𑐴𑐵𑐩𑑂𑐩𑐸𑐬𑐧𑐷

𑐴𑐵𑐩𑑂𑐩𑐸𑐬𑐧𑐷 (𑐥𑐸𑐮𑐵𑑄𑐐𑐸 𑐧𑐾𑐧𑐶𑐮𑑀𑐣𑐶𑐫𑐣 𑐀𑐎𑑂𑐎𑐵𑐜𑐶𑐫𑐣 : 𒈬𒊏𒁉 , 𑐬𑑀𑐩𑐵𑐣𑐶𑐎𑐺𑐟: Ḫâmmurapi) 𑐥𑑂𑐬𑐵𑐔𑐷𑐣 𑐩𑐢𑑂𑐫 𑐥𑐹𑐬𑑂𑐰𑐫𑐵 𑐕𑐩𑑂𑐴 𑐖𑐸𑐖𑐸 𑐏𑑋 𑐰𑐫𑑂𑐎𑑅​​​​​​​​​ 𑐥𑐸𑐮𑐵𑑄𑐐𑐸 𑐧𑐾𑐧𑐶𑐮𑑀𑐣𑐶𑐫𑐣 𑐳𑐵𑐩𑑂𑐬𑐵𑐖𑑂𑐫𑐫𑐵 𑑖𑐩𑑂𑐴 𑐀𑐩𑑀𑐬𑐷 𑐖𑐸𑐖𑐸 𑐏𑑋 𑐰𑐫𑑂𑐎𑑅 𑐳𑑂𑐰𑐫𑐵 𑐣𑑂𑐴𑑂𑐫𑑅 𑐰𑐫𑑂𑐎𑑅𑐫𑐵 𑐀𑐧𑐸, 𑐳𑐶𑐣-𑐩𑐸𑐧𑐮𑑂𑐮𑐶𑐟 𑐖𑐸𑐖𑐸 𑐖𑐸𑐫𑐵 𑐔𑑂𑐰𑐣𑑋 𑐰𑐫𑑂𑐎𑑅𑐫𑐵 𑐀𑐧𑐸𑐫𑐵 𑐄𑐳𑐵𑑃𑐫𑑂 𑐩𑐨𑐶𑐣𑐵 𑐰𑑄𑐐𑐸𑐮𑐶𑑄 𑐬𑐵𑐖𑐷𑐣𑐵𑐩𑐵 𑐧𑐶𑐫𑐵𑐡𑐶𑐮 𑐰 𑐴𑐵𑐩𑑂𑐩𑐸𑐬𑐧𑐷 𑐖𑐸𑐖𑐸 𑐖𑐸𑐫𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐱𑐵𑐳𑐣𑐎𑐵𑐮𑐫𑑂 𑐰𑐫𑑂𑐎𑐮𑑄 𑐮𑐵𑐬𑑂𑐳𑐵 , 𑐊𑐱𑑂𑐣𑐸𑐣𑑂𑐣𑐵 𑐰 𑐩𑐵𑐬𑐷 𑐣𑐐𑐬-𑐬𑐵𑐖𑑂𑐫𑐟 𑐟𑑂𑐫𑐵𑐎𑐵𑐡𑐶𑐮𑑋 𑐰𑐫𑑂𑐎𑐮𑑄 𑐀𑐱𑑂𑐱𑐹𑐬𑐫𑐵 𑐖𑐸𑐖𑐸 𑐂𑐱𑑂𑐩𑐾-𑐡𑐵𑐐𑐣 𑐥𑑂𑐬𑐠𑐩𑐫𑐵𑐟 𑐳𑐟𑑂𑐟𑐵𑐔𑑂𑐫𑐸𑐟 𑐫𑐵𑐣𑐵𑐡𑐶𑐮 𑐰 𑐂𑐱𑑂𑐩𑐾-𑐡𑐵𑐐𑐣𑐫𑐵 𑐎𑐵𑐫𑑂 𑐩𑐸𑐟-𑐀𑐱𑑂𑐎𑐸𑐬𑐫𑐵𑐟 𑐎𑐬 𑐥𑐸𑐮𑐾𑐟 𑐧𑐵𑐢𑑂𑐫 𑐫𑐵𑐣𑐵𑐡𑐶𑐮, 𑐐𑐸𑐎𑐶𑐮𑐶𑑄 𑐮𑐐𑐨𑐐 𑐦𑐸𑐎𑑂𑐎 𑐩𑐾𑐳𑑀𑐥𑑀𑐚𑐵𑐩𑐶𑐫𑐵𑐫𑐵𑐟 𑐧𑐾𑐧𑐶𑐮𑑀𑐣𑐶𑐫𑐣 𑐱𑐵𑐳𑐣𑐫𑑂 𑐴𑐮𑑋

