𑐳𑐶𑐳𑐾𑐬𑑀

𑐳𑐶𑐳𑐾𑐬𑑀
𑐬𑑀𑐩𑐫𑐵 𑐎𑑂𑐫𑐵𑐥𑐶𑐚𑑀𑐮𑐶𑐣 𑐳𑑄𑐐𑑂𑐬𑐴𑐵𑐮𑐫𑐫𑑂 𑐣𑑂𑐴𑐵𑐥𑐵𑑄𑐐𑐸 𑐱𑐟𑐵𑐧𑑂𑐡𑐷 𑐂𑐱𑑂𑐰𑐷𑐫𑐵 𑐳𑐶𑐳𑐾𑐬𑑀𑐫𑐵 𑐩𑐹𑐬𑑂𑐟𑐶
बूगु	𑐖𑑂𑐫𑐵𑐣𑐸𑐰𑐬𑐷 𑑓, 𑐂𑐥𑐹 𑑑𑑐𑑖 𑐊𑐥𑑂𑐬𑐶𑐣𑐩, 𑐂𑐟𑐵𑐮𑐶
मदूगु	𑐡𑐶𑐳𑐾𑐩𑑂𑐧𑐬 𑑗, 𑐂𑐥𑐹 𑑔𑑓 (𑐏𑐸𑐂𑐳𑑂𑐰 𑐰𑐵 𑑖𑑓 𑐡𑑃) 𑐦𑐬𑑂𑐩𑐶𑐫𑐵, 𑐂𑐟𑐵𑐮𑐶 𑐴𑐟𑑂𑐫𑐵 (𑐩𑐵𑐬𑑂𑐎 𑐊𑐣𑑂𑐟𑑀𑐣𑐶𑐫𑐵 𑐁𑐡𑐾𑐱𑐫𑑂)
ज्या	𑐬𑐵𑐖𑐣𑐷𑐟𑐶𑐖𑑂𑐘, 𑐀𑐢𑐶𑐰𑐎𑑂𑐟𑐵, 𑐔𑑂𑐰𑐩𑐶, 𑐏𑑃𑐮𑑂𑐴𑐵𑐣𑐵𑐩𑐶 𑐰𑐵 𑐰𑐎𑑂𑐟𑐵
क्वथापासा	Terentia (79–51 BC) Publilia (46–45 BC)
मचा	Tullia and Cicero Minor
थःथिति	Quintus Tullius Cicero (brother)

𑐩𑐵𑐬𑑂𑐎𑐳 𑐟𑐸𑐮𑐶𑐫𑐳 𑐳𑐶𑐳𑐾𑐬𑑀​​(𑐮𑑂𑐫𑐵𑐚𑐶𑐣 𑐨𑐵𑐳𑐵𑐫𑑂 𑐄𑐔𑑂𑐔𑐵𑐬𑐞 ˈmaːrkʊs ˈtʊlli.ʊs ˈkɪkɛroː) (𑑓 𑐖𑐣𑐰𑐬𑐷 𑑑𑑐𑑖 𑐃𑐳𑐵𑐥𑐹𑐬𑑂𑐰 - 𑑗 𑐜𑐶𑐳𑐾𑐩𑑂𑐧𑐬 𑑔𑑓 𑐃𑐳𑐵𑐥𑐹𑐬𑑂𑐰) 𑐕𑐩𑑂𑐴 𑐬𑑀𑐩𑐣 𑐬𑐵𑐖𑐣𑐷𑐟𑐶𑐖𑑂𑐘, 𑐡𑐵𑐬𑑂𑐱𑐣𑐶𑐎, 𑐀𑐢𑐶𑐰𑐎𑑂𑐟𑐵, 𑐎𑐵𑐣𑐹𑐣 𑐬𑐵𑐖𑑂𑐫𑐰𑐶𑐡𑑂, 𑐔𑑂𑐰𑐩𑐶, 𑐏𑑃𑐮𑑂𑐴𑐵𑐣𑐵𑐩𑐶 (𑐰𑐎𑑂𑐟𑐵), 𑐰𑐶𑐖𑑂𑐘, 𑐡𑐵𑐬𑑂𑐱𑐣𑐶𑐎, 𑐰 𑐥𑑂𑐬𑐵𑐖𑑂𑐘𑐶𑐎 𑐳𑑄𑐡𑐾𑐴𑐰𑐵𑐡𑐷 𑐩𑐣𑐹 𑐏𑑋 𑐰𑐫𑑂𑐎𑐮𑑄 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫𑐫𑐵 𑐥𑐮𑐶𑐳𑑂𑐠𑐵 𑐖𑐸𑐂𑐐𑐸 𑐬𑐵𑐖𑐣𑐷𑐟𑐶𑐎 𑐳𑑄𑐎𑐚𑐫𑐵 𑐂𑐮𑐫𑑂 𑐀𑐥𑑂𑐟𑐶𑐩𑐾𑐟𑐶𑐳 (Optimates) 𑐏𑐮𑑅/𑐳𑐶𑐡𑑂𑐢𑐵𑐣𑑂𑐟𑐫𑐵 𑐥𑐴𑑄 𑐮𑐶𑐣𑐵𑐡𑐶𑐮𑑋 𑐰𑐫𑑂𑐎𑐮𑑄 𑐧𑐫𑐵𑐣𑐧𑐵𑐖𑐷 (rhetoric), 𑐡𑐬𑑂𑐱𑐣 𑐰 𑐬𑐵𑐖𑐣𑐷𑐟𑐶𑐫𑐵 𑐏𑑃𑐫𑑂 𑐰𑑂𑐫𑐵𑐥𑐎 𑐐𑑂𑐬𑐣𑑂𑐠𑐟 𑐔𑑂𑐰𑐫𑐵𑐡𑐷𑐐𑐸 𑐡𑐸𑑋 𑐰𑐫𑑂𑐎𑑅𑐫𑐵𑐟 𑐬𑑀𑐩𑐫𑐵 𑐡𑐎𑐮𑐫𑑂 𑐣𑐵𑑄𑐖𑐵𑑅𑐩𑑂𑐴 𑐰𑐎𑑂𑐟𑐵 𑐰 𑐐𑐡𑑂𑐫 𑐱𑐿𑐮𑐷𑐎𑐵𑐬 𑐰 "𑐳𑐶𑐳𑐾𑐬𑑀𑐣𑐶𑐫𑐣 𑐧𑐫𑐵𑐣𑐧𑐵𑐖𑐷"(Ciceronian rhetoric)𑐫𑐵 𑐥𑐮𑐶𑐳𑑂𑐠𑐵𑐩𑐶𑐫𑐵 𑐎𑐠𑑄 𑐎𑐵𑐫𑐾𑐐𑐸 𑐫𑐵𑑋 𑐳𑐶𑐳𑐾𑐬𑑀𑐫𑐵 𑐱𑐶𑐎𑑂𑐲𑐵 𑐬𑑀𑐩 𑐰 𑐐𑑂𑐬𑐷𑐳𑐫𑑂 𑐖𑐸𑐮𑑋 𑐰𑐫𑑂𑐎𑑅 𑐬𑑀𑐩𑐣 𑐳𑐩𑐵𑐖𑐫𑐵 𑐂𑐎𑑂𑐰𑐵𑐂𑐟𑑂𑐳 (Equites) 𑐰𑐵 𑐀𑐱𑑂𑐰𑐵𑐬𑑀𑐴𑐷 𑐰𑐬𑑂𑐐𑐫𑐵 𑐕𑐐𑐹 𑐟𑑅𑐩𑑂𑐴𑐶 𑐥𑐬𑐶𑐰𑐵𑐬𑑄 𑐰𑑅𑐩𑑂𑐴 𑐏, 𑐰 𑑖𑑓 𑐃𑐳𑐵𑐥𑐹𑐬𑑂𑐰𑐫𑑂 𑐎𑐣𑑂𑐳𑐸𑐮𑐫𑐵 𑐬𑐸𑐥𑐫𑑂 𑐖𑑂𑐫𑐵 𑐫𑐵𑐣𑐵𑐡𑐶𑐮𑑋

