पाश्चात्य संगीतया शास्त्रीय काल
पाश्चात्य संगीतया शास्त्रीय काल धाःगु करिब १७५० निसें १८२० तक्कया ई ख गुबलय् हेडन, मोजार्ट, बीथोभन व शुबर्ट दकलय् नांजाःपिं जीवित संगीतकार ख।
प्रायः पाश्चात्य संगीतय् “शास्त्रीय संगीत” खँग्वलं युरोपेली संगीतयात म्हसीकि गुकि पप संगीत वा ज्याज वा लोक संगीत मखु। थ्व संगीत खः गुकियात रचना कलाया अध्ययन याःपिं संगीतकारतय्सं च्वःगु ख। शास्त्रीय संगीतया च्वसुइ थ्व अर्थय् शास्त्रीय संगीतया बारेय् खँ ल्हाःगु दु।
थ्व च्वसु १८गु शताब्दीया अन्त व १९गु शताब्दीया सुरुइ “शास्त्रीय संगीत”या बारेय् खः । खँग्वः “शास्त्रीय” प्रायः प्राचीन ग्रीस व रोमया कलायात संकेत यायेत छ्यली । थुकिया अर्थ तसकं नांजाःगु व सलंसः दँ लिपा लुमंकेगु गुगुं नं कलाया अर्थ नं वःगु दु । संगीतय् शास्त्रीय ई बारोक व रोमान्टिकवादया ईया दथुइ वइ ।
छुं कथं शास्त्रीय संगीत बारोक संगीतकारतय्गु संगीत स्वयां अप्वः धया थें सरल जुइ । आपालं ब्रोकन कर्ड छ्यला साधारण अकम्पनिमेन्त दुगु धुन दइ गुकियात “अल्बर्टी बास” धाइ। शास्त्रीय संगीतकारतय् निंतिं संगीतया फर्म तसकं महत्वपूर्ण जुइ। संगीतकारतेसं थःगु ज्या छगू धुन (थीम) तयाः न्ह्याकीगु व थ्व धुनयात थीथी कथं विकास याइगु जुइ। थ्व ज्याया निंतिं थीथी की तयेगु, फास्टं स्लो धुनय् हिलेगु, मेजरं माइनरय् हिलेगु वा माइनरं मेजरय् हिलेगु आदि ज्या जुइ।
संगीतय् शास्त्रीय कालया छुं नांजाःपिं संगीतकारत थथे दु-
- कार्ल फिलिप इमानुएल बाख (१७१४-१७८९)
- क्रिस्टोफ विलिबाल्ड ग्लुक (१७१४–१७८७)
- जोसेफ हेडन (१७३२–१८०९)
- लुइगी बोचेरिनि (१७४३–१८०५)
- मुजियो क्लेमेन्टि (१७५२–१८३२)
- वोल्फगांग अमाद्यूस मोजार्ट (१७५६–१७९१)
- जन लादिस्लाव दुसेक (१७६०–१८१२)
- लुडविग भ्यान बीथोभन (१७७०–१८२७)*
- फ्रान्ज शुबर्ट (१७९७–१८२८)*
* बीथोभन व शुबर्ट क्लासिकल कालय् थःगु संगीत शुरुवात यात तर लिपा रोमान्टिक शैलीइ हिल।