𑐴𑐵𑐩𑑂𑐩𑐸𑐬𑐧𑐷𑐫𑐵𑐟 𑐴𑐵𑐩𑑂𑐩𑐸𑐬𑐧𑐷𑐫𑐵 𑐳𑑄𑐴𑐶𑐟𑐵 𑐖𑐵𑐬𑐷 𑐫𑐵𑑅𑐐𑐸𑐮𑐶𑑄 𑐡𑐎𑐮𑐫𑑂 𑐀𑐥𑑂𑐰 𑐩𑑂𑐴𑐳𑐷𑐎𑐶𑐐𑐸 𑐫𑐵𑑋 𑐠𑑂𑐰 𑐳𑑄𑐴𑐶𑐟𑐵𑐫𑐵𑐟 𑐰𑐫𑑂𑐎𑐮𑑄 𑐧𑐾𑐧𑐶𑐮𑑀𑐣𑐫𑐵 𑐣𑑂𑐫𑐵𑐫𑐫𑐵 𑐡𑑂𑐫𑑅 𑐱𑐩𑐵𑐱𑐥𑐵𑐏𑐾𑑄 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐡𑐵𑐧𑐷 𑐫𑐵𑐣𑐵𑐡𑐶𑐮𑑋 𑐠𑑂𑐰 𑐳𑑄𑐴𑐶𑐟𑐵 𑐳𑑂𑐰𑐫𑐵 𑐣𑑂𑐴𑐵𑐥𑐵𑐫𑐵 𑐳𑐸𑐩𑐾𑐬𑐶𑐫𑐣 𑐎𑐵𑐣𑐹𑐣 𑐳𑑄𑐴𑐶𑐟𑐵 (𑐐𑐠𑐾𑐎𑐶 𑐄𑐬-𑐣𑐵𑐩𑑂𑐩𑐹 𑐳𑑄𑐴𑐶𑐟𑐵)𑐫𑑂 𑐀𑐥𑐬𑐵𑐢𑐫𑐵 𑐥𑐷𑐜𑐶𑐟𑐫𑐵𑐟 𑐎𑑂𑐲𑐟𑐶𑐥𑐹𑐬𑑂𑐟𑐶 𑐧𑐷𑐐𑐸𑐮𑐶𑐂 𑐎𑐾𑐣𑑂𑐡𑑂𑐬𑐶𑐟 𑐖𑐸𑐫𑐵𑐔𑑂𑐰𑐣𑑋 𑐴𑐵𑐩𑑂𑐩𑐸𑐬𑐧𑐷𑐫𑐵 𑐎𑐵𑐣𑐹𑐣𑐫𑑂 𑐢𑐵𑑅𑐳𑐵 𑐀𑐥𑐬𑐵𑐢𑐷𑐫𑐵𑐟 𑐡𑐞𑑂𑐜 𑐰 𑐱𑐵𑐬𑐷𑐬𑐶𑐎 𑐳𑐖𑐵𑐫 𑐧𑐷𑐐𑐸𑐮𑐶𑐂 𑐀𑐥𑑂𑐰𑑅 𑐧𑑅 𑐧𑐶𑐫𑐵𑐟𑐮𑑋 𑐠𑐠𑐾 𑐠𑑂𑐰 𑐳𑑄𑐴𑐶𑐟𑐵 𑐡𑐞𑑂𑐜 𑐧𑐷𑐐𑐸 𑐣𑑂𑐴𑐵𑐥𑐵𑑄𑐐𑐸 𑐎𑐵𑐣𑐹𑐣 𑐳𑑄𑐴𑐶𑐟𑐵𑐫𑑂 𑐕𑐐𑐹 𑐏𑑅𑑋 𑐠𑐸𑐎𑐷 𑐥𑑂𑐬𑐟𑑂𑐫𑐾𑐎 𑐀𑐥𑐬𑐵𑐢𑐫𑐵 𑐣𑐶𑑄𑐟𑐶𑑄 𑐰𑐶𑐱𑐶𑐲𑑂𑐚 𑐳𑐖𑐵𑐫𑐫𑐵 