𑐰𑐫𑑂𑐎𑐮𑑄 𑐮𑑂𑐫𑐵𑐟𑐶𑐣 𑐨𑐵𑐳𑐵𑐫𑐵 𑐥𑑂𑐬𑐵𑐔𑐷𑐣 𑐰 𑐁𑐢𑐸𑐣𑐶𑐎 𑐣𑐶𑐐𑐸𑐮𑐶𑑄 𑐎𑐵𑐮𑐏𑐞𑑂𑐜𑐫𑑂 𑐫𑐎𑑂𑐰 𑐥𑑂𑐬𑐨𑐵𑐰 𑐟𑑂𑐰𑐟𑐵𑐡𑐶𑐮𑑋 𑐰𑐫𑑂𑐎𑐮𑑄 𑐠𑑅𑐐𑐸 𑐨𑐵𑐳𑐵 𑐮𑑂𑐫𑐵𑐟𑐶𑐣𑐫𑑂 𑐔𑑂𑐰𑐫𑐵𑐡𑐶𑐮 𑐰 𑐰𑐫𑑂𑐎𑑅𑐫𑐵 𑐁𑐥𑐵𑐮𑑄 𑐔𑑂𑐰𑐏𑑃 𑐠𑑁𑑄𑐟𑐎 𑐩𑑂𑐰𑐵𑐣𑐵𑐔𑑂𑐰𑑄𑐐𑐸 𑐡𑐸𑑋 𑐰𑐫𑑂𑐎𑑅𑐫𑐵𑐟 𑐥𑑂𑐬𑐵𑐔𑐷𑐣 𑐰 𑐁𑐢𑐸𑐣𑐶𑐎 𑐣𑐶𑐐𑐸𑐮𑐶𑑄 𑐎𑐵𑐮𑐏𑐞𑑂𑐜𑐫𑐵 𑐔𑑂𑐰𑐩𑐶𑐟𑐾𑐳𑑄 𑐕𑐐𑐹 𑐴𑐾 𑐎𑐠𑑄 𑐥𑑂𑐬𑐱𑑄𑐳𑐵 𑐫𑐵𑐣𑐵𑐟𑑅𑐐𑐸 𑐡𑐸𑑋 𑐳𑐶𑐳𑐾𑐬𑑀𑑄 𑐴𑐾𑐮𑐾𑐣𑐶𑐳𑑂𑐚𑐶𑐎 𑐡𑐬𑑂𑐱𑐣𑐫𑐵 𑐩𑐹 𑐰𑐶𑐢𑐵𑐟𑐾𑐐𑐸 𑐟𑐬𑑂𑐎𑐫𑐵𑐟 𑐮𑑂𑐫𑐵𑐚𑐶𑐣𑐫𑑂 𑐨𑐵𑐫𑑂𑐴𑐶𑐮𑐵𑑅 𑐮𑑂𑐫𑐵𑐚𑐶𑐣 𑐡𑐵𑐬𑑂𑐱𑐣𑐶𑐎 𑐏𑑃𑐐𑑂𑐰𑑅𑐫𑐵 𑐕𑐐𑐹 𑐟𑑅𑐢𑑄𑐐𑐸 𑐨𑐵𑐐 𑐡𑐫𑐾𑐎𑐵𑐡𑐶𑐮𑑋 𑐠𑐠𑐾 𑐫𑐵𑐳𑐾𑑄 𑐰𑐫𑑂𑐎𑐮𑑄 𑐠𑑅𑐐𑐸 𑐨𑐵𑐳𑐵 𑐮𑑂𑐫𑐵𑐟𑐶𑐣𑐫𑐵𑐟 𑐡𑐬𑑂𑐱𑐣𑐫𑐵 𑐏𑑂𑐫𑐮𑐫𑑂 𑐟𑑅𑐩𑐶 𑐫𑐵𑐣𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐡𑐵𑐬𑑂𑐱𑐣𑐶𑐎 𑐨𑐵𑐫𑑂𑐴𑐶𑐮𑐵𑐫𑐵 𑐕𑐸𑑄 𑐡𑐳𑐸𑐂 𑐊𑐨𑐶𑐡𑐾𑐣𑑂𑐳𑐶𑐫𑐵 (evidentia), 𑐖𑐾𑐣𑐾𑐬𑐾𑐟𑐬 (generator), 𑐴𑑂𑐫𑐸𑐩𑐵𑐣𑐶𑐟𑐵𑐳 (humanitas), 𑐂𑐣𑑂𑐦𑐶𑐣𑐶𑐟𑐶𑐫𑑀 (infinitio), 𑐎𑑂𑐰𑐵𑐮𑐶𑐟𑐵𑐳 (qualitas), 𑐎𑑂𑐰𑐵𑐣𑑂𑐟𑐶𑐟𑐵𑐳 (quantitas) 𑐁𑐡𑐶 𑐕𑐸𑑄 𑐮𑐵𑐟𑐶𑐣 𑐨𑐵𑐳𑐵𑐫𑐵 𑐏𑑃𑐐𑑂𑐰𑑅 𑐮𑐵𑑋 𑐠𑑂𑐰 𑐳𑐎𑐮 𑐏𑑃𑐐𑑂𑐰𑑅 𑐐𑑂𑐬𑐷𑐎 𑐡𑐵𑐬𑑂𑐱𑐣𑐶𑐎 𑐏𑑃𑐐𑑂𑐰𑑅𑐫𑐵 𑐨𑐵𑐲𑐶𑐎 𑐀𑐣𑐸𑐰𑐵𑐡𑐫𑐵 𑐮𑐶𑐔𑑂𑐰𑑅𑐫𑐵 𑐎𑐠𑑄 𑐬𑑀𑐩𑐣 𑐨𑐵𑐳𑐫𑑂 𑐰𑐫𑑂𑐎𑐮𑑄 𑐕𑑂𑐫𑐮𑐵𑐡𑐷𑐐𑐸 𑐏𑑅𑑋

