जिब्राल्टर हिन्दू देगः
| जिब्राल्टर हिन्दू देगः | |
|---|---|
 देगःया न्ह्यःया भाग | |
| निर्देशांक: | 36°8′31.45″N 5°21′7.1″W / 36.1420694°N 5.351972°W |
| स्थान | |
| देय्: | जिब्राल्टर |
| अवस्थिति: | पी.ऑ. बोक्स 1235, इंजीनियर्स लेन |
| वास्तुकला और संस्कृति | |
| दूगुद्यः: | थःगु कलाः सीता, किजा लक्ष्मण व परम भक्त हनुमान नाप राम |
| इतिहास | |
| निर्माण तिथि: (वर्तमान संरचना) | 2000 |
जिब्राल्टर हिन्दू देगः ब्रिटिश प्रवासी शासित प्रदेश जिब्राल्टरय् स्थित हिन्दू देगः ख। सन् 2000स दयेकूगु जिब्राल्टर हिन्दू देगः इंजीनियर्स लेनय् ला। थ्व जिब्राल्टरय् दुगु छगू जक्क हिन्दू देगः ख व थ्व क्षेत्रया हिन्दूतयेगु निंतिं आध्यात्मया केन्द्र ख। जिब्राल्टेरियन हिन्दू जिब्राल्टरया जनासंख्याया करिब 1.8 प्रतिशत दु। थुकिलि आपालं मनु आया पाकिस्तानया सिन्ध राज्यनं वःपिं बनेज्यामितयेगु वंशज ख। देगः छगू धर्मार्थ संगठन ख गुकिया मू उद्देश्य जिब्राल्टरय् हिन्दू लहना व संस्कृतिया संरक्षण यायेगु ख। देगले मू आराध्य राम ख, वसपोलया कलाः सीता, किजा लक्ष्मण व परमभक्त हनुमान नापं देगःया मू वेदीइ विराजमान जु। थ्व नापं देगले यक्व मेमेगु हिन्दू देवी-द्यःतयेगु प्रतिमा दु। देगले न्हि-न्हिं सनिलस 7:30 ईले आरती जुइ व सकल लाया पुन्हि खुनु सत्यनारायण बाखँ नं आयोजित याइगु या। देगले हिन्दू धर्मनाप स्वापू दुगु थी-थी प्रकारया धार्मिक कक्षातयेगु नं आयोजन जुइ।
जिब्राल्टरय् हिन्दुतयेगु आगमन
[सम्पादन]
दकले पुलांगु दूगु दसिं कथं जिब्राल्टरय् दकले न्ह्यः सुं हिन्दूं झिन्गुंगु शताब्दीइ थ्यंगु ख। 1869स स्वेज नहरया पलिस्था जुल गुकिया दच्छि धुंका भारतीय बनेज्यामितयेसं जिब्राल्टरनाप कारोबार यात। वय्कःपिं थन वया धाःसा मच्वं। थुकिलि आपालं बनेज्यामि थौँया पाकिस्तानया सिन्ध प्रान्तयापिं ख।[१]
1967स आयोजित जूगु जिब्राल्टर संप्रभुता जनमत संग्रहय् जिब्राल्टेरियन मनुतयेसं अत्यधिक रूपं ब्रिटेनया सम्प्रभुताया अन्तर्गत च्वनिगु निर्णय यात। थुकिया लिच्वः कथं 1969स जिब्राल्टर संविधान ऑर्डर पारित जुल। थुकिया लिच्वःय् स्पेननं जिब्राल्टरनाप थःगु सीमा पूर्ण रूपं तिनाबिल व संचारया दक्वं स्वापू त्वथल।[२] लिच्वःकथं स्पेनय् ब्रिटिश नागरिकता नाप च्वनाच्वंपिं हिन्दुतयेसं जिब्राल्टरय् पलायन न्ह्याथंकल। 1961स जिब्राल्टरया हिन्दू जनसंख्या 26 जक्क दःसां सन् 1970स थ्व अप्वया 293 तक्क थ्यं वन।
