मोगलिपुत्त तिस्स
मोगलिपुत्त तिस्स (३२७ इपू - २४७ इपू) छम्ह बौद्ध भिक्षु ख। वय्कःया जन्म मगधया पाटलिपुत्रय् (वर्तमान पटना) जूगु ख। वय्कः मध्यममार्गया प्रवर्तक व बुद्धधर्मया वास्तविक विचारधाराया प्रवर्तक ख। वय्कःया नेतृत्त्वय् तृतीय संगायना सम्पन्न जुगू ख। वय्कलं सम्राट अशोक व अशोकया काय् महिन्दयात बुद्ध धर्म देशना यानादीगु ख। वय्कःया बारेय् श्रीलङ्काया राजवंशावली महावंशय् दूगु बाखँ कथं वय्कः द्वितीय संगायनय् दूम्ह अर्हततेगु वन्दनां पूनर्जन्म कया वःगु धकाः च्वयातःगु दु।
वय्कः मोगलिया काय् जूगुलिं पालिभासय् वय्कःयात मोगलिपुत्त वा मोगलिया काय् धकाः म्हसीकिगु या। वय्कःया नां तिस्स ख। वय्कलं सिग्गव भिक्षुनाप विनय व चण्डवच्चि भिक्षुनाप अभिधम्म सयेकादीगु ख। लिपा वय्कः पाटलिपुत्रया संघया मू-भिक्षु जुयादिल। वय्कलं अशोकाराम धाःगु थासय् सम्राट अशोकयात काय् व म्ह्याय्यात बुद्ध शिक्षा बीइमाःगु खँ कनादीगु ख। जुजु अशोकं थःगु काय् व म्ह्याय्, महिन्द व संघमित्रायात मोगलिपुत्त तिस्सया अन्तर्गतय् छ्वयादिल। मोगलिपुत्तं महिन्दायात श्रीलङ्का वनेन्ह्यःतक्क बुद्ध धर्म देशना यानादिल। तृतीय संगायनय् नेतृत्त्व यानादीधुंका वय्कलं अभिधम्मपिटकया अन्तर्गतय् कथावत्थु सम्मिलित यानादिल। वय्कलं मौर्य साम्राज्य स्वया पिने बुद्ध धर्म प्रचार यायेगु ज्या यानादिल। थ्व हे झ्वलय् वय्कलं श्रीलङ्काय् बोधिवृक्ष छ्वयादिल। वय्कः ८०दँय् अशोकया शासनया २६गू दँय् मदयादिल। वय्कःया अस्थिधातुइ सांचीया स्तुप निर्मित जुल।