𑐰𑐫𑑂𑐎𑑅 𑐕𑐩𑑂𑐴 𑐎𑐸𑐱𑐮 𑐏𑑃𑐮𑑂𑐴𑐵𑐣𑐵𑐩𑐶 (𑐰𑐎𑑂𑐟𑐵) 𑐰 𑐳𑐦𑐮 𑐀𑐢𑐶𑐰𑐎𑑂𑐟𑐵 𑐖𑐸𑐳𑐵𑑄 𑐳𑐶𑐳𑐾𑐬𑑀𑑄 𑐠𑑅𑐐𑐸 𑐬𑐵𑐖𑐣𑐷𑐟𑐶𑐎 𑐖𑐷𑐰𑐣𑐫𑐵𑐟 𑐠𑑅𑐐𑐸 𑐡𑐎𑐮𑐫𑑂 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐄𑐥𑐮𑐧𑑂𑐢𑐶 𑐖𑐹𑐐𑐸 𑐏𑑃 𑐔𑑂𑐰𑐫𑐵𑐡𑐷𑐐𑐸 𑐡𑐸𑑋 𑐰𑐫𑑂𑐎𑑅𑐫𑐵 𑐎𑐣𑑂𑐳𑐸𑐮𑐫𑐵 𑐃𑐮𑐾 𑐴𑐾 𑐎𑑂𑐫𑐵𑐟𑐶𑐮𑐶𑐣 𑐲𑐜𑐫𑐣𑑂𑐟𑑂𑐬𑑄 (Catiline conspiracy) 𑐥𑐶𑐣𑐾𑐫𑐵 𑐱𑐎𑑂𑐟𑐶𑑄 𑐬𑑀𑐩 𑐣𑐐𑐬𑐫𑑂 𑐁𑐎𑑂𑐬𑐩𑐞 𑐫𑐵𑐣𑐵𑑅 𑐳𑐬𑐎𑐵𑐬𑐫𑐵𑐟 𑐎𑑂𑐰𑐠𑐮𑐾𑐐𑐸 𑐎𑐸𑐟𑑅 𑐫𑐵𑐟 𑐰 𑐳𑐶𑐳𑐾𑐬𑑀𑑄 (𑐠𑑅𑐐𑐸 𑐴𑐾 𑐰𑐶𑐰𑐬𑐞𑑄) 𑐥𑑂𑐫𑐩𑑂𑐴 𑐲𑐜𑐫𑐣𑑂𑐟𑑂𑐬𑐎𑐬𑑂𑐟𑐵𑐟𑐾𑐟 𑐰𑐶𑐰𑐵𑐡𑐵𑐳𑑂𑐥𑐡 𑐬𑐸𑐥𑑄 𑐫𑐵𑐎𑐣𑑄 𑐩𑐸𑐡𑑂𑐡𑐵 𑐩𑐟𑑅𑐳𑐾𑑄 𑐩𑐺𑐟𑑂𑐫𑐸𑐡𑐞𑑂𑐜 𑐧𑐶𑐫𑐵𑑅 𑐰𑐶𑐡𑑂𑐬𑑀𑐴𑐫𑐵𑐟 𑐡𑐩𑐣 𑐫𑐵𑐣𑐵𑐡𑐶𑐮𑑋 𑐠𑑂𑐰 𑐖𑑂𑐫𑐵𑐫𑐵 𑐮𑐶𑐔𑑂𑐰𑑅𑐫𑐵 𑐎𑐠𑑄 𑐮𑐶𑐥𑐵 𑐰𑐫𑑂𑐎𑑅 𑐣𑐶𑐬𑑂𑐰𑐵𑐳𑐣𑐫𑑂 𑐰𑐣𑐾𑐩𑐵𑐮𑑋 𑐃𑐳𑐵𑐥𑐹𑐬𑑂𑐰 𑐣𑑂𑐴𑐵𑐥𑐵𑑄𑐐𑐸 𑐱𑐟𑐵𑐧𑑂𑐡𑐷𑐫𑐵 𑐩𑐢𑑂𑐫𑐎𑐵𑐮𑐫𑑂 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫𑐫𑑂 𑐐𑐺𑐴𑐫𑐸𑐡𑑂𑐢 𑐰 𑐖𑐸𑐮𑐶𑐫𑐳 𑐳𑐶𑐖𑐬𑐫𑐵 𑐟𑐵𑐣𑐵𑐱𑐵𑐴𑐷 𑐱𑐵𑐳𑐣𑐫𑐵 𑐥𑐮𑐶𑐳𑑂𑐠𑐵 𑐖𑐸𑐮𑑋 𑐠𑑂𑐰 𑐗𑑂𑐰𑐮𑐫𑑂 𑐳𑐶𑐳𑐾𑐬𑑀𑑄 𑐀𑐥𑑂𑐟𑐶𑐩𑐾𑐟𑐶𑐳 ((Optimates) 𑐏𑐮𑑅𑐫𑐵 𑐳𑐩𑐬𑑂𑐠𑐣 𑐫𑐵𑐣𑐵𑐡𑐶𑐮𑑋 𑐳𑐶𑐖𑐬𑐫𑐵 𑐴𑐟𑑂𑐫𑐵 𑐢𑐸𑑄𑐎𑐵 𑐳𑐶𑐳𑐾𑐬𑑀 𑐮𑐶𑐥𑐵𑐫𑐵 𑐳𑐟𑑂𑐟𑐵 𑐳𑑄𑐑𑐬𑑂𑐲𑐫𑑂 𑐩𑐵𑐬𑑂𑐎 𑐊𑐣𑑂𑐟𑑀𑐣𑐶𑐫𑐵 𑐱𑐟𑑂𑐬𑐸 𑐖𑐸𑐫𑐵𑐡𑐶𑐮𑑋 𑐠𑑂𑐰 𑐴𑐾 𑐗𑑂𑐰𑐮𑐫𑑂 𑐰𑐫𑑂𑐎𑐮𑑄 𑐩𑐵𑐬𑑂𑐎 𑐊𑐣𑑂𑐟𑑀𑐣𑐶𑐫𑐵𑐟 𑐕𑐗𑑂𑐰𑑅 𑐨𑐵𑐲𑐞𑐟𑐾𑐐𑐸 𑐬𑐸𑐥𑐫𑑂 𑐁𑐎𑑂𑐬𑐩𑐞 𑐫𑐵𑐣𑐵𑐡𑐶𑐮𑑋 𑐰𑐫𑑂𑐎𑑅𑐫𑐵𑐟 𑐣𑐶𑐎𑑂𑐰𑑅𑐐𑐸 𑐟𑑂𑐬𑐵𑐂𑐀𑐩𑑂𑐨𑐶𑐬𑐾𑐟(Second Triumvirate) 𑐱𑐵𑐳𑐣𑐎𑐵𑐮𑐫𑑂 𑐬𑐵𑐖𑑂𑐫𑐫𑐵 𑐱𑐟𑑂𑐬𑐸 𑐢𑐎𑐵𑑅 𑐑𑑀𑐲𑐞𑐵 𑐫𑐵𑐟𑑋 𑐠𑑂𑐰 𑐢𑐸𑑄𑐎𑐵 𑐂𑐟𑐵𑐮𑐶𑐫𑐣 𑐥𑑂𑐬𑐵𑐫𑐡𑑂𑐰𑐷𑐥 𑐟𑑂𑐰𑐟𑐵𑐰𑐣𑐾𑐐𑐸 𑐎𑐸𑐟𑑅𑐫𑐵 𑐗𑑂𑐰𑐮𑐫𑑂 𑐰𑐫𑑂𑐎𑑅𑐫𑐵𑐟 𑑔𑑓 𑐃𑐳𑐵𑐥𑐹𑐬𑑂𑐰𑐫𑑂 𑐬𑑀𑐩𑐣 𑐳𑐿𑐣𑐶𑐎𑐟𑐾𑐳𑑄 𑐳𑑂𑐫𑐵𑐣𑐵𑐧𑐶𑐮𑑋 𑐰𑐫𑑂𑐎𑑅𑐫𑐵 𑐩𑐡𑐫𑐾𑐢𑐸𑑄𑐎𑐹𑐐𑐸 𑐮𑑂𑐴𑐵𑑅 𑐰 𑐕𑑂𑐫𑑄 𑐊𑐣𑑂𑐟𑑀𑐣𑐶𑐫𑐵 𑐁𑐡𑐾𑐱𑐫𑑂 𑐀𑐣𑑄𑐮𑐶 𑐬𑑀𑐩𑐫𑐵 𑐬𑑀𑐳𑑂𑐟𑑂𑐬𑐵𑐫𑑂 𑐊𑐣𑑂𑐟𑑀𑐣𑐶𑐫𑐣 𑐰𑐶𑐬𑑀𑐢𑐷𑐟𑐾𑐟 𑐏𑑂𑐫𑐵𑐫𑐾𑐐𑐸 𑐣𑐶𑑄𑐟𑐶𑑄 𑐧𑑂𑐰𑐫𑐵𑐟𑐮𑑋

