पुचः ३ तत्त्व

विकिपिडिया नं
(Redirected from Group 3 element)

पुचः ३ तत्त्व तत्त्वमांया संक्रमण धातुतेगु न्हापांगु पुचः ख। थ्व पुचः विरल-पृथ्वी तत्व नाप स्वापू दूगु पुचः ख। थ्व पुचःया संरचना व वर्गीकरणया विषयय् छुं विवाद दु। अथेजुसां, थ्व विषयया विज्ञतेगु सहमति दु कि थ्व पुचलय् प्यता तत्व: स्क्यान्दियम (Sc), येत्रियम (Y), ल्युतेतियम (Lu), व लरेन्सियम(Lr) दु। थ्व पुचःयात थ्व पुचःया दकलय् याउंगू तत्त्व स्क्यान्दियमया नामं स्क्यान्दियम परिवार नं धाइगु या।

पुचः ३ तत्त्वतेगु रसायनिक गुण प्रारम्भिक संक्रमण धातुतेगु निंतिं विशिष्ट जु: थ्व पुचःया सकल तत्त्वतेगु अक्सिदेसन अवस्था प्रमुख रुपं +३ जक जुइ। नापं थ्व स्वया पूर्ववर्ती मू-पुचः धातुत थें हे थ्व पुचः नं आपालं हे इलेक्ट्रोपोजितिभ जुइ व समन्वय रसायन (कोअर्दिनेसन केमिस्त्रि) म्हो जक जुइ। ल्यान्थनाइद संकुचनया प्रभावया लिच्वः कथं येत्रियम व ल्युतेतियमया गुण समान जु। येत्रियम व ल्युतेतियमय् अनिवार्य रूपं झ्यातूगु ल्यान्थानाइदया रसायनिक गुण दयाच्वनि। तर स्क्यान्दियमया रसायनिक गुण धाःसा थःगु चिधंगु आकारया कारणं येत्रियम व ल्युतेतियम स्वया पा। थ्व प्रारम्भिक संक्रमण धातु पुचःतेगु समान लक्षण ख, गनकि दकलय् याउंगु तत्त्व मेगू निता तत्त्व स्वया पृथक जुइ।

पुचः ३या सकल तत्त्व नाइसे च्वंगु, वह थें तुयूगु तत्त्व ख। तत्त्वतेगु आणविक ल्या वृद्धि नापं तत्त्व कडा जूजूं वनि। पृथ्वीया फय्‌य् धाःसा थ्व पुचःया तत्त्वतेगु शुद्ध रुप छकलं बूलुसे च्वनि। थुकिया कारण वातावरणय् दूगु लः ख। वातावरणय् दूगु लःनाप प्रतिक्रिया यासें शुद्ध पुचः ३ तत्त्वतेगु सतहय् छकलं अक्साइद दयावइ।


स्वयादिसँ[सम्पादन]