𑐣𑐶𑐬𑑂𑐢𑐵𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸𑐳𑐵 𑐣𑐶𑐬𑑂𑐡𑑀𑐲𑐟𑐵𑐫𑐵 𑐀𑐣𑐸𑐩𑐵𑐣 𑐳𑑂𑐠𑐵𑐥𑐶𑐟 𑐫𑐵𑐫𑐾𑐐𑐸 𑐣𑑂𑐴𑐵𑐥𑐵𑑄𑐐𑐸 𑐳𑑄𑐴𑐶𑐟𑐵𑐫𑑂 𑐮𑐵𑑅𑑋 𑐀𑐣𑑂𑐫𑐵𑐫 𑐖𑐹𑐩𑑂𑐴 𑐩𑐣𑐹𑐫𑐵𑐟 𑐥𑑂𑐬𑐟𑐶𑐱𑑀𑐢𑐫𑐵 𑐬𑐸𑐥𑐫𑑂 𑐕𑐸 𑐫𑐵𑐫𑐾𑐐𑐸 𑐀𑐣𑐸𑐩𑐟𑐶 𑐡𑐸 𑐢𑐿𑐐𑐸 𑐏𑑃 𑐣𑑄 𑐠𑑂𑐰 𑐳𑑄𑐴𑐶𑐟𑐵𑐫𑑂 𑐔𑑂𑐰𑐫𑐵𑐟𑑅𑐐𑐸 𑐡𑐸𑑋 𑐟𑑀𑐬𑐵𑐴𑐫𑑂 𑐡𑐸𑐐𑐸 𑐩𑑀𑐳𑐾𑐳𑐫𑐵 𑐣𑐶𑐫𑐩 𑐰 𑐴𑐵𑐩𑑂𑐩𑐸𑐬𑐧𑐷𑐫𑐵 𑐳𑑄𑐴𑐶𑐟𑐵 𑐫𑐎𑑂𑐰𑑄 𑐖𑑂𑐰𑑅𑐮𑐵𑑅𑐐𑐸 𑐡𑐸𑑋

𑐴𑐵𑐩𑑂𑐩𑐸𑐬𑐵𑐧𑐷𑐫𑐵𑐟 𑐠𑑅𑐐𑐸 𑐴𑐾 𑐖𑐷𑐰𑐣𑐎𑐵𑐮𑐫𑑂 𑐫𑐎𑑂𑐰𑐳𑐶𑐣𑑄 𑐡𑑂𑐫𑑅𑐫𑐵 𑐬𑐸𑐥𑐫𑑂 𑐣𑐵𑐮𑐵𑑅𑐎𑐵𑐮𑑋 𑐰𑐫𑑂𑐎𑑅𑐫𑐵 𑐩𑐺𑐟𑑂𑐫𑐸 𑐢𑐸𑑄𑐎𑐵 𑐴𑐵𑐩𑑂𑐩𑐸𑐬𑐧𑐷𑐫𑐵𑐟 𑐕𑐩𑑂𑐴 𑐩𑐴𑐵𑐣 𑐰𑐶𑐖𑐾𑐟𑐵𑐫𑐵 𑐬𑐸𑐥𑐫𑑂 𑐳𑐩𑑂𑐩𑐵𑐣 𑐫𑐵𑐟𑑋 𑐰𑐫𑑂𑐎𑑅𑐫𑐵𑐟 𑐳𑐨𑑂𑐫𑐟𑐵 𑐣𑑂𑐫𑑄𑐎𑐵𑐡𑐶𑐩𑑂𑐴 𑐰 𑐳𑐎𑐮 𑐖𑐵𑐟𑐶𑐫𑐵𑐟 𑐧𑐾𑐧𑐶𑐮𑑀𑐣𑐶𑐫𑐣𑐟𑐾𑐐𑐸 𑐬𑐵𑐲𑑂𑐚𑑂𑐬𑐶𑐫 𑐡𑑂𑐫𑑅 𑐩𑐬𑑂𑐡𑐸𑐎𑐫𑐵𑐟 𑐩𑐵𑐣𑐾𑐫𑐵𑐫𑐾𑐟 𑐧𑐵𑐢𑑂𑐫 𑐫𑐵𑐩𑑂𑐴 𑐖𑐸𑐖𑐸𑐫𑐵 𑐎𑐠𑑄 𑐩𑑂𑐴𑐳𑐷𑐎𑐮𑑋 𑐮𑐶𑐥𑐵 𑐰𑐫𑑂𑐎𑑅𑐫𑐵 𑐳𑐿𑐣𑑂𑐫 𑐄𑐥𑐮𑐧𑑂𑐢𑐶 𑐳𑑂𑐰𑐫𑐵 𑐣𑑄 