𑐩𑐢𑑂𑐫𑐎𑐵𑐮𑐫𑑂 𑐥𑐾𑐟𑑂𑐬𑐵𑐬𑑂𑐎𑑄 (Petrarch) 𑐳𑐶𑐳𑐾𑐬𑑀𑐫𑐵 𑐔𑑂𑐰𑐏𑑃 𑐴𑐵𑐣𑑄 𑐮𑐸𑐂𑐎𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐮𑐸𑐫𑐵𑐰𑑅𑐐𑐸 𑐔𑑂𑐰𑐏𑑃𑐫𑐵 𑐁𑐢𑐵𑐬𑐫𑑂 𑑑𑑔𑐐𑐸 𑐱𑐟𑐵𑐧𑑂𑐡𑐷𑐂 𑐳𑐵𑐬𑑂𑐰𑐖𑐣𑐶𑐎 𑐩𑐵𑐩𑐶𑐮𑐵, 𑐩𑐵𑐣𑐰𑐟𑐵𑐰𑐵𑐡 𑐰 𑐱𑐵𑐳𑑂𑐟𑑂𑐬𑐷𑐫 𑐬𑑀𑐩𑐣 𑐟𑐖𑐶𑐮𑐖𑐶𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐣𑑂𑐴𑑂𑐫𑐠𑐣𑑋 𑐥𑑀𑐮𑐶𑐱 𑐂𑐟𑐶𑐴𑐵𑐳𑐎𑐵𑐬 𑐟𑐵𑐡𑐾𑐄𑐖 𑐖𑐶𑐮𑐶𑐣𑑂𑐳𑑂𑐎𑐷(Tadeusz Zieliński)𑐫𑐵 𑐎𑐠𑑄 (𑐫𑐸𑐬𑑀𑐥𑐶𑐫𑐣) 𑐥𑐸𑐣𑐬𑑂𑐖𑐵𑐐𑐬𑐞 𑐳𑐶𑐳𑐾𑐬𑑀𑐫𑐵 𑐥𑐸𑐣𑐬𑐸𑐟𑑂𑐠𑐵𑐣 𑐏 𑐰 𑐰𑐫𑑂𑐎𑑅𑐫𑐵 𑐩𑐵𑐢𑑂𑐫𑐩𑑄 𑐖𑐎 (𑐫𑐸𑐬𑑀𑐥𑐶𑐫𑐣) 𑐱𑐵𑐳𑑂𑐟𑑂𑐬𑐷𑐫 𑐥𑑂𑐬𑐵𑐔𑐷𑐣𑐟𑐵𑐫𑐵 𑐥𑐸𑐣𑐬𑑂𑐖𑐵𑐐𑐬𑐞 𑐖𑐹𑐐𑐸 𑐏𑑋 𑐳𑐶𑐳𑐾𑐬𑑀𑐫𑐵 𑐰𑐶𑐔𑐵𑐬𑐫𑐵 𑐀𑐢𑐶𑐥𑐟𑑂𑐫𑐫𑐵 𑐄𑐟𑑂𑐎𑐬𑑂𑐲 𑑑𑑘𑐐𑐸 𑐱𑐟𑐵𑐧𑑂𑐡𑐷𑐫𑐵 𑐁𑐟𑑂𑐩𑐖𑑂𑐘𑐵𑐣𑐫𑐵 𑐫𑐸𑐐𑐫𑐵 𑐃𑐮𑐾 𑐏𑐣𑐾𑐡𑐟𑑋 𑐰𑐫𑑂𑐎𑑅𑐫𑐵 𑐥𑑂𑐬𑐨𑐵𑐰 𑐁𑐟𑑂𑐩𑐖𑑂𑐘𑐵𑐣𑐫𑐵 𑐀𑐐𑑂𑐬𑐞𑐷 𑐔𑐶𑐣𑑂𑐟𑐎 𑐰 𑐬𑐵𑐖𑐣𑐷𑐟𑐶𑐎 𑐳𑐶𑐡𑑂𑐢𑐵𑐣𑑂𑐟𑐎𑐵𑐬𑐟 𑐡𑐳𑐸 𑐖𑐣 𑐮𑐎, 𑐜𑐾𑐨𑐶𑐜 𑐴𑑂𑐫𑐸𑐩, 𑐩𑑀𑐣𑑂𑐚𑐾𑐳𑑂𑐎𑑂𑐫𑐸 𑐰 𑐊𑐜𑐩𑐞𑑂𑐜 𑐧𑐬𑑂𑐎𑐫𑑂 𑐫𑐎𑑂𑐰 𑐏𑐣𑐾𑐡𑐸𑑋 𑐰𑐫𑑂𑐎𑑅𑐫𑐵 𑐔𑑂𑐰𑐏𑑃 𑐴𑐮𑐶𑑄 𑐟𑐖𑐶𑐮𑐖𑐶𑐂 𑐡𑐎𑐮𑐫𑑂 𑐥𑑂𑐬𑐨𑐵𑐰𑐱𑐵𑐮𑐷 𑐔𑑂𑐰𑐏𑑃𑐟𑐾𑐐𑐸 𑐢𑐮𑐏𑐫𑑂 𑐮𑐵𑑋 𑐰𑐫𑑂𑐎𑑅𑐫𑐵 𑐔𑑂𑐰𑐏𑑃𑐫𑐵𑐟 𑐠𑑁𑑄 𑐣𑑄 𑐬𑑀𑐩𑐣 𑐂𑐟𑐶𑐴𑐵𑐳𑐫𑐵 𑐔𑑂𑐰𑐖𑑂𑐫𑐵 𑐰 𑐳𑑄𑐱𑑀𑐢𑐣𑐫𑐵 𑐣𑐶𑑄𑐟𑐶𑑄 𑐡𑐎𑐮𑐫𑑂 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐥𑑂𑐬𑐵𑐠𑐩𑐶𑐎 𑐮𑐶𑐢𑑄𑐳𑐵𑐫𑐵 𑐎𑐠𑑄 𑐎𑐵𑐫𑐾𑐐𑐸 𑐫𑐵𑑋

𑐖𑐷𑐰𑐣𑐷

𑐳𑐶𑐳𑐾𑐬𑑀𑐫𑐵 𑐖𑐷𑐰𑐣𑐷𑐫𑐵𑐟 𑐠𑐷𑐠𑐷 𑐥𑐎𑑂𑐲𑐟𑐾𑐟 𑐠𑐠𑐾 𑐧𑐵𑐫𑐾𑐕𑐶𑑄:

