त्रान्जिस्तर

त्रान्जिस्तर धाःगु छगू सेमिकन्दक्तर भः ख। थ्व भःयात इलेक्त्रोनिक सिग्नल व इलेक्त्रिक पावर एम्प्लिफाइ व स्विच यायेत छ्यलि। त्रान्जिस्तर सेमिकन्दक्तर वस्तुं दयेकातःगु दै। थुकिलि पिनेया सर्कितय् स्वायेत म्होय् नं स्वंगु तर्मिनल दइ। त्रान्जिस्तरया छजु तर्मिनलय् भोल्तेज वा करेन्त छ्वइबिलय् मेगु छजु तर्मिनलय् करेन्त बाहा पाइ। नियन्त्रित (आउतपुत) पावर नियन्त्रण याइगु (इन्पुत) पावर स्वया अप्व जुइगुजुलिं त्रान्जिस्तरयात सिग्नल एम्प्लिफिकेसनया निंतिं छ्यलेज्यु। थौंकन्हे छुं त्रान्जिस्तरत अलग्ग वःसां यक्व त्रान्जिस्तरत इन्तेग्रेतेद सर्कितया भागया रुपय् वइगु या। त्रान्जिस्तर आधुनिक इलेक्त्रोनिक ज्याभःया आधारभूत पूर्जा ख। थ्व पूर्जा आधुनिक इलेक्त्रोनिक ज्याभलय् न्ह्याथासय् नं खनेदु। सन् १९५०या दशकय् जूगु त्रान्जिस्तरया विकास धुंका थ्व भलं इलेक्त्रोनिक्सया ख्यलय् हिउपा हल। थुकिया लिच्वया कथं चिधंगु व दंगु रेदियो, क्याल्कुलेतर, कम्प्युतर आदि दयेकेछिन।

ज्या

एनपिएन बाइपोलर त्रान्जिस्तरया सिम्पल सर्कित किपा।

चिधंगु सिग्नल छज्व तर्मिनलय् छयला मेगु छज्व तर्मिनलय् तच्वःगु सिग्नल नियन्त्रण यायेफूगु क्षमता हे त्रान्जिस्तरया ज्याया सार ख। त्रान्जिस्तरया थ्व गुणयात गेन धाइ। त्रान्जिस्तरं थःगु आउतपुत, वःगु इन्पुतया मात्रा कथं नियन्त्रण यायेफु। थ्व गुणया कारणं त्रान्जिस्तरं एम्प्लिफायरया ज्या यायेफु। नापं, त्रान्जिस्तरयात सर्कितय् करेन्त अन वा अफ याकेत इलेक्त्रिकल नियन्त्रित स्विचया रुपय् छयले छिं।

त्रान्जिस्तरया निगु रुप दु। थ्व निगु रुप सर्कितय् छ्यलिगु रुपया आधारय् भति-भति पा। बाइपोलार त्रान्जिस्तरय् तर्मिनलतयेत बेस, कलेक्तर, व इमितर धाइ। चिबाहा करेन्त बेस तर्मिनलय् (बेस व इमितरया दथुइ) बीबलय् कलेक्तर व इमितरया दथुइ तच्वःगु करेन्त नियन्त्रण वा स्विच यायेछिं। फिल्द-इफेक्त त्रान्जिस्तरय् तर्मिनलतयेत गेत, सोर्स, व द्रेन धाइ, व गेतय् भोल्तेज बिया सोर्स व द्रेनया दथुया करेन्त नियन्त्रण यायेछिं।

जवःया किपाय् सर्कितय् साधारण बाइपोलार त्रान्जिस्तर क्यनातःगु दु। बेसय् दूगु करेन्तया आधारय् इमितर व कलेक्तर तर्मिनलया दथुइ चार्ज बाहा वनि। आन्तरिक कथं बेस व इमितर स्वापूं सेमिकन्दक्तर दायोदया रुपय् ज्या याइगु जुलिं बेस करेन्त दइबिलय् बेस व इमितरया दथुइ भोल्तेज द्रप जुइ। थ्व भोल्तेजया मात्रा त्रान्जिस्तर दयेकूगु वस्तुं निर्धारण याइ व थुकियात V_BE धाइ।

त्रान्जिस्तरयात सर्कितय् निगु प्रकारं छ्यलेछिं

• स्विचया रुपय् त्रान्जिस्तर
• एम्प्लिफायरया रुपय् त्रान्जिस्तर

स्वयादिसँ

• कम्प्युतर
• गणित
• सेमिकन्दक्तर