु प्रविधिं वय्कःयात सन् १९४४इ भौतिक शास्त्रय् नोबेल सिरपाः त्याकल। आणविक चुम्बकीय अनुनाद आणविक भौतिक विज्ञान व रसायन शास्त्रया निंतिं छगू महत्त्वपूर्ण उपकरण जुल, व लिपा थुकिलि म्याग्नेतिक रेजनेन्स इमेजिङया विकास जुल। चिकित्सा ख्यलय् नं थुकियात महत्वपूर्ण भूमिका दु ।
निगूगु विश्वयुद्धया इलय् वय्कलं म्यासाचुसेट्स इन्स्टिच्युट अफ टेक्नोलोजी (एमआईटी) रेडिएशन प्रयोगशाला (रेडल्याब) व म्यानह्याटन प्रोजेक्टय् रडारय् ज्या यानादिल । युद्ध धुंका, वय्कलं परमाणु ऊर्जा आयोगया सामान्य सल्लाहकार समिति (GAC)य् ज्या यानादिल। सन् १९५२ निसें १९५६ तक्क अनया अध्यक्ष जुयादिल। लिपा वय्कः राष्ट्रपति ड्वाइट डी आइजनहावरया विज्ञान सल्लाहकार जुयादिल । वय्कः सन् १९४६य् ब्रुकहेभन राष्ट्रिय प्रयोगशालाया पलिस्था नापं संलग्न जुयादिल , व लिपा, युनेस्कोय् संयुक्त राज्य अमेरिकाया प्रतिनिधि जुयादिल व सन् १९५२य् सर्नया निर्माण नापं संलग्न जुयादिल। सन् १९८५य् वय्कःया नामं विशेष पद नां तःगु खःसा सन् १९६७य् वय्कलं शिक्षण पदं अवकाश कयादील। अथे जुसां वय्कः विभागय् सक्रिय जुयादील व वय्कः मदुतले विश्वविद्यालयया प्राध्यापक एमेरिटस व विशेष प्राध्यापकया उपाधि धारण यानादिल।
