जर्ज वाशिङ्तन
जर्ज वाशिङ्तन वा जर्ज वाशिंगटन (फेब्रुअरी २२, १७३२ - डिसेम्बर १४, १७९९) संयुक्त राज्य अमेरिकाया छम्ह पलिस्थामि ख। वय्कः संयुक्त राज्य अमेरिकाया दकलय् न्हापांम्ह राष्ट्रपति नं ख। संयुक्त राज्य अमेरिकाया राजधानी व वाशिङ्तन राज्यया नां वय्कःया नामं हे तःगु ख। थःगु जीवनय् वय्कलं छम्ह अमेरिकी संस्थापक अबु, सैन्य अधिकारी, बुंज्या व सन् १७८९ निसें १७९७ तक्क संयुक्त राज्य अमेरिकाया न्हापांम्ह राष्ट्रपतिया ज्या यानादिल। वाशिंगटनं अमेरिकी क्रान्तिकारी युद्धय् देशभक्त सेनायात विजयया निंतिं नेतृत्व यानादिल व अनंलि सन् १७८७य् संवैधानिक महाधिवेशनया अध्यक्षया रुपय् ज्या यानादिल, गुकिलिं संयुक्त राज्य अमेरिकाया वर्तमान संविधानया मस्यौदा दयेकल। थुकथं वाशिंगटनयात सामान्यतया अमेरिका देय्या अबुया रुपय् म्हसीकेगु या।
वाशिंगटनया न्हापांगु सार्वजनिक पद सन् १७४९ निसें १७५० तक्क भर्जिनियाया उपनिवेशय् च्वंगु कुलपेपर काउन्टीया सर्भेयरया रुपय् जुल। सन् १७५२इ वय्कलं सैनिक तालिम कया भर्जिनिया रेजिमेन्टय् मेजरया पद प्राप्त यानादिल। फ्रान्सेली व आदिवासी युद्धया इलय् वाशिंगटनयात सन् १७५४इ लेफ्टिनेन्ट कर्नलया पदय् पदोन्नति यात व वयां लिपा सन् १७५५इ भर्जिनिया रेजिमेन्टया प्रमुख जुयादिल। लिपा वय्कः भर्जिनिया हाउस अफ बर्गेसेसय् (Virginia House of Burgesses) निर्वाचित जुल व फिलाडेल्फियाय् च्वंगु कन्टिनेन्टल कांग्रेसया प्रतिनिधिया रुपय् मनोनित जुयादिल। कन्टिनेन्टल कांग्रेसं वय्कःयात कन्तिनेन्तल आर्मीया प्रमुख सेनापति नियुक्त यात। वाशिंगटनया नेतृत्त्वय् अमेरिकी सेनां क्रान्तिकारी युद्धय् बेलायतीतेगु विरुद्ध निर्णायक रुपं त्यातः। थुकिया लिच्वः कथं बेलायतीतेसं संयुक्त राज्य अमेरिकाया सार्वभौमसत्ता व स्वतन्त्रतायात स्वीकार याःगु पेरिस सन्धिइ हस्ताक्षर यात। क्रान्तिकारी युद्ध क्वचायेधुंका सन् १७८३य् वय्कलं थःगु सैन्य जिम्मेवारीं राजीनामा बियादिल।
वाशिंगटनं संविधानयात स्वीकार यायेगु व अनुमोदन यायेगु ज्याय् अपरिहार्य भूमिका म्हितादिल, गुकिं सन् १७८९ य् कन्फेडेरेसनया धारायात प्रतिस्थापन यात। अनंलि वय्कःयात निक्वःतक सन् १७८८ व १७९२ य् इलेक्टोरल कलेजं सर्वसम्मतिं राष्ट्रपति निर्वाचित यात। मन्त्रिपरिषदया दुजः थोमस जेफरसन व अलेक्जेन्डर ह्यामिल्टन दथुइ ब्वलंगु तच्वःगु प्रतिद्वन्द्वय् निष्पक्ष जुयादिल। नापं, वाशिंगटनं बल्लाःगु व वित्तीय रुपय् स्थिर राष्ट्रिय सरकार दयेकादिल। फ्रान्सेली क्रान्तिया इलय् वय्कलं तटस्थताया नीति घोषणा यानादिल व जे सन्धियात स्वीकृति बियादिल। वय्कलं राष्ट्रपतिया पदया निंतिं स्थायी उदाहरण दयेकादिल, गुकिलि गणतन्त्रवाद, शान्तिपूर्ण सत्ता हस्तान्तरण, "मिस्तर प्रेजिदेन्त" उपाधिया छ्येलेज्या, व निगु कार्यकालया परम्परा दयेकूगु ला। वय्कःया सन् १७९६या विदाई सम्बोधन गणतन्त्रवादया छगू प्रमुख वक्तव्य जुल गुकिलि वय्कलं राष्ट्रिय एकताया महत्त्व व क्षेत्रीयतावाद, पक्षपात व विदेशी प्रभावं थुकियात दूगु खतराया बारेय् च्वयादिल।
वाशिंगटनया छवि अमेरिकी संस्कृतिया उत्कृष्टया रुपय् कायेगु या। वय्कःया लुमन्तिइ स्मारक, छगू संघीय बिदा, थीथी संचार माध्यमया चित्रण, राष्ट्रिय राजधानी, वाशिंगटन राज्य नापंया भौगोलिक थाय्, टिकट, व मुद्रा तयातःगु दु। सन् १९७६य् वाशिंगटनयात मृत्यु लिपा वय्कःयात अमेरिकी सेनाया दकलय् उच्च पद जेनेरल अफ द आर्मीज आर्मीज मानार्थ कथं वय्कःयात लःल्हात। थीथी सर्वेक्षणं वाशिंगटनयात निरन्तर कथं अमेरिकी इतिहासया दकलय् तःधंम्ह व लोकप्रिय राष्ट्रपतिया रुपय् स्थापित याःगु दु।