तेक्नेसियम

विकिपिडिया नं

तेक्नेसियम छगू रसायनिक तत्त्व ख। थ्व तत्त्वया रसायनिक चिं Tc व एतमिक ल्या ४३ ख। सकल आइसोतोम रेदियोएक्तिभ जूगु तत्त्वतेगु पुचलय् थ्व दकलय् याउंगु तत्त्व ख। रेदियोएक्तिभ जूगुलिं थ्व तत्त्व स्थिर मजु। सकलथें हे तेक्नेसियम कृत्रिम पद्धतिं दयेकीगु या। प्राकृतिक रुपय पृथ्वीया सतहय् थ्व तत्त्व सिक्क म्हो मात्राय् जक दु। प्राकृतिक अवस्थाय् थ्व तत्त्व युरेनियम खानीइ युरेनियमया विखण्डन पदार्थ (spontaneous fission product) वा मोलिब्देनम खानीया न्युत्रोन क्याप्चरया लिच्वया रुपय् दयाच्वनि। वहः रंगया थ्व क्रिस्तलाइन त्रानजिसन धातुया रसायनिक गुण रेनियम व म्यांग्यानिजया दथुइ ला।

तेक्नेसियमया आपा गुण दिमित्रि मेन्दलीवं थ्व धातुया खोज स्वया न्ह्यः हे वर्णन यानादील। मेन्दलीवं थःगु तत्त्वमांय् रिक्त थाय् खना थ्व थासय् एकाम्यांग्यानिज ekamanganese (Em) तत्त्व दयेमा धकाः थःगु प्रस्ताव तयादिल। सन् १९३७स तेक्नेसियम (तेक्नेसियम-९७ आइसोतोप) हलिंया दकलय् न्हापांगु मूलभूत कृत्रिम तत्त्वया रुपय् उत्पादित जुल। कृत्रिम तवलं दयावःगुलिं थ्व तत्त्वया नां ग्रीक खँग्व τεχνητός (अर्थ: कृत्रिम)य् -ium स्वाना थ्व तत्त्वया नां वःगु ख।

तेक्नेसियमया छगू गामा जः-पिकाइगु न्युक्लियर आइसोमर—तेक्नेसिय-९९m—न्युक्लियर मेदिसिनय् थीथी नैदानिक पद्धतिइ छ्येलीगु या।

स्वयादिसँ[सम्पादन]