अलिफ लैला व-लैला
![](http://upload.wikimedia.org/wikipedia/commons/thumb/9/95/Ferdinand_Keller_-_Scheherazade_und_Sultan_Schariar_%281880%29.jpg/300px-Ferdinand_Keller_-_Scheherazade_und_Sultan_Schariar_%281880%29.jpg)
अलिफ लैला व-लैला वा किताब अलिफ लैला व-लैला (अरबी भासय्: كتاب ألف ليلة وليلة वा Kitāb alf laylah wa-laylah) छगू पश्चिम व दक्षिण एसियाया बाखँमुना ख। थ्व बाखँमुनाया बाखँ अरबी भासय् इस्लामी स्वर्ण युगय् मुनातःगु ख। थुकियात अरेबियन नाइत्स् (Arabian Nights)या नामं नं म्हसीकिगु या। थ्व नां थ्व सफूया न्हापांगु अंग्रेजी भाय्हिला, सन् १७०६स पिथंगु द अरेबियन नाइत्स् एन्तरतेन्मेन्त (The Arabian Nights' Entertainment)या चीहाकःगु नां ख।[१]
थ्व सफूलि थीथी शदीया थीथी च्वमि, भाय्हिलामि व विज्ञतेसं पश्चिम, मध्य, दक्षिण एसिया व उत्तर अफ्रिकाय् दूगु थीथी बाखँ मुंकातःगु दु। थ्व सफूया बाखँत आपालं प्राचीन व मध्यकालीन अरबी, पारसी, भारतीय, मिस्रमि, मेसोपोतामियामितेगु दन्त्यकथा व साहित्यय् आधारित दु। थ्व सफूलि यक्व बाखँ खलिफत युगया दूगु व छुं बाखँ इरानया पल्लवि युगया हजार अफ्सान (Hazār Afsān वा هزار افسان अर्थ:द्वछि बाखँ) धाःगु सफूलिं प्रेरित जूगु, व हजार अफ्सान सफूलि थीथी भारतीय तत्त्व दयाच्वंगुलिं थुकिलि भारतीय प्रभाव नं खनेदूगु ख।[२]
थ्व ग्रन्थया नांजाःगु बाखनय् अलादिनया बाखँ, अलिबाबाया बाखँ, न्यालामि व जिन्नीया बाखँ, सिन्दबाद नाविकया बाखँ आदि ला। थ्व ग्रन्थय् थीथी काल्पनिक व ऐतिहासिक पात्रत दु। थ्व सफूया काल्पनिक पात्रय् अलिबाबा, बद्रौलबदौर, सागरया बुरा, सिन्दबाद आदि लाः धाःसा ऐतिहासिक पात्रय् हरुन अल रशिद, हतिम अलताइ, जफर इब्न् यक्या, खोरौ २, अबु नुवाद, शिरिन, जुबैदा बिन्त जफर आदि ला।