आपालं जिब्राल्टरया हिन्दू सिन्धी मूलया दु। हिन्दुतयेसं एकीकृत शिक्षायात नालाः बिस्तारं समाजया दुनेया मूलभूत इहिपाया ल्या क्वांवल।[१] 1 मार्च 2000स खुनु जिब्राल्टर हिन्दू देगःया इंजीनियर्स लेनय् उद्घाटन जुल व थ्व जिब्राल्टरया छगू जक्क हिन्दू देगः ख।[३] देगःया आधिकारिक रुपय् उद्घाटन वबिलेया जिब्राल्टरया राज्यपाल रिचर्ड लूस, बैरन लूस, नं याःगु ख।[४]
द्यः व पूजा
[सम्पादन]
देगःया इष्टद्यः राम ख, वासपोल थःगु कलाः सीता, किजा व परमभक्त हनुमान नाप दि। देगले दकले न्ह्यःने तयातःगु मू वेदी नापं प्यंगु चिधंगु वेदीत नं दु: विष्णु-लक्ष्मी, सिन्धीतयेगु दूगुद्यः झूलेलाल, थःगु दकले चिधंम्ह काय् गणेद्यःनापं महाद्यः-पार्वती व राधा-कृष्ण। देगले सिख धर्मया पलिस्थामि व झिम्ह गुरुइ दकले न्हापांम्ह गुरु नानकया प्रतिमा नं दु। थुकिया नापं हे थन शिरडीया साई बाबा व देवीया उग्र रूप दुर्गाया प्रतिमात दु।[५]
न्हिन्हिया आरती सनिलय् 7:30 इले जुइ। सत्य साई बाबाया सत्संग व मन्त्रतयेगु जाप नं देगःया दैनिक क्रियाया अहम भाग ख।[६] सत्यनारायण बाखँ सकल लाया पुन्हिखुनु आयोजित जुइ। थ्व धार्मिक अनुष्ठानय् देगःया पण्डित विष्णुया कृपालु अवतार सत्यनारायणयात समर्पित बाखँ ब्वनि।[७]
सीकेगु कक्षात
[सम्पादन]देगलं हिन्दू लहना व ग्रन्थत नाप स्वापू दुगु धार्मिक कक्षातयेगु आयोजन याइ। अन्तराष्ट्रिय कृष्णभावनामृत संघ नं लच्छिइ छकः देगले भगवद्गीताय् आधारित छगु कक्षाया आयोजन याइ। बुधवाः खुनु वेदान्त दर्शन नाप स्वापू दुगु कक्षा आयोजित जुइ।[८]
लिधंसा
[सम्पादन]- ↑ १.० १.१ Archer, Edward G. (2006). Gibraltar, identity and empire. London: Routledge.
- ↑ Cahoon, Ben (2000). Gibraltar. WorldStatesmen. 12 दिसम्बर 2012 कथं।
- ↑ Gibraltar Attractions – Historical Places of Worship. gibraltarinformation.com. 12 दिसम्बर 2012 कथं।
- ↑ User:Toromedia (23 नवम्बर 2012), Gibraltar Hindu Temple inauguration plaque, विकिमीडिया कॉमन्स, <http://commons.wikimedia.org/wiki/File:Gibraltar_Hindu_Temple3.JPG>. Retrieved on 14 दिसम्बर 2012
- ↑ Virtual Tour. Gibraltarhindutemple.org. 12 December 2012 कथं।
- ↑ Events – Regular Events. Gibraltarhindutemple.org. 12 December 2012 कथं।
- ↑ (1983) Karma: An Anthropological Inquiry. University of California Press. Retrieved on 12 दिसम्बर 2012.
- ↑ Events – Regular Study Classes. Gibraltarhindutemple.org. 12 दिसम्बर 2012 कथं।
पिनेया स्वापू
[सम्पादन] |
विकिमिडिया मंका य् थ्व विषय नाप स्वापु दुगु मिडिया दु: जिब्राल्टर हिन्दू मंदिर |