• 𑐥𑑂𑐬𑐵𑐬𑐩𑑂𑐨𑐶𑐎 𑐖𑐷𑐰𑐣: 𑐩𑐵𑐬𑑂𑐎𑐳 𑐟𑐸𑐮𑐶𑐫𑐳 𑐳𑐶𑐳𑐾𑐬𑑀𑐫𑐵 𑐖𑐣𑑂𑐩 𑐃𑐳𑐵𑐥𑐹𑐬𑑂𑐰 𑑑𑑐𑑖 𑐖𑐣𑐰𑐬𑐷 𑑓 𑐏𑐸𑐣𑑂𑐴𑐸 𑐁𑐬𑑂𑐥𑐶𑐣𑐩𑐫𑑂 𑐖𑐹𑐐𑐸 𑐏𑑅𑑋 𑐰𑐫𑑂𑐎𑑅𑐫𑐵 𑐀𑐧𑐸 𑐕𑐩𑑂𑐴 𑐟𑑅𑐩𑐶𑐩𑑂𑐴 𑐳𑐮𑐩𑐶 (𑐀𑐱𑑂𑐰𑐬𑑀𑐴𑐷) 𑐏𑑅 𑐟𑐬 𑐄𑐳𑐵𑑃𑐫𑑂𑐫𑐵 𑐎𑐵𑐬𑐞𑑄 𑐰𑐫𑑂𑐎𑐮𑑄 𑐳𑐵𑐬𑑂𑐰𑐖𑐣𑐶𑐎 𑐖𑐷𑐰𑐣 𑐣𑑂𑐴𑑂𑐫𑐵𑐎𑐾 𑐩𑐦𑐸𑐟𑑋 𑐰𑐫𑑂𑐎𑑅𑐫𑐵 𑐩𑐵𑑄 𑐴𑐾𑐮𑑂𑐨𑐶𑐫𑐵𑐫𑐵 𑐧𑐵𑐬𑐾𑐫𑑂 𑐫𑐎𑑂𑐰 𑐏𑑃 𑐰𑐬𑑂𑐟𑐩𑐵𑐣𑐫𑑂 𑐩𑐳𑑂𑐫𑐹𑑋 𑐳𑐶𑐳𑐾𑐬𑑀 𑐏𑑃𑐐𑑂𑐰𑑅 𑐰𑐫𑑂𑐎𑑅𑐫𑐵 𑐥𑐵𑐬𑐶𑐰𑐵𑐬𑐶𑐎 𑐣𑐵𑑄 𑐏 𑐐𑐸𑐎𑐶𑐫𑐵 𑐀𑐬𑑂𑐠 𑐣𑐫𑐾𑐐𑐸 𑐔𑐵𑐣𑐵 (cicer) 𑐏𑑅𑑋 𑐥𑑂𑐮𑐸𑐟𑐵𑐬𑑂𑐎𑐫𑐵 𑐎𑐠𑑄 𑐠𑑂𑐰 𑐣𑐵𑑄 𑐰𑐫𑑂𑐎𑑅𑐫𑐵 𑐕𑐩𑑂𑐴 𑐥𑐸𑐬𑑂𑐏𑐵𑐫𑐵 𑐣𑑂𑐴𑐵𑐳𑐫𑑂 𑐔𑐵𑐣𑐵𑐐𑑂𑐰𑑅𑐠𑐾𑑄 𑐣𑑂𑐫𑐵𑑅𑐐𑐸 𑐐𑑂𑐰𑑅 𑐡𑐹𑐐𑐸𑐮𑐶𑑄 𑐰𑑅𑐐𑐸 𑐏𑑋 𑑑𑑕 𑐡𑑃 𑐡𑐸𑐧𑐮𑐫𑑂 𑐰𑐫𑑂𑐎𑐮𑑄 𑐬𑑀𑐩𑐫𑐵 𑐳𑐵𑐩𑐵𑐖𑐶𑐎 𑐫𑐸𑐡𑑂𑐢𑐫𑐵 𑐂𑐮𑐫𑑂 𑐥𑑀𑐩𑑂𑐥𑐾 𑐳𑑂𑐚𑑂𑐬𑐵𑐧𑑀 𑐰 𑐮𑐶𑐥𑐵 𑐳𑐸𑐮𑑂𑐮𑐵𑐫𑐵 𑐀𑐢𑐷𑐣𑐫𑑂 𑐳𑐾𑐰𑐵 𑐫𑐵𑐣𑐵𑐡𑐶𑐮𑑋 𑐰𑐫𑑂𑐎𑑅𑐫𑐵𑐟 𑐰𑐶𑐱𑐾𑐲 𑐫𑐵𑐣𑐵𑑅 𑐥𑐧𑑂𑐮𑐶𑐫𑐳 𑐳𑐸𑐮𑑂𑐥𑐶𑐳𑐶𑐫𑐳 𑐬𑐸𑐦𑐳 (Publius Sulpicius Rufus)𑐫𑐵 𑐰𑐎𑑂𑐟𑐺𑐟𑑂𑐰𑑄 𑐥𑑂𑐬𑐨𑐵𑐰𑐶𑐟 𑐫𑐵𑐟𑑋 𑐰𑐫𑑂𑐎𑐮𑑄 𑐬𑑀𑐩𑐫𑑂 𑐠𑑅𑐐𑐸 𑐀𑐢𑑂𑐫𑐫𑐣𑐫𑐵𑐟 𑐣𑐶𑐬𑐣𑑂𑐟𑐬𑐟𑐵 𑐧𑐶𑐫𑐵𑐡𑐶𑐮 𑐰 𑐰𑐫𑑂𑐎𑐮𑑄 𑐏𑑃𑐮𑑂𑐴𑐵𑐫𑐾𑐖𑑂𑐫𑐵 (𑐧𑐫𑐵𑐣𑐧𑐵𑐖𑐷) 𑐰 𑐡𑐬𑑂𑐱𑐣𑐫𑐵 𑐔𑑂𑐰𑐳𑐸𑐟 𑐔𑑂𑐰𑐫𑐵𑐡𑐶𑐮𑑋
  • 𑐱𑐶𑐎𑑂𑐲𑐵
• 𑐣𑑂𑐴𑐵𑐥𑐵𑐫𑐵 𑐎𑑂𑐫𑐵𑐬𑐶𑐫𑐬
  • 𑐣𑑂𑐴𑐵𑐥𑐵𑑄𑐐𑐸 𑐎𑐵𑐣𑐹𑐣𑐷 𑐐𑐟𑐶𑐰𑐶𑐢𑐶
  • 𑐥𑑂𑐬𑐵𑐬𑐩𑑂𑐨𑐶𑐎 𑐬𑐵𑐖𑐣𑐷𑐟𑐶𑐎 𑐖𑐷𑐰𑐣
• 𑐎𑐣𑑂𑐳𑐸𑐮𑐳𑐶𑐥

𑐎𑑂𑐫𑐵𑐚𑐶𑐮𑐶𑐣𑐬𑐶𑐫𑐣 𑐲𑐜𑐫𑐣𑑂𑐟𑑂𑐬

• 𑐣𑐶𑐬𑑂𑐰𑐵𑐳𑐣 𑐰 𑐮𑐶𑐴𑐵𑑄𑐖𑑂𑐫𑐵
• 𑐳𑐶𑐮𑐶𑐎𑐶𑐫𑐵𑐫𑐵 𑐬𑐵𑐖𑑂𑐫𑐥𑐵𑐮
• 𑐖𑐸𑐮𑐶𑐫𑐳 𑐳𑐶𑐖𑐬𑐫𑐵 𑐐𑐺𑐴𑐫𑐸𑐡𑑂𑐢
• 𑐩𑐵𑐬𑑂𑐎 𑐊𑐣𑑂𑐚𑑀𑐣𑐶𑐫𑐵 𑐰𑐶𑐬𑑀𑐢 𑐰 𑐴𑐟𑑂𑐫𑐵
• 𑐰𑑂𑐫𑐎𑑂𑐟𑐶𑐐𑐟 𑐖𑐷𑐰𑐣 𑐰 𑐕𑐾𑑃𑐖𑑅
• 𑐥𑑂𑐬𑐨𑐵𑐰
  • 𑐔𑑂𑐰𑐏𑑃𑐫𑑂
  • 𑐥𑐸𑐬𑐵𑐟𑐟𑑂𑐰𑐫𑑂
  • 𑐣𑑂𑐴𑑂𑐫𑐠𑐣𑐾𑐧𑐴𑑅𑐐𑐸 𑐎𑐵𑐮𑑂𑐥𑐣𑐶𑐎 𑐔𑐶𑐟𑑂𑐬𑐞𑐫𑑂