𑐰𑐫𑑂𑐎𑑅𑐫𑐵𑐟 𑐣𑑂𑐴𑐵𑐥𑐵𑑄𑐩𑑂𑐴 𑐁𑐡𑐬𑑂𑐱 𑐎𑐵𑐣𑐸𑐣𑐡𑐵𑐟𑐵𑐫𑐵 𑐬𑐸𑐥𑐫𑑂 𑐩𑑂𑐴𑐳𑐷𑐎𑐶𑐐𑐸 𑐖𑐸𑐫𑐵𑐰𑐣𑑋 𑐮𑐶𑐥𑐵𑑄𑐐𑐸 𑐩𑐾𑐳𑑀𑐥𑑀𑐚𑐵𑐩𑐶𑐫𑐵𑐫𑐵 𑐣𑐶𑑄𑐟𑐶𑑄 𑐴𑐵𑐩𑑂𑐩𑐸𑐬𑐧𑐷𑐫𑐵 𑐱𑐵𑐳𑐣𑐎𑐵𑐮 𑐟𑐵𑐥𑐵𑑅𑐐𑐸 𑐀𑐟𑐷𑐟𑐫𑑂 𑐖𑐹𑐐𑐸 𑐳𑐎𑐮 𑐑𑐚𑐣𑐵𑐫𑐵 𑐣𑐶𑑄𑐟𑐶𑑄 𑐳𑐣𑑂𑐡𑐬𑑂𑐨𑐎𑐵𑐮 𑐖𑐹𑐰𑐣𑑋 𑐰𑐫𑑂𑐎𑐮𑑄 𑐡𑐫𑐾𑐎𑐵𑐡𑐷𑐐𑐸 𑐳𑐵𑐩𑑂𑐬𑐵𑐖𑑂𑐫 𑐢𑐬𑐵𑐱𑐵𑐫𑐷 𑐖𑐸𑐂𑐢𑐸𑑄𑐎𑐵 𑐣𑑄 𑐰𑐫𑑂𑐎𑑅𑐫𑐵𑐟 𑐕𑐩𑑂𑐴 𑐣𑐩𑐹𑐣𑐵 𑐱𑐵𑐳𑐎𑐫𑐵 𑐬𑐸𑐥𑐫𑑂 𑐳𑐩𑑂𑐩𑐵𑐣 𑐫𑐵𑐣𑐵𑐟𑐮 𑐰 𑐣𑐶𑐎𑐚 𑐥𑐹𑐬𑑂𑐰𑐫𑐵 𑐫𑐎𑑂𑐰 𑐖𑐸𑐖𑐸𑐟𑐾𑐳𑑄 𑐰𑐫𑑂𑐎𑑅𑐫𑐵𑐟 𑐥𑐸𑐬𑑂𑐏𑐵𑐫𑐵 𑐬𑐸𑐥𑐫𑑂 𑐡𑐵𑐧𑐷 𑐫𑐵𑐟𑑋 𑐴𑐩𑑂𑐩𑐸𑐬𑐵𑐧𑐷𑐫𑐵𑐟 𑐥𑐸𑐬𑐵𑐟𑐟𑑂𑐰𑐰𑐶𑐡𑑂𑐟𑐾𑐳𑑄 𑑑𑑙𑐐𑐹 𑐱𑐟𑐵𑐧𑑂𑐡𑐷𑐫𑐵 𑐀𑐣𑑂𑐟𑐫𑑂 𑐥𑐸𑐣𑑅 𑐮𑐸𑐂𑐎𑐮 𑐰 𑐰𑐫𑐵𑑄 𑐮𑐶𑐥𑐵 𑐎𑐵𑐣𑐹𑐣𑐫𑐵 𑐂𑐟𑐶𑐴𑐵𑐳𑐫𑑂 𑐕𑐩𑑂𑐴 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐰𑑂𑐫𑐎𑑂𑐟𑐶𑐫𑐵 𑐬𑐸𑐥𑐫𑑂 𑐳𑑂𑐠𑐵𑐥𑐶𑐟 𑐖𑐸𑐮𑑋

𑐴𑐵𑐩𑑂𑐩𑐸𑐬𑐧𑐷 𑐳𑑄𑐴𑐶𑐟𑐵

