विकिपिडिया:Username policy

बहुजातीय, बहुभाषिय, बहु सांस्कृतिक देय् कथं हलिंया न्ह्यःने नेपाःया म्हसिका दु । नेपाःया थी थी जातजातीतय् थःथःगु हे तजिलजि, परम्परा दु । उकथं हे बिबिधतां जाःगु तजिलजिया तःमि नेवाः समाज नं खः । नेवाः समाजया दार्शनिक, सामाजिक व वैज्ञानिक अर्थ दुसुला च्व.गु थी थी परम्परा, तजिलजि मध्ये छगू खः, म्हपुजा । नेपाःमिया निगूगु तःधंगु नखः स्वन्ति खः । अझ नेवाःतय् ला दक्कले तःधंगु नखः हे धाःसां ज्यु । छाय्कि नेवाःतय्सं स्वन्ति थें झः भः धायेक मेगु नखः महं । स्वन्तिया झ्वलय् लक्ष्मी पुजाया कन्हय् कुन्हु याइगु म्हपुजा गबले गनंनिसें न्ह्याःगु खः धइगु बिषयस गनं छुं हे दसि लूगु मदुनि । बलि राजालिसे स्वपलाः दान काये धुंकाः बलि राजाया दानी व त्यागी स्वभावया मखु कथं लवः काये लात धकाः पश्ताय् चाःम्ह नारायण द्यः थम्हं हे बलि राजाया त्यागी अले दानि प्रबृत्तीया अनुकरण याये सयेकि धकाः आत्मपुजा याके ब्यूगु व व हे आत्मपुजा लिपा वनाः म्हपुजा कथं हिलावंगु धाइपिं नं दु । तर यदि जूगु धइगु खःसा म्हपुजा सकल हिन्दुतय्सं हनेमाःगु खः । छाय् नेवाः समाजय् म्हपुजा यायेगु चलन जुल ले सा ? हाकनं समयया गुगुं कालखण्डय् आःया बिशाल नगर राज्य हे जुयाच्वंगु इलय् अन अग्निकाण्ड जूबलय् अनं थःगु ज्यान बचे यानाः बिस्युं वःपिसं ख्येँय् सगं कयाः म्हपुजा याःगु धाःगु नं खँ न्यनेदु । नेवाः समाजय् छुं कथंया भय अथवा तःधंगु संकट टरे जुल धाःसा ख्येँय् सगं कायेगु चलन ला दुगु हे जुल । अथे जूगुलिं मिं बचे जुयाः वःपिसं ख्येँय् सगं काल धायेबलय् उगु चलन न्हापा हे दुगु खः धकाः थुइके फु । म्हपुजा नेपाल सम्बतया न्हू दँ अर्थात दँया दक्कले न्हापांगु दिं कछलाथ्व पारु कुन्हु यायेगु याइ । राघव देवया शासन इलय् शंखधर साख्वालं राज्ययात सकलें जनताया ऋण पुलाः बियाः सकसितं ऋणमोचन याना बी धुंकाः सकसितं आवंलि न्हूगु कथं जीवन हने सयेकि धकाः म्हपुजा याके ब्यूगु नं धायेगु याः । नेपाल सम्बतया इतिहास बल्ल ११३४दँ जक पुलां तिनि । तर नेपाल सम्बत न्ह्याये सिबें न्ह्यः हे म्हपुजा यायेगु चलन दये धुंकल । हरेक नखःचखः वा पुजा, द्यः अथवा द्यःया पुजालिसे हे सम्बन्धित जुयाच्वनी । तर म्हपुजा छुं छम्ह द्यः वा धर्म बिशेषलिसे सम्बन्धित मखु धाःसां छुं पाइमखु । छाय्कि म्हपुजाय् सुं द्यःयात पुज्यायेगु मखसें थम्हं थःयात हे पुज्यायेगु खः । सुं द्यःयात मखसें थम्हं थःयात पुज्यायेगु छगू दार्शनिक परम्परा हो । थःत थम्हं हे पुज्यायेगु तजिलजिं द्यः थःके दुने हे दइ, देगलय् माः जुइ म्वाः धइगु शिक्षा नं बियाच्वंगु दु सा थुगु तजिलजियात दक्कले न्हापां थम्हं थःत नि म्हसीके, वयां लिपा तिनि मेपिं म्हसीके फइ धइगु हसनाया रुपय् नं कायेफइ । म्हपुजा यायेत सकल छेँजः छथासं मुनी । छेँया सुं दुजः तापाक्क गनं वनाच्वंगु दु सां म्हपुजा यायेत छेँय् थ्यंकः वइ । छेँय् थ्यंकः वयेमफूगु अवस्थाय् उम्ह छेँजःया नामय् मन्दः दयेकाः मन्दः जक सां पुज्यायेगु याइ । म्हपुजाय् मन्दःया बिशेष थाय् दयाच्वनी । म्हपुजा धइगु हे थम्हं थःयात पुज्यायेगु खत । तर गथे यानाः पुज्यायेगु ले ? थम्हं थःयात हे पुज्याये ला मछिन । म्हपुजा यायेत थःगु प्रतिबिम्बया रुपय् मन्दः स्थापना याइ । मानव शरीर पञ्चतत्वं निर्माण जुयाच्वंगु दइ । थःगु शरीरया पञ्चतत्वया प्रतीकया रुपय् पञ्चतत्वया प्रतिनिधित्व याइगु थी थी हलंज्वलंपाखें म्हपुजाया मन्दः दयेकी । दक्कले न्हापां लखं मन्दः च्वइ । लः जलतत्व जु हे जुल । वयां लिपा लःया द्यःने चिकनं च्वइ । लखय् लेहेँपुइगु चिकं