समाजशास्त्र
समाजशास्त्र मानव समाजया वैज्ञानिक अध्ययन ख गुकिलिं समाज, मानव सामाजिक व्यवहार, सामाजिक स्वापूया स्वरुप, सामाजिक अन्तरक्रिया, व दैनिक जीवननाप स्वापू दूगु संस्कृतिया पक्षय् केन्द्रित जुइ। सामाजिक विज्ञान व मानविकी निगुलिंया छगू भागया रुपय् कायेगु समाजशास्त्रं सामाजिक व्यवस्था व सामाजिक परिवर्तनया बारेय् ज्ञानया छगू निकाय विकास यायेत अनुभवजन्य अनुसन्धान व आलोचनात्मक विश्लेषणया थीथी विधि छ्यलिगु या। समाजशास्त्रीय विषयवस्तु व्यक्तिगत अन्तरक्रियाया सूक्ष्म स्तरया विश्लेषणंनिसें सामाजिक व्यवस्था व सामाजिक संरचनाया बृहत स्तरया विश्लेषण तकया दु। एप्लाइद समाजशास्त्रीय अनुसन्धान प्रत्यक्ष रुपं सामाजिक नीति व कल्याणय् लागू जुइफु धाःसा सैद्धान्तिक दृष्टिकोण सामाजिक प्रक्रिया व घटनाशास्त्रीय पद्धतिया थुइकेगुलि केन्द्रित जुइ।
समाजशास्त्रया परम्परागत केन्द्र सामाजिक स्तरीकरण (social stratification), सामाजिक वर्ग (social class), सामाजिक गतिशीलता (social mobility), धर्म , धर्मनिरपेक्षता , कानून, लैंगिकता, लिंग, व विचलन (deviance) ख। थ्व ख्यःया न्हूगु अध्ययनं डिजिटल विभाजन(digital divide)या सामाजिक-प्राविधिक पक्षयात न्हूगु फोकसया रुपय् थप याःगु दु। मानव गतिविधिया फुक्क क्षेत्र सामाजिक संरचना व व्यक्तिगतता दथुइ अन्तरक्रियां प्रभावित जुइगुलिं समाजशास्त्रं बुलुहुँ मेमेगु विषय व संस्थाय् थःगु ध्यान केन्द्रित याःगु दु। दसुया निंतिं उसाँय् व चिकित्सा संस्था; अर्थव्यवस्था; सैनिक; सजाँय व नियन्त्रणया प्रणाली; इन्टरनेट; शिक्षाया समाजशास्त्र; सामाजिक पूँजी; व वैज्ञानिक ज्ञानया विकासय् सामाजिक गतिविधिया भूमिका कायेछिं।
सामाजिक वैज्ञानिक विधिया दायरा नं विस्तार जूगु दु। वर्तमानय् थ्व ख्यलय् सामाजिक अनुसन्धानकर्तातय्सं थी-थी गुणात्मक व परिमाणात्मक प्रविधियात छ्यलि।
सामाजिक अनुसन्धानया जीवनया थी-थी उद्योग व क्षेत्रय् प्रभाव दु। दसुया निंतिं थ्व ख्यःया राजनीति, नीति निर्माण, व विधायिका; शिक्षाविद; योजना दयेकिगु; प्रशासन; विकास; व्यापारिक गतिविधि व व्यवस्थापन; सामाजिक ज्या; गैरसरकारी संस्था; व गैर-लाभकारी संस्थाया लिसें सामान्य रुपं सामाजिक मुद्दा समाधानय् योगदान दु।