𑐴𑐩𑑂𑐩𑐸𑐬𑐵𑐧𑐷𑐫𑐵 𑐳𑑄𑐴𑐶𑐟𑐵 𑐠𑐷 𑐠𑐷 𑐰𑐶𑐲𑐫𑐫𑐵𑐟 𑐎𑐫𑐵𑑅 𑑒𑑘𑑒 𑐎𑐵𑐣𑐹𑐣𑐫𑐵 𑐳𑑄𑐐𑑂𑐬𑐴 𑐏𑑅𑑋 𑐠𑑂𑐰 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐎𑐵𑐣𑐹𑐣 𑐳𑑄𑐴𑐶𑐟𑐵 𑐩𑐏𑐸𑑋 𑐟𑐬, 𑐀𑐥𑐬𑐵𑐢𑐫𑐵 𑐥𑐷𑐜𑐶𑐟𑐫𑐵𑐟 𑐎𑑂𑐲𑐟𑐶𑐥𑐹𑐬𑑂𑐟𑐶 𑐧𑐷𑐐𑐸𑐮𑐶𑐂 𑐢𑑂𑐫𑐵𑐣 𑐎𑐾𑐣𑑂𑐡𑑂𑐬𑐶𑐟 𑐫𑐵𑐫𑐾𑐐𑐸 𑐥𑐮𑐾𑐳𑐵 𑐀𑐥𑐬𑐵𑐢𑐷𑐫𑐵𑐟 𑐱𑐵𑐬𑐷𑐬𑐶𑐎 𑐳𑐖𑐵𑐫 𑐧𑐷𑐐𑐸𑐮𑐶𑐂 𑐎𑐾𑐣𑑂𑐡𑑂𑐬𑐶𑐟 𑐖𑐹𑐐𑐸𑐮𑐶𑑄 𑐠𑑂𑐰 𑐳𑑄𑐴𑐶𑐟𑐵 𑐰𑐶𑐱𑑂𑐰 𑐬𑐵𑐖𑐣𑐷𑐟𑐶 𑐰 𑐀𑐣𑑂𑐟𑐬𑑂𑐬𑐵𑐲𑑂𑐚𑑂𑐬𑐶𑐫 𑐳𑐩𑑂𑐧𑐣𑑂𑐢𑐫𑑂 𑐀𑐥𑑂𑐰 𑐥𑑂𑐬𑐨𑐵𑐰𑐱𑐵𑐮𑐷 𑐳𑐵𑐧𑐶𑐟 𑐖𑐹𑐐𑐸 𑐳𑑄𑐴𑐶𑐟𑐵 𑐏𑑋 𑐠𑑂𑐰 𑐴𑐵𑐣𑑄 𑐣𑑂𑐴𑐵𑐥𑐵𑑄𑐐𑐸 𑐎𑐵𑐣𑐹𑐣 𑐳𑑄𑐴𑐶𑐟𑐵𑐫𑑂 𑐕𑐐𑐹 𑐏 𑐐𑐸𑐎𑐶𑐮𑐶𑑄 𑐕𑐩𑑂𑐴 𑐀𑐣𑑂𑐫𑐵𑐫 𑐖𑐹𑐩𑑂𑐴 𑐩𑐣𑐸𑐫𑐵𑐟 𑐥𑑂𑐬𑐟𑐶𑐱𑑀𑐢𑐫𑐵 𑐬𑐸𑐥𑐫𑑂 𑐕𑐸 𑐫𑐵𑐫𑐾 𑐡𑐂 𑐢𑐂𑐐𑐸 𑐥𑑂𑐬𑐟𑐶𑐧𑐣𑑂𑐢 𑐟𑑅𑐐𑐸 𑐡𑐸𑑋 𑐠𑑂𑐰 𑐣𑐶𑐬𑑂𑐡𑑀𑐲𑐟𑐵𑐫𑐵 𑐀𑐣𑐸𑐩𑐵𑐣𑐫𑐵 𑐰𑐶𑐔𑐵𑑅 𑐡𑐹𑐐𑐸 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐳𑑄𑐴𑐶𑐟𑐵𑐫𑐵 𑐡𑐳𑐸 𑐏𑑅𑑋 𑐠𑑂𑐰 𑐳𑑄𑐴𑐶𑐟𑐵𑐫𑑂 𑐀𑐨𑐶𑐫𑐸𑐎𑑂𑐟 𑐰 𑐁𑐬𑑀𑐥𑐷𑐫𑐵𑐟 