सञ्चार
सञ्चार वा संचारयात सामान्यतया सुचं छ थासं मेथासय् छ्वयेगु, ह्वलेगु वा इनेगु व्यवस्था धकाः परिभाषित याइ। संचारयात सामान्य कथं थथे वर्गीकृत यायेछिं: मनु, मेमेगु प्रजातिया दुजःत वा कम्प्युटर थें न्याःगु निर्जीव प्राणी दथुइ सुचंया आदानप्रदान। मानव संचारया निंतिं, मौखिक (म्हुतुं याइगु सञ्चार) व गैर-मौखिक संचारया दथुइ छगू केन्द्रीय विपरीतता दु। मौखिक संचारय् भाषिक रुपय् सन्देशया आदानप्रदान जुइ, गुकिलि न्ववायेगु व च्वयेगु सन्देश नापं सांकेतिक भाषा नं ला। गैर-मौखिक संचार छगू भाषिक प्रणालीया छ्येलेज्या मयासे जुइ, दसुया निंतिं, म्ह भाय् छ्येला, थीया (स्पर्श), व ख्वाःया भावं। मेगु कथं सञ्चारयात अन्तरव्यक्ति संचार, गुगु थीथी मनु दथुइ जुइ, व अन्तरमन संचार, गुगु थःलिसे संचारया कथं यायेछिं। संचारात्मक क्षमता धयागु बांलाक खँल्हाबल्हा यायेगु क्षमता खः गुकिलि सन्देश दयेकेगु व थुइकेगु सीप दुथ्याः।
गैर-मानव संचारया रुपय् पशु व वनस्पति संचार दुथ्याः। पशुतेसं थःगु संचार क्षमता छ्येला प्रेमालाप व संभोग, मांअबु–सत्ता सम्बन्ध, नेभिगेसन, व आत्मरक्षा थें न्याःगु ज्या याः। अपेक्षाकृत मसनिगु स्वांमातेसं रसायनया माध्यमं संचार याइ, दसु मेपलया सिमां मेमेगु वनस्पतियात शाकाहारी आक्रमणया चेतावनी बीत तथाकथित वाष्पशील कार्बनिक यौगिक वायुमण्डलय् पिकाइ। सञ्चारय् अप्वः धयाथें खँल्हाबल्हा छगू हे प्रजातिया दुजःतय् दथुइ जुइ। छगू हे प्रजातितेगु उद्देश्यय् सामान्यतया छुं कथंया सहकार्य जुइगुलिं थथे जुइगु ख। अन्तरप्रजाति संचार खास यानाः साहचर्य सम्बन्धया अवस्थाय् जुइ। दसुया निंतिं, यक्व स्वांतेसं थीथी आकार व विशिष्ट रंग छ्यला कीतेत संकेत बी। लहिनातपिं पशुत व ज्या याइपिं पशुतलिसे अन्तरक्रिया यायेबलय् मनूतसें अन्तरप्रजाति संचारय् संलग्न जुइ।