गोल्डा मेयर

गोल्डा मेयर גּוֹלְדָּה מֵאִיר
४औं इजरायलया प्रधान मन्त्री
कार्यालयय्‌ मे १३ १९६९ – जुन ३ १९७४
न्हापायाम्ह पदाधिकारी	लेभी एश्कोल
लिपायाम्ह पदाधिकारी	यित्ज्याक रबिन
बुगु	मे ३ १८९८ कीभ, रुसी साम्राज्य
मदुगु	डिसेम्बर ८, १९७८ जेरुसालेम, इजरायल
राजनीतिक पार्टी	लेबर खलः

गोल्डा मेयर (हिब्रु: גּוֹלְדָּה מֵאִיר ) इजरायलया ४म्ह प्रधानमन्त्री ख। इजरायलया स्वतन्त्रता घोषणाय् हस्ताक्षर याइपिं निम्ह मिसाय् वय्कः छम्ह खः। वय्कः नापं रेचेल कोहेन थ्व दस्ताबेजय् हस्ताक्षर याइम्ह मेम्ह मिसा ख। वय्कः सन् १९६९ व सन् १९७४या दथुइ इजरायलया प्रधानमन्त्रीया रुपय् ज्या यानादिल। थ्व पदय् सेवा याइम्ह वय्कः न्हापांम्ह व आःतकया छम्ह जक मिसा खः।

मेयरया जन्म कीव, रूसी साम्राज्यय् जूगु ख। वय्कः मचाबिले थःगु परिवार नापं संयुक्त राज्य अमेरिकाय् थाय्हिला दिल। वय्कः २३दँ तक अमेरिकाय् हे च्वनादिल। २३ दँय् वय्कः थःगु भातः नाप इजरायलय् थ्यनादिल। अन, वय्कः छगू न्हापांगु किबुत्जय् साधारण रुपं च्वनादिल। मेयरं थःगु राजनीतिक जीवनया हिस्टाड्रट हिस्टाड्रटया कार्यसमितिया सचिवया रुपं यानादिल। वय्कः १९२० दशकया अन्त व १९३० दशकया शुरुआतय् अमेरिकाय् यक्व मिशनय् वनादिल। थ्व इलय् वय्कः हापोआलिम आन्दोलन व जायोनीवादी आन्दोलनया झ्वलय् इजराइल व संयुक्त राज्य अमेरिकाय् सक्रिय जुयादिल। सन् १९४८स वय्कः उपिपुल्स काउन्सिलया सदस्यया रूपय् नियुक्त जुयादिल व अनं वय्कलं इजरायलया स्वतन्त्रताया घोषणाय् ल्हाचिं (हस्ताक्षर) यानादिल।

मेयर लिपा संविधान सभाय् निर्वाचित जुयादिल। थ्व सभा लिपा इजरायलया न्हापांगु संसद नेसेट जूवन। वय्कः न्हापांगु इजराइली सरकारय् श्रम मन्त्रीइ नियुक्त जुयादिल। थ्व भूमिकाय् वय्कलं सामाजिक कानूनया नेतृत्व यानादिल व इजरायलय् श्रम कानूनया जग तयादिल। सन् १९५५स वय्कलं तेल अभिवया मेयरया निंतिं पीएआईया छम्ह उम्मेदवारया रूपय् नामांकृत जुसां सन् १९५६स वय्कःयात तत्कालीन सरकारं विदेश मन्त्रीया पदभार लःल्हात। थ्व ईलय् वय्कलं थःगु जात मायर्सनं हिलाः मेयर यानादिल। वय्कः थ्व पदय् छगू दशक तक च्वनादिल। थ्व इलय् सिनाई युद्ध न्ह्यथन। वय्कः सन् १९६६स थःगु पद त्वतादिल। लिपा, वय्कः मपई पार्टीया सचिव नियुक्त जुयादिल। थ्व पदय् वय्कलं श्रमिक दलतेगु एकीकरणया नितिं यक्व ज्या यानादिल। नापं, वय्कः न्हूगु लेबर पार्टीया सचिव जुयादिल।

लेवी एशकोलया मृत्यु नापं, वय्कःयात लेबर पार्टीया अध्यक्षया रूपय् नियुक्त यायेगु निर्णय जुल, व मार्च सन् १९६९स वय्कलं इजराइलया १४गू सरकार दयेकादिल। वय्कःया नेतृत्वय् वय्कःया पक्षं न्हेगु नेसेटय् सर्वाधिक ५६ सीट त्यात। प्रधानमन्त्रीया पद कायेधुंका वय्कलं संघर्षया युद्ध बिले इजराइलया नेतृत्व यानादिल। वय्कलं इजराइल व अरब देय्तेगु दथुइ स्थायी शान्ति दयेकेत प्रत्यक्ष खँल्हाबल्हा यायेगु कुतः व इनाप यानादिल। थ्व इनाप अबिलेया अरब देय्तेसं, विशेष रुपं मिस्रं सिधा विरोध यात।

प्रधान मन्त्रीया रूपय् थःगु कार्यकाल बिले मेयरं यक्व संकट स्वयेमाल: ब्ल्याक प्यान्थर्सया विरोध, आतंकवादी लहर; व योम किप्पुर युद्ध, गुकिलि निद्व स्वया अप्व मनू शहीद जुल। एग्रान्त कमिटी, गुकिलिं युद्ध न्ह्यःया जासुसी विफलता धुंका स्थापित जूगु कमिटीं वय्कःया सरकार व सरकारी नेता विरुद्ध तःच्वःगु निष्कर्ष पिथन। थुकिया लिच्वःया कथं बूगु सार्वजनिक आक्रोशया झ्वलय् मेयरं थःगु पदं राजीनामा बियादिल व सार्वजनिक जीवनं निवृत्त जुयादिल।

स्वयादिसँ

• इजरायल