𑐥𑑂𑐬𑐩𑐵𑐞 𑐧𑐷𑐐𑐸 𑐀𑐰𑐳𑐬 𑐧𑐶𑐫𑐵𑐟𑑅𑐐𑐸 𑐡𑐸𑑋 𑐳𑑄𑐴𑐶𑐟𑐵𑐫𑐵 𑐳𑑄𑐬𑐔𑐣𑐵 𑐟𑐳𑐎𑑄 𑐰𑐶𑐱𑐶𑐲𑑂𑐚 𑐡𑐸, 𑐐𑐸𑐎𑐶𑐮𑐶 𑐥𑑂𑐬𑐟𑑂𑐫𑐾𑐎 𑐀𑐥𑐬𑐵𑐢𑐫𑐵𑐟 𑐕𑐐𑐹 𑐣𑐶𑐬𑑂𑐡𑐶𑐲𑑂𑐚 𑐳𑐖𑐵𑐫 𑐧𑐶𑐫𑐵𑐟𑑅𑐐𑐸 𑐡𑐸𑑋 𑐫𑐎𑑂𑐰 𑐀𑐥𑐬𑐵𑐢𑐫𑐵 𑐡𑐞𑑂𑐜 𑐎𑐠𑑄 𑐩𑐺𑐟𑑂𑐫𑐸, 𑐱𑐵𑐬𑐶𑐬𑐶𑐎 𑐎𑑂𑐲𑐟𑐶, 𑐰𑐵 𑐮𑐾𑐎𑑂𑐳 𑐚𑐵𑐮𑐶𑐌𑐣𑐶𑐳 (Lex Talionis) 𑐡𑐬𑑂𑐱𑐣𑐫𑐵 𑐕𑑂𑐫𑐾𑐮𑐾𑐖𑑂𑐫𑐵 (" 𑐩𑐶𑐏𑐵𑐫𑐵 𑐣𑐶𑑄𑐟𑐶𑑄 𑐩𑐶𑐏𑐵, 𑐰𑐵𑐫𑐵 𑐣𑐶𑑄𑐟𑐶𑑄 𑐰𑐵") 𑐕𑑂𑐫𑐮𑐵𑐟𑑅𑐐𑐸 𑐡𑐸𑑋

𑐴𑐵𑐩𑑂𑐩𑐸𑐬𑐧𑐷𑐫𑐵 𑐳𑑄𑐴𑐶𑐟𑐵𑐫𑐵𑐟 𑐕𑐐𑐹 𑐱𑐶𑐮𑐵𑐥𑐟𑑂𑐬𑐫𑑂 𑐔𑑂𑐰𑐫𑐵𑑅 𑐰𑐫𑑂𑐎𑑅𑐫𑐵 𑐬𑐵𑐖𑑂𑐫𑐫𑐵 𑐳𑐵𑐬𑑂𑐰𑐖𑐣𑐶𑐎 𑐠𑐵𑐳𑐫𑑂 𑐳𑐎𑐳𑐶𑐣𑑄 𑐣𑐶𑐫𑐩 𑐳𑑂𑐰𑐫𑐾𑐦𑐎𑑅 𑐟𑑅𑐐𑐸 𑐏𑑅𑑋 𑐫𑐡𑑂𑐫𑐥𑐶 𑐰𑐫𑑂𑐎𑑅𑐫𑐵 𑐱𑐵𑐳𑐣𑐎𑐵𑐮𑐫𑑂 𑐳𑐵𑐎𑑂𑐲𑐬 𑐩𑐣𑐹𑐟 𑐩𑑂𑐴𑑀 𑐖𑐎 𑐡𑐸 𑐢𑐿𑐐𑐸 𑐀𑐣𑐸𑐩𑐵𑐣 𑐡𑐸𑑋 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐮𑐶𑐥𑐵 𑐊𑐮𑐵𑐩𑐶𑐟𑐾𑐳𑑄 𑐮𑐸𑐚𑐾 𑐫𑐵𑐣𑐵 𑐠𑑅𑐐𑐸 𑐬𑐵𑐖𑐢𑐵𑐣𑐷 𑐳𑐸𑐳𑐵𑐫𑑂 𑐫𑑄𑐎𑐮𑑋 𑐮𑐶𑐥𑐵, 𑐳𑐣𑑂 𑑑𑑙𑑐𑑑𑐫𑑂 