पाहांचःह्रे
पाहां चह्रे वा पासा चह्रे नेपालमन्दःया छगू तःधंगु नखः ख। थ्व नखलय् थीथी थासय् जात्रा, दबूप्याखं, लुकुमांद्यःया पुजा, सल ब्वाकिगु आदि यासें हनिगु या। थ्व नखः चिल्लागा चःह्रे नापं स्वन्हु तक्क हनिगु जुइ। थ्व नखलय् थःगु छेँय् पाहांतेत सःतिगु व भ्वय् नकिगु चलन दु। थ्व स्वन्हु तक्क हनिगु नखः ख। थ्व नखःया न्हापांगु दिं खुनु लुकुमहाद्यः पुज्याइगु या। थ्व दिंयात नायः दिवसया रुपय् नं हनिगु या। थ्व हे दिं खुनु बहनिया न्यतय् श्वेतकाली (न्यतमरु अजिमा)या प्याखं शुरु जुइ। थ्व धुंका निन्हु खुनु लुमरी(लुमढी) अजिमा (भद्रकाली), कङ्गः अजिमा (चामुन्दा,चन्देश्वरी, कंकेश्वरी), म्हयपि अजिमा (ज्ञानेश्वरी), मय्ति अजिमा(पञ्चकुमारी, मैतिदेवी), बसला अजिमा (बसलादेवी), तकति(तखति)अजिमा (नीलबाराही) व ङ्यतमरुअजिमा (श्वेतकाली, नरदेवी)या जात्रा जुइ। थ्व जात्राय् येँया तिंख्यलय् खः ल्वाकिगु जुइ। थ्व दिं खुनु न्हिछिं न्यतमरु अजिमाया प्याखं जुयाच्वनि। थ्व जात्राया स्वन्हु खुनु असनय् लुमढी अजिमा, कंगः अजिमा व तेबहाः अजिमाया खः ल्वाकाः, चतांमरी छायाः जात्रा जुइ। पाहांचःह्रेय् थीथी थासय् यःसिं थनिगु नं तजिलजि दु।
तजिलजि
[सम्पादन]पाहांचःह्रेय् नेपालमन्दलय् जुइगु थीथी ज्याझ्वः थ्व कथं दु-
- पाहांचःह्रे (पिशास चतुर्दशी) अनुसार लुकुमहाद्यःयात पुज्याइगु।
- नायः दिवस
- तिंख्यलय् द्यः ल्वाकेगु, नापं थ्व हे खुनु तिंख्यलय् सल ब्वाकीगु व नेपाः सेनाया राष्ट्राध्यक्षयात प्रदर्शन यायेगु
- न्यत अजिमाया प्याखं क्यनिगु। थ्व प्याखनय् गनेद्यः, ब्रम्हायणी, इन्द्रायणी, नारायणी, रुद्रायणी, महालक्ष्मी, बाराही, भैरवी, कुमारी, अजिमा, सिंहिनी, ब्याघ्रिनी आदिया प्याखं क्यनिगु या।
- यलया बालकुमारीइ सल ब्वाकीगु
- लुमरी(लुमढी) अजिमा (भद्रकाली), कङ्गः अजिमा (चामुन्दा,चन्देश्वरी, कंकेश्वरी), म्हयपि अजिमा (ज्ञानेश्वरी), मय्ति अजिमा(पञ्चकुमारी, मैतिदेवी), बसला अजिमा (बसलादेवी), तकति(तखति)अजिमा (नीलबाराही) व ङ्यतमरुअजिमा (श्वेतकाली, नरदेवी)या जात्रा। थ्व खः जात्रा जुजु अमर मल्लया ईलय् नेपाल सम्बत ५८० (सन् १४६०)स शुरु जूगु[१]
- असनय् लुमढी अजिमा, कंगः अजिमा व तेबहाः अजिमाया खः ल्वाकीगु, चतांमरी छायेगु
- पाहांचह्रेया बाजं थानाः खः नापं येँया थीथी थासय् जात्रा यायेगु
- चोभाःद्यः न्ह्यवं
स्वयादिसँ
[सम्पादन]लिधंसा
[सम्पादन]- ↑ बज्राचार्य, चुन्दा (२०००). नेवाः तजिलजिइ नखःचखः (in नेपालभाषा). येँ: नेपालभाषा अकादमि, 190-196.