𑐔𑑂𑐰𑐏𑑃

𑐡𑐵𑐬𑑂𑐱𑐣𑐶𑐎

𑐳𑐶𑐳𑐾𑐬𑑀𑐫𑐵 𑐡𑐵𑐬𑑂𑐱𑐣𑐶𑐎 𑐔𑑂𑐰𑐏𑑃𑐫𑑂 𑐰𑐬𑑂𑐟𑐩𑐵𑐣𑐫𑑂 𑐩𑐡𑐫𑐾𑐢𑐸𑑄𑐎𑐹𑐐𑐸 𑐴𑐾𑐮𑐾𑐣𑐶𑐳𑑂𑐟𑐶𑐎 (𑐐𑑂𑐬𑐷𑐎) 𑐡𑐵𑐬𑑂𑐱𑐣𑐶𑐎 𑐩𑐹𑐮 𑐳𑐶𑐡𑑂𑐢𑐵𑐣𑑂𑐟𑐫𑐵 𑐮𑐹 𑐏𑐣𑐾𑐡𑐸𑑋 𑐰𑐶𑐱𑐾𑐲 𑐫𑐵𑐣𑐵𑑅 𑐊𑐎𑐾𑐡𑐾𑐩𑐶𑐎𑐵 𑐥𑑂𑐬𑐵𑐔𑐷𑐣 𑐐𑑂𑐬𑐷𑐎 𑐳𑐨𑑂𑐫𑐟𑐵𑐫𑐵 𑐩𑐢𑑂𑐫 𑐊𑐎𑐾𑐜𑐾𑐩𑐷𑐫𑐵 𑐳𑐣𑑂𑐡𑐾𑐴𑐰𑐵𑐡𑐷 𑐢𑐵𑐬𑐫𑐵 𑐔𑑂𑐰𑐏𑑃 𑐏𑑋 𑐳𑐶𑐳𑐾𑐬𑑀𑑄 𑐫𑐎𑑂𑐰 𑐐𑑂𑐬𑐷𑐎 𑐡𑐵𑐬𑑂𑐱𑐣𑐶𑐎 𑐏𑑃𑐐𑑂𑐰𑑅𑐟𑐾𑐟 𑐮𑐵𑐟𑐶𑐣 𑐨𑐵𑐳𑐫𑑂 𑐨𑐵𑐫𑑂𑐴𑐶𑐮𑐵𑐡𑐶𑐮𑑋 𑐡𑐵𑐬𑑂𑐱𑐣𑐶𑐎 𑐰 𑐰𑐿𑐖𑑂𑐘𑐵𑐣𑐶𑐎 𑐀𑐰𑐢𑐵𑐬𑐞𑐵𑐟 𑐠𑐸𑐂𑐎𑐾𑐟 𑐳𑐎𑐮 𑐥𑐵𑐱𑑂𑐔𑐵𑐟𑑂𑐫 𑐨𑐵𑐳𑐫𑑂 𑐕𑑂𑐫𑐾𑐮𑐶𑐐𑐸 𑐏𑑃𑐐𑑂𑐰𑑅 𑐳𑐩𑑂𑐨𑐵𑐰𑑂𑐫 (probable) 𑐰 𑐳𑐩𑑂𑐨𑐵𑐰𑑂𑐫𑐟𑐵 (probability) 𑐏𑑃𑐐𑑂𑐰𑑅𑐫𑐵 𑐰𑐬𑑂𑐟𑐩𑐵𑐣 𑐬𑐸𑐥 𑐐𑑂𑐬𑐷𑐎 𑐨𑐵𑐳𑐫𑑂 𑐡𑐹𑐐𑐸 𑐏𑑃𑐐𑑂𑐰𑑅 πιθανὸς (𑐥𑐶𑐠𑐵𑐣𑑀𑐳 pithanòs)𑐫𑐵 𑐳𑐶𑐳𑐾𑐬𑑀𑐫𑐵 𑐮𑐵𑐟𑐶𑐣 𑐨𑐵𑐳𑐫𑑂 𑐀𑐣𑐸𑐰𑐵𑐡 𑐫𑐵𑐣𑐵𑐡𑐷𑐐𑐸 𑐏𑑃𑐐𑑂𑐰𑑅 𑐥𑑂𑐬𑑀𑐧𑐵𑐧𑐶𑐮𑐶𑐳 (probabilis)𑐫𑐵 𑐠𑐷𑐠𑐷 𑐬𑐸𑐥 𑐏𑑋

𑐰𑐫𑑂𑐎𑑅𑐫𑐵 𑐡𑐶 𑐬𑐾 𑐥𑐧𑑂𑐮𑐶𑐎𑐵 (De re publica) 𑐰 𑐡𑐶 𑐮𑐾𑐖𑐶𑐧𑐳 (De legibus) 𑐣𑐵𑐥𑑄 𑐰𑐫𑑂𑐎𑑅𑐫𑐵 𑐟𑐶𑐩𑐾𑐫𑐳 𑐰 𑐥𑑂𑐬𑑀𑐚𑐵𑐐𑑀𑐬𑐳𑐫𑐵 𑐀𑐣𑐸𑐰𑐵𑐡𑑄 𑐬𑑀𑐩𑐫𑑂 𑐥𑑂𑐮𑐾𑐚𑑀𑐰𑐵𑐡𑐫𑐵 𑐥𑑂𑐬𑐳𑐵𑐬𑐫𑑂 𑐫𑑀𑐐𑐡𑐵𑐣 𑐧𑐶𑐮𑑋