𑐂𑐬𑐵𑐣𑐫𑑂 𑐠𑑂𑐰 𑐱𑐶𑐮𑐵𑐥𑐟𑑂𑐬 𑐴𑐵𑐎𑐣𑑄 𑐮𑐸𑐫𑐵𑐰𑑅𑐐𑐸 𑐏 𑐰 𑐁𑑅 𑐥𑐾𑐬𑐶𑐳𑐫𑐵 𑐮𑐸𑐨 𑐳𑑄𑐐𑑂𑐬𑐴𑐵𑐮𑐫𑐫𑑂 𑐡𑐸𑑋 𑐴𑐵𑐩𑑂𑐩𑐸𑐬𑐧𑐷𑐫𑐵 𑐳𑑄𑐴𑐶𑐟𑐵𑐫𑑂 𑑒𑑘𑑒𑐐𑐸 𑐣𑐶𑐫𑐩 𑐡𑐸, 𑐐𑐸𑐎𑐶𑐫𑐵𑐟 𑐔𑑂𑐰𑐩𑐶𑐟𑐾𑐳𑑄 𑑑𑑒𑐐𑐸 𑐚𑑂𑐫𑐵𑐧𑑂𑐮𑐾𑐚 (𑐔𑐵𑑅𑐫𑐵 𑐳𑐦𑐹)𑐫𑑂 𑐔𑑂𑐰𑐫𑐵𑐟𑑅𑐐𑐸 𑐡𑐸𑑋 𑐣𑑂𑐴𑐵𑐥𑐵𑐫𑐵 𑐎𑐵𑐣𑐹𑐣 𑐳𑑂𑐰𑐫𑐵 𑐥𑐺𑐠𑐎 𑐠𑑂𑐰 𑐳𑑄𑐴𑐶𑐟𑐵 𑐧𑐾𑐧𑐶𑐮𑑀𑐣𑐫𑐵 𑐣𑑂𑐴𑐶𑐠𑑄𑐫𑐵 𑐨𑐵𑐲𑐵 𑐀𑐎𑑂𑐎𑐵𑐡𑐶𑐫𑐣 𑐨𑐵𑐳𑑄 𑐔𑑂𑐰𑐫𑐵𑐟𑑅𑐐𑐸 𑐏𑑋 𑐀𑐠𑐾 𑐖𑐸𑐫𑐵 𑐠𑑂𑐰 𑐳𑑄𑐴𑐶𑐟𑐵 𑐣𑐐𑐬𑐫𑑂 𑐔𑑂𑐰𑑄𑐩𑑂𑐴 𑐳𑐸𑑄 𑐣𑑄 𑐳𑐵𑐎𑑂𑐲𑐬 𑐩𑐣𑐸𑐏𑑄 𑐧𑑂𑐰𑐣𑐾𑐦𑐟𑑋 𑐠𑑂𑐰 𑐃𑐮𑐾 𑐀𑐎𑑂𑐎𑐵𑐡𑐶𑐫𑐣 𑐨𑐵𑐲𑐵𑑄 𑐳𑐸𑐩𑐾𑐬𑐶𑐫𑐣 𑐨𑐵𑐲𑐵𑐫𑐵 𑐠𑐵𑐳𑐫𑑂 𑐥𑑂𑐬𑐔𑐮𑐶𑐟 𑐨𑐵𑐲𑐵𑐫𑐵 𑐠𑐵𑐫𑑂 𑐎𑐵𑐮, 𑐰 𑐴𑐵𑐩𑑂𑐩𑐸𑐬𑐧𑐷𑑄 𑐨𑐵𑐲𑐵 𑐳𑐸𑐢𑐵𑐬 𑐣𑑂𑐴𑑂𑐫𑐵𑐎𑐵𑑅 𑐀𑐎𑑂𑐎𑐵𑐡𑐶𑐫𑐣 𑐨𑐵𑐲𑐵𑐫𑐵𑐟 𑐠𑑂𑐰 𑐃𑐮𑐾 𑐡𑐎𑐮𑐫𑑂 𑐳𑐵𑐢𑐵𑐬𑐞 𑐨𑐵𑐲𑐵 𑐡𑐫𑐾𑐎𑐮𑑋 𑐱𑐶𑐮𑐵𑐥𑐟𑑂𑐬𑐫𑐵 𑐔𑑂𑐰𑐫𑑂 𑐔𑑂𑐰𑑄𑐐𑐸 𑐕𑐐𑐹 𑐎𑐶𑐥𑐵𑐮𑐫𑑂 𑐴𑐩𑑂𑐩𑐸𑐬𑐵𑐧𑐷𑐫𑐵𑐟 𑐧𑐾𑐧𑐶𑐮𑑀𑐣𑐶𑐫𑐵𑐫𑐵 𑐣𑑂𑐫𑐵𑐫𑐫𑐵 𑐡𑑂𑐫𑑅 𑐱𑐩𑐵𑐱𑐥𑐵𑐏𑐾𑑄 𑐎𑐵𑐣𑐹𑐣 