वायुतत्वया प्रतीक खः । लः व चिकनं च्वयातःगु मन्दःया द्यःने पोतासं च्वइ । पोताय् धइगु पृथ्वी तत्वया प्रतीक खः । उकी द्यःने हाकनं अबिरं च्वइ । आकाश तत्वया रुपय् मन्दलय् ताय् व्हली । मन्दलय् आखेय् नं तइ, नापं माय्, हाकु मुस्या नं तइ । मन्दलय् दुने न्यापुचः वा नं तइ । थुगु वा न्यापुचः नं पञ्चतत्वया हे प्रतीक कथं काइ । थुगु दक्वं हलंज्वलं तयेधुंकाः मन्दः दयेकेगु ज्या क्वचाइ । अले म्हपुजा यायां मन्दलय् खेलुइताः नं च्याकी । झीगु नेवाः भासय् खे धइगु ख्वाः खः । ख्वाःया हाकः गुलि दइ, अपाय् हाकः यानाः दयेकेमाःगु इताः जूगुलिं थुकीयात खेलुइताः धाःगु खः । खेलुइताः च्याके धुंकाः थुकिं अग्नि वा तेजतत्वया थाय् काइ । मन्दलय् छ्लीगु थी थी हलंज्वलंयात थुकथं पञ्चतत्वया प्रतीकया रुपय् नं काइ सा थुकीयात मेकथं नं ब्याख्या यानातःगु खनेदु । ताय्यात स्वर्गया स्वां अथवा बसुन्धराया रुपय् नं काःसा हाकु मुस्यायात शनिश्चर, माय्यातसंकटा, आखेय्यात करुणामयया रुपय् नं ब्याख्या यानातःगु खनेदु । म्हपुजा यायेगु तरीका वा मन्दःया स्वरुप थी थी थाय् अथवा जातीय समुदाय अनुसार पाःगु खनेदु । तर थुकी सकसिगु मंकाः तजिलजि धइगु छगू ला मन्दः हे खत । स्वरुप पाःसां च्वय् न्ह्यथनागु थी थी हलंज्वलं तयाः सकसियां थःथःगु कथंया मन्दः धाःसा च्वये हे माः । अले मेगु मंकाः तजिलजि धइगु सगं खः । नेवाः समाजय् न्ह्याम्हेसिनं नं छुं न्हूगु ज्या न्ह्याकीबलय्, छुं भय वा तःधंगु संकट टरे जुल धाःसा, बुदिं वा इहिपाः आदि अथवा छुं तःधंगु ज्या ताःलाःसा, जाँचय् पास जूसा ख्येँय् सगं बिइगु चलन दु । ख्येँय् सगनय् नं मुख्य कथं न्याता नसा ज्वलं दय् हे माः । न्या, गंगु न्या, माय्वः, छ्वय्ला अले अय्लाः । थुगु न्याता ज्वलनं नं पञ्चतत्वया हे प्रतिनिधित्व याइ । लखय् च्वनीम्ह न्यां जलतत्व, माय्वः वायुतत्व, छ्वय्ला पृथ्वी, अय्लाः अग्नि व ख्येँय्यात आकाशतत्व कथं काइ । पञ्चतत्वं निर्माण जुयाच्वंगु मानव शरीरय् दक्वं तत्वत सन्तुलित जुयाः स्वस्थ जुयाच्वनेमा धइगु कामना यानाः पञ्चतत्व हे सगंया रुपय् बिइ । म्हपुजा यायेगु बिधि तान्त्रिक बिधि खः । तर म्हपुजा यायेत छुं नं कथं तान्त्रिक दिक्षा कयाच्वने माः धइगु मदु । न कि थुकी सुं पुरोहित हे माः धइगु दु । छेँयाम्ह नकिम्हं हे म्हपुजा याइ वा याके बी । सकलें छेँजः थःथःगु मन्दलय् मर्यादा कथं फ्यतुइ धुंकाः नकिम्हं सकसितं धौ सगं तिका बी । धौसगंयात तिमिलाया रुपय् काइ । वयां लिपा माःमाःकथं पुजा यानाः सि सगं अर्थात फलफुल सगं नं बिइ । सि सगंलिसें ग्वय्स्वांमाः व जजंका नं बी । गबलें सुकू मचिनीगु ग्वय््स्वानं जीवनयात गबलें म्वाःमदुगु ज्याखँय् सित्तिं मछ्वये, सुकू चिंके मबी धइगु हसना बियाच्वंगु दइ । खय्तला म्हपुजा मनुखं थम्हं थःयात हे पुज्यायेगु खत । तर गुम्ह गुम्हेस्यां थःगु छेँय् लहिनातयापिं झंगः वा पशुतय्त नं पुज्यायेगु याः । उकीया नापं म्हपुजा यायेबलय् थःगु न्हियान्हिथंया जीवन न्ह्याकेत माःगु हलंज्वलंयात नं पुज्यायेगु याइ । गथेकि बँ पुइगु तुफि, जाकि हायेगु हासा, लः तयेगु लःघः वा त्यप, मसला नीगु लोंमा आदि । थुकथं म्हपुजा धइगु मानव जीवनलिसे तप्यंक व सतिक स्वापू दुगु परम्परा खः धइगु सी दु । उमेरया ल्याखं बुयाः जन्को कोचाःम्ह मचानिसें म्वानाच्वंम्ह न्ह्याम्हसिनं म्हपुजा यायेज्यू । सभ्य समाजया बिकास यायेगु, झीगु न्हियान्हिथंया जीवनयात स्वस्थ्य दयेकेत माःगु शिक्षा, हसना लिसेंया थुगु कथंया परम्परायात थुइकाः थुकीयात न्ह्याका यंकेगु धइगु न्ह्याम्हेसिगु नितिं नं बांलाःगु हे खँ जुइ ।