• Academica priora: 𑐊𑐎𑐾𑐜𑐾𑐩𑐶𑐎𑐵 𑐥𑑂𑐬𑐶𑐫𑑀𑐬𑐵 (𑐥𑑂𑐮𑐾𑐚𑑀𑐣𑐶𑐎 𑐊𑐎𑐾𑐜𑐾𑐩𑐷𑐫𑐵 𑐖𑑂𑐘𑐵𑐣 𑐳𑐶𑐡𑑂𑐢𑐵𑐣𑑂𑐟 𑐳𑐦𑐹𑐫𑐵 𑐣𑑂𑐴𑐵𑐥𑐵𑑄𑐐𑐸 𑐩𑐳𑑂𑐫𑑁𑐡𑐵)𑑋
  • Catulus 𑐎𑑂𑐫𑐵𑐚𑐸𑐮𑐳 (𑐏𑑃𑐴𑐵𑐧𑐮𑑂𑐴𑐵), 𑐊𑐎𑐾𑐜𑐾𑐩𑐶𑐎𑐵 𑐥𑑂𑐬𑐶𑐫𑑀𑐬𑐵𑐫𑐵 𑐣𑑂𑐴𑐵𑐥𑐵𑑄𑐐𑐸 𑐧𑑂𑐰, 𑐰𑐬𑑂𑐟𑐩𑐵𑐣𑐫𑑂 𑐩𑐡𑐹𑐐𑐸𑑋
  • Lucullus 𑐮𑐸𑐎𑐸𑐮𑐳 (𑐏𑑃𑐴𑐵𑐧𑐮𑑂𑐴𑐵), 𑐊𑐎𑐾𑐜𑐾𑐩𑐶𑐎𑐵 𑐥𑑂𑐬𑐶𑐫𑑀𑐬𑐵𑐫𑐵 𑐣𑐶𑐐𑐹𑐐𑐸 𑐧𑑂𑐰, 𑐳𑑄𑐬𑐎𑑂𑐲𑐶𑐟𑑋
• Academici libri or Academica posteriora 𑐊𑐎𑐾𑐜𑐾𑐩𑐶𑐳𑐷 𑐮𑐶𑐧𑑂𑐬𑐷 𑐰𑐵 𑐊𑐎𑐾𑐜𑐾𑐩𑐶𑐎𑐵 𑐥𑑀𑐳𑑂𑐚𑐾𑐬𑐶𑐌𑐬𑐵 (𑐥𑑂𑐮𑐾𑐚𑑀𑐣𑐶𑐎 𑐊𑐎𑐾𑐜𑐾𑐩𑐷𑐫𑐵 𑐖𑑂𑐘𑐵𑐣 𑐳𑐶𑐡𑑂𑐢𑐵𑐣𑑂𑐟 𑐐𑑂𑐬𑐣𑑂𑐠𑐫𑐵 𑐮𑐶𑐥𑐵𑑄𑐐𑐸 𑐳𑑄𑐳𑑂𑐎𑐬𑐞, 𑐥𑑂𑐫𑐧𑑂𑐰𑑅 𑐳𑐦𑐸𑐟𑐶𑐂)𑑋
• Cato Maior de senectute 𑐎𑑂𑐫𑐵𑐟𑑀 𑐩𑐵𑐂𑐬 𑐡𑐾 𑐳𑐾𑐣𑐾𑐎𑑂𑐟𑑂𑐫𑐸𑐟 (" 𑐎𑑂𑐫𑐵𑐚𑑀 𑐡 𑐳𑐾𑐣𑑂𑐳𑐬 , 𑐰𑐺𑐡𑑂𑐢𑐵𑐰𑐳𑑂𑐠𑐵𑐫𑑂")𑑋 𑐳𑐶𑐳𑐾𑐬𑑀𑑄 𑑘𑑔 𑐡𑑃𑐫𑐵 𑐎𑑂𑐫𑐵𑐚𑑀 𑐡 𑐳𑐾𑐣𑑂𑐳𑐬𑐫𑐵 𑐎𑐮𑑂𑐥𑐣𑐵 𑐫𑐵𑐳𑐾𑑄 𑐠𑑅𑐐𑐸 𑐥𑐸𑐮𑐵𑑄𑐐𑐸 𑐃𑐫𑐵 𑐣𑑀𑐳𑑂𑐚𑐵𑐮𑑂𑐖𑐶𑐫𑐵 𑐰𑑂𑐫𑐎𑑂𑐟 𑐫𑐵𑐣𑐵𑐡𑐷𑑋 𑐰𑐫𑑂𑐎𑐮𑑄 𑐎𑑂𑐫𑐵𑐟𑑀𑐫𑐵 𑐬𑐸𑐥𑐫𑑂 𑐬𑑀𑐩𑐫𑑂 𑐥𑑂𑐬𑐏𑑂𑐫𑐵𑐟 𑐬𑐵𑐖𑐣𑐷𑐟𑐶𑐖𑑂𑐘𑑄 𑐰𑐺𑐡𑑂𑐢𑐵𑐰𑐳𑑂𑐠𑐵𑐫𑑂 𑐟𑐎 𑐥𑑂𑐬𑐟𑐶𑐲𑑂𑐛𑐵 𑐰 𑐀𑐢𑐶𑐎𑐵𑐬 𑐎𑐵𑐫𑐩 𑐫𑐵𑐫𑐾𑐦𑐸𑐐𑐸 𑐏𑑃 𑐎𑐣𑐵𑐡𑐷𑑋
• Consolatio 𑐎𑐣𑑂𑐳𑑀𑐮𑐵𑐚𑐶𑐌 : 𑐠𑑅 𑐫𑑅𑐩𑑂𑐴 𑐩𑑂𑐴𑑂𑐫𑐵𑐫𑑂 𑐚𑐸𑐮𑐶𑐫𑐵𑐫𑐵 𑐩𑐺𑐟𑑂𑐫𑐸𑐫𑐵𑐟 𑐎𑐫𑐵𑑅 𑐔𑑂𑐰𑐫𑐵𑐟𑑅𑐐𑐸 𑐠𑑅𑐟 𑐳𑐵𑐣𑑂𑐟𑑂𑐰𑐣𑐵 𑐧𑐷𑐐𑐸 𑐳𑐦𑐹, 𑐐𑐸𑐎𑐷 𑐳𑐶𑐳𑐾𑐬𑑀𑑄 𑐳𑐎𑐟𑐵𑑄 𑐏𑑃𑐫𑐵 𑐎𑑂𑐲𑐞𑐶𑐎𑐟𑐵 𑐰 𑐡𑐬𑑂𑐱𑐣𑐫𑐵 𑐩𑐴𑐟𑑂𑐰𑐫𑐵𑐟 𑐧𑐶𑐔𑐵𑑅 𑐫𑐵𑐫𑐾𑐟 𑐁𑐐𑑂𑐬𑐴 𑐫𑐵𑐣𑐵𑐡𑐷𑐐𑐸 𑐡𑐸 𑑋 𑐰𑐬𑑂𑐟𑐩𑐵𑐣𑐫𑑂 𑐩𑐡𑐹𑐐𑐸𑑋
• De Divinatione 𑐡𑐾 𑐡𑐶𑐨𑐶𑐣𑐾𑐳𑐣 ("𑐨𑐰𑐶𑐲𑑂𑐫𑐰𑐵𑐞𑐷𑐂"): 𑐠𑑂𑐰 𑐔𑑂𑐰𑐏𑑃, 𑐳𑐩𑑂𑐨𑐰𑐟𑑅, 𑐳𑐶𑐳𑐾𑐬𑑀𑑄 𑐬𑐔𑐣𑐵 𑐫𑐵𑐣𑐵𑐡𑐷𑐐𑐸 𑐡𑐎𑑂𑐰𑑄 𑐔𑑂𑐰𑐏𑑃 𑐡𑐠𑐸𑐂 𑐡𑐎𑐮𑐫𑑂 𑐩𑑁𑐮𑐶𑐎 𑐔𑑂𑐰𑐏𑑃 𑐏𑑋 𑐰𑐫𑑂𑐎𑐮𑑄 𑐴𑐬𑐸𑐳𑑂𑐥𑐶𑐳𑐷𑐫𑐵 𑐎𑐮𑐵 (art of haruspicy)𑐫𑑂 𑐰𑐶𑐱𑑂𑐰𑐵𑐳 𑐟𑐫𑐾𑐩𑐵𑑅𑐐𑐸 𑐟𑐳𑐎𑑄 𑐳𑑂𑐥𑐲𑑂𑐚 𑐧𑐶𑐔𑐵𑑅 𑐎𑐣𑐶𑑋 𑐰𑐫𑑂𑐎𑐮𑑄 𑐠𑑂𑐰 𑐰𑐶𑐲𑐫𑐫𑑂 𑐳𑑂𑐚𑑀𑐂𑐎𑐟𑐾𑐐𑐸 𑐧𑐶𑐔𑐵𑑅 𑐣𑑄 𑐎𑐣𑐵𑐡𑐷𑐳𑐵𑑄 𑐠𑑂𑐰 𑐳𑐦𑐹𑐟𑐶 𑐳𑐶𑐳𑐾𑐬𑑀𑐫𑐵 𑐬𑑀𑐩𑐣 