𑐥𑑂𑐬𑐵𑐥𑑂𑐟 𑐖𑐹𑐐𑐸 𑐎𑑂𑐫𑐣𑐵𑐟𑑅𑐐𑐸 𑐡𑐸 𑐰 𑐨𑐹𑐩𑐶𑐎𑐵𑐫𑑂 𑐢𑐫𑐵𑐟𑑅𑐐𑐸 𑐡𑐸 𑐎𑐶 𑐴𑐩𑑂𑐩𑐸𑐬𑐵𑐧𑐷𑐫𑐵𑐟 𑐱𑐩𑐵𑐱𑑄 𑐎𑐵𑐣𑐹𑐣𑐫𑐵𑐟 𑐖𑐣𑐟𑐵𑐫𑐵 𑐣𑑂𑐴𑑂𑐫𑑅𑐣𑐾 𑐴𑐫𑐾𑐟 𑐮𑑂𑐫𑑅𑐐𑐸 𑐏𑑅𑑋

𑐴𑐵𑐩𑑂𑐩𑐸𑐬𑐧𑐷𑐫𑐵𑐟 𑐎𑐵𑐣𑐹𑐣 𑐡𑐫𑐾𑐎𑐷𑐩𑑂𑐴 𑐩𑐣𑐹𑐫𑐵 𑐎𑐠𑑄 𑐣𑐵𑑄𑐖𑐵𑑅𑐐𑐸𑐮𑐶𑑄 𑐰𑐫𑑂𑐎𑑅𑐫𑐵 𑐔𑐶𑐟𑑂𑐬𑐞 𑐴𑐮𑐶𑑄𑐣𑑂𑐫𑑄𑐎𑐫𑐵 𑐎𑐵𑐣𑐹𑐣 𑐨𑐰𑐣𑐫𑑂 𑐏𑐣𑐾𑐡𑐂𑑋 𑐳𑑄𑐫𑐸𑐎𑑂𑐟 𑐬𑐵𑐖𑑂𑐫 𑐀𑐩𑐾𑐬𑐶𑐎𑐵𑐫𑐵 𑐎𑑂𑐫𑐵𑐥𑐶𑐚𑐮𑐫𑑂 𑐔𑑂𑐰𑑄𑐐𑐸 𑐀𑐩𑐾𑐬𑐶𑐎𑐷 𑐥𑑂𑐬𑐟𑐶𑐣𑐶𑐢𑐶𑐳𑐨𑐵𑐫𑐵 𑐔𑐾𑐩𑑂𑐧𑐬𑐫𑑂 𑐩𑐵𑐬𑑂𑐧𑐮𑐫𑐵 𑐧𑐾𑐳-𑐬𑐶𑐮𑐶𑐦𑐫𑑂 𑐔𑐶𑐟𑑂𑐬𑐞 𑐫𑐵𑐣𑐵𑐟𑑅𑐐𑐸 𑑒𑑓 𑐩𑑂𑐴 𑐎𑐵𑐣𑐸𑐣𑐡𑐵𑐟𑐵𑐟 𑐩𑐢𑑂𑐫𑐾 𑐴𑐵𑐩𑑂𑐩𑐸𑐬𑐵𑐧𑐷 𑐣𑑄 𑐕𑐩𑑂𑐴 𑐏𑑅𑑋 𑐊𑐜𑑀𑐮𑑂𑐦 𑐰𑐾𑐣𑐩𑑂𑐫𑐵𑐣𑐫𑐵 𑐕𑐐𑐹 𑐦𑑂𑐬𑐶𑐖(Frieze)𑐫𑑂 "𑐂𑐟𑐶𑐴𑐵𑐳𑐫𑐵 𑐩𑐴𑐵𑐣 𑐎𑐵𑐣𑐹𑐣 𑐡𑐫𑐾𑐎𑐶𑐥𑐶𑑄" 𑐩𑐣𑐹𑐟𑐾𑐐𑐸 𑐩𑐹𑐬𑑂𑐟𑐶𑐂 𑐴𑐵𑐩𑑂𑐩𑐸𑐬𑐧𑐷𑐫𑐵𑐟 𑐔𑐶𑐟𑑂𑐬𑐞 𑐫𑐵𑐣𑐵𑐟𑑅𑐐𑐸 𑐡𑐸𑑋 𑐠𑑂𑐰 𑐦𑑂𑐬𑐶𑐖 𑐀𑐩𑐾𑐬𑐶𑐎𑐷 𑐳𑐬𑑂𑐰𑑀𑐔𑑂𑐔 𑐀𑐡𑐵𑐮𑐟𑐫𑐵 𑐨𑐰𑐣𑐫𑐵 𑐡𑐎𑑂𑐲𑐶𑐞𑐷 𑐥𑑅𑐏𑐵𑐮𑐫𑑂 𑐡𑐸𑑋

𑐳𑑂𑐰𑐫𑐵𑐡𑐶𑐳𑑃

• 𑐩𑐢𑑂𑐫 𑐥𑐹𑐬𑑂𑐰