𑐢𑐵𑐬𑑂𑐩𑐶𑐎 𑐥𑐬𑐩𑑂𑐥𑐬𑐵𑐫𑐵 𑐣𑐵𑐥𑑄𑐫𑐵 𑐳𑑂𑐰𑐵𑐥𑐹 𑐏𑐣𑐾𑐡𑐸 𑐰 𑐂𑐩𑐶𑐐𑐸 𑐢𑐵𑐬𑐞𑐵 𑐥𑑂𑐬𑐟𑐶 𑐣𑐎𑐵𑐬𑐵𑐟𑑂𑐩𑐎 𑐧𑐶𑐔𑐵𑑅 𑐏𑐣𑐾𑐡𑐸𑑋 𑐰𑐫𑑂𑐎𑑅𑐫𑐵 𑐠𑑂𑐰 𑐔𑑂𑐰𑐏𑑃 𑐰 𑐡𑐾 𑐣𑐵𑐔𑐸𑐬𑐵 𑐡𑐾𑐌𑐬𑐩 (De natura deorum)𑐫𑐵 𑐳𑑂𑐰𑑄𑐐𑐸𑐐𑐸 𑐳𑐦𑐹𑐫𑐵 𑐮𑐶𑐢𑑄𑐳𑐵𑐫𑑂 𑐣𑑂𑐴𑐵𑐥𑐵𑑄𑐫𑐵 𑐃𑐳𑐵𑐃𑐟𑐫𑑂𑐳𑑄 𑐧𑐴𑐸𑐂𑐱𑑂𑐰𑐬𑐰𑐵𑐡𑐫𑐵 𑐰𑐶𑐬𑐸𑐡𑑂𑐢 𑐮𑑂𑐰𑐵𑐫𑐾𑐐𑐸 𑐟𑐬𑑂𑐎 𑐥𑐶𑐎𑐵𑐮𑑋
• De finibus bonorum et malorum 𑐡𑐾 𑐦𑐶𑐣𑐶𑐧𑐳 𑐧𑑀𑐣𑑀𑐬𑐩 𑐊𑐟 𑐩𑐵𑐮𑑀𑐬𑐩 ("𑐨𑐶𑑄𑐐𑐸 𑐰 𑐩𑐨𑐶𑑄𑐐𑐸𑐫𑐵 𑐳𑐷𑐩𑐵𑐫𑑂")𑑋 𑐠𑑂𑐰 𑐣𑑂𑐫𑐵𑐐𑐸 𑐳𑐦𑐹𑐫𑐵 𑐏𑑃𑐮𑑂𑐴𑐵𑐧𑐮𑑂𑐴𑐵 𑐏 𑐐𑐸𑐎𑐶𑐮𑐶𑑄 𑐣𑐶𑐐𑐸 𑐥𑑂𑐬𑐵𑐔𑐷𑐣 𑐡𑐬𑑂𑐱𑐣 𑐳𑑂𑐚𑑀𑐂𑐎 𑐰 𑐊𑐥𑐶𑐎𑐸𑐬𑐶𑐫𑐣𑐫𑐵𑐟 𑐢𑑂𑐫𑐵𑐣𑐫𑑂 𑐟𑐫𑐵𑑅 "𑐄𑐔𑑂𑐔𑐟𑐩 𑐨𑐶𑑄 𑐕𑐸 𑐏𑑅?" 𑐢𑐂𑐐𑐸 𑐣𑑂𑐴𑑂𑐫𑐳𑑅𑐫𑐵𑐟 𑐳𑐩𑑂𑐧𑑀𑐢𑐣 𑐫𑐵𑐂𑑋 𑐠𑐸𑐎𑐶𑐮𑐶 𑐠𑑂𑐰 𑐣𑑂𑐴𑑂𑐫𑐳𑑅𑐫𑐵𑐟 𑐎𑑂𑐬𑐩𑐱𑑅 𑐐𑐸𑐞 (virtue) 𑐰 𑐁𑐣𑐣𑑂𑐡 (pleasure)𑐫𑐵 𑐬𑐸𑐥𑐫𑑂 𑐧𑑂𑐰𑐠𑐮𑐵𑐟𑑅𑐐𑐸 𑐡𑐸𑑋
• De Fato 𑐡𑐾 𑐦𑐵𑐟𑑀 ("𑐨𑐵𑐐𑑂𑐫𑐫𑑂"): 𑐥𑐹𑐬𑑂𑐞 𑐬𑐸𑐥𑐫𑑂 𑐩𑐡𑐹𑐐𑐸𑑋 𑐳𑑂𑐚𑑀𑐂𑐎𑐰𑐵𑐡𑐫𑐵 𑐥𑑂𑐬𑑀𑐨𑐶𑐜𑐾𑐣𑑂𑐳𑐶𑐫𑐮 𑐳𑐶𑐡𑑂𑐢𑐵𑐣𑑂𑐟𑐫𑐵𑐟 𑐟𑐬𑑂𑐎𑑋
• De natura deorum 𑐡𑐾 𑐣𑐵𑐔𑐸𑐬𑐵 𑐜𑐾𑐌𑐬𑐩 ("𑐡𑑂𑐫𑑅𑐟𑐾𑐐𑐸 𑐳𑐵𑐬𑐫𑐵 𑐧𑐵𑐬𑐾𑐫𑑂")
• De officiis 𑐡𑐾 𑐀𑐦𑐶𑐳𑐶𑐖 ("𑐎𑐬𑑂𑐟𑐧𑑂𑐫𑐫𑑂")
• Hortensius 𑐴𑑀𑐬𑑂𑐟𑐾𑐣𑑂𑐳𑐶𑐫𑐳
• Paradoxa Stoicorum 𑐥𑐵𑐬𑐵𑐡𑑀𑐎𑑂𑐳𑐵 𑐳𑑂𑐟𑑀𑐂𑐎𑑀𑐬𑐩 (𑐳𑑂𑐟𑑀𑐂𑐎 𑐳𑑂𑐎𑐹𑐮𑐫𑐵 𑐣𑐿𑐟𑐶𑐎 𑐰𑐶𑐬𑑀𑐢𑐵𑐨𑐵𑐳𑐫𑐵𑐟 𑐰𑑂𑐫𑐵𑐏𑑂𑐫𑐵 𑐫𑐵𑐂𑐐𑐸 𑐥𑑂𑐬𑐩𑐾𑐫): 𑐠𑑂𑐰 𑐰𑐎𑑂𑐟𑐺𑐟𑑂𑐰𑐎𑐮𑐵𑐫𑐵 𑐀𑐨𑑂𑐫𑐵𑐳𑐫𑐵 𑐳𑐦𑐹 𑐏, 𑐐𑐸𑐎𑐶𑐫𑐵𑐟 𑐥𑑂𑐬𑐵𑐫𑑅 𑐳𑐩𑐵𑐮𑑀𑐔𑐎𑐟𑐾𑐳𑑄 𑐣𑐶𑐩𑑂𑐣 𑐳𑑂𑐟𑐬𑐫𑐵 𑐢𑐎𑐵𑑅 𑐰𑑂𑐫𑐵𑐏𑑂𑐫𑐵 𑐫𑐵𑐂𑑋
• Tusculanae disputationes 𑐟𑐳𑑂𑐎𑐸𑐮𑐵𑐣𑐾 𑐡𑐶𑐳𑑂𑐥𑑂𑐫𑐸𑐟𑐾𑐳𑐣 ("𑐟𑐳𑑂𑐎𑐸𑐮𑐩𑐫𑑂 𑐏𑑃𑐮𑑂𑐴𑐵𑐧𑐮𑑂𑐴𑐵")
• De re publica 𑐡𑐾 𑐬𑐾 𑐥𑐧𑑂𑐮𑐶𑐎𑐵 ("𑐐𑐞𑐟𑐣𑑂𑐟𑑂𑐬𑐫𑑂"), 𑐥𑑂𑐮𑐾𑐟𑑀𑐫𑐵 𑐬𑐶𑐥𑐮𑑂𑐧𑐶𑐎𑐫𑑂 𑐁𑐢𑐵𑐬𑐶𑐟
• De legibus 𑐡𑐾 𑐮𑐾𑐖𑐶𑐧𑐳 ("𑐎𑐵𑐣𑐹𑐣𑐫𑑂")

𑐳𑑂𑐰𑐫𑐵𑐡𑐶𑐳𑑃

• 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