𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐂𑐟𑐶𑐴𑐵𑐳

𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑑒𑑐𑐐𑐸 𑐱𑐟𑐵𑐧𑑂𑐡𑐷𑐫𑐵 𑐬𑐵𑐖𑐣𑐿𑐟𑐶𑐎 𑐩𑐵𑐣𑐎𑐶𑐥𑐵

𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑑂 𑐳𑐵𑐩𑐵𑐣𑑂𑐫𑐟𑐫𑐵 𑐐𑑂𑐰𑐵𑐚𑐾𑐩𑐵𑐮𑐵, 𑐧𑐾𑐮𑐶𑐖, 𑐊𑐮 𑐳𑐵𑐮𑑂𑐨𑐵𑐜𑑀𑐬, 𑐴𑑀𑐣𑑂𑐜𑐸𑐬𑐳, 𑐣𑐶𑐎𑐵𑐬𑐵𑐐𑐸𑐁, 𑐎𑑀𑐳𑑂𑐚𑐵𑐬𑐶𑐎𑐵 𑐰 𑐥𑐵𑐣𑐵𑐩𑐵 𑐮𑐵𑑋 𑐠𑑂𑐰 𑐥𑐬𑐶𑐨𑐵𑐲𑐵 𑐁𑐢𑐸𑐣𑐶𑐎 𑐬𑐵𑐖𑐣𑐷𑐟𑐶𑐎 𑐳𑐷𑐩𑐵𑐣𑐵𑐥 𑐖𑑂𑐰𑑅𑐮𑐵𑑅𑑋 𑐩𑐢𑑂𑐫 𑐀𑐩𑐾𑐬𑐶𑐎𑐵 𑐨𑑁𑐐𑑀𑐮𑐶𑐎 𑐬𑐸𑐥𑑄 𑐩𑐾𑐎𑑂𑐳𑐶𑐎𑑀𑐫𑑂 𑐱𑐸𑐬𑐸 𑐖𑐸𑐂, 𑐩𑐾𑐎𑑂𑐳𑐶𑐎𑑀𑐫𑐵 𑐡𑐎𑐮𑐫𑑂 𑐔𑐶𑐧𑑂𑐫𑐵𑑅𑐐𑐸 𑐠𑐵𑐫𑑂 𑐟𑐾𑐴𑐸𑐁𑐣𑑂𑐟𑐾𑐥𑐾𑐎𑐫𑐵 𑐂𑐳𑑂𑐠𑐩𑐳𑐫𑑂, 𑐰 𑐣𑑂𑐴𑐵𑐥𑐵𑐫𑐵 𑐡𑐾𑐫𑑂 𑐫𑐸𑐎𑐵𑐟𑐵𑐣 (𑑑𑑘𑑔𑑑–𑑑𑑘𑑔𑑘) 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐕𑐐𑐹 𑐨𑐵𑐐 𑐏𑑋 𑐩𑐾𑐐𑐸 𑐕𑑂𑐫𑐵𑐎𑑅𑐮𑐫𑑂, 𑐳𑐣𑑂 𑑑𑑙𑑐𑑓𑐂 𑐳𑑂𑐰𑐟𑐣𑑂𑐟𑑂𑐬𑐟𑐵 𑐖𑐸𑐂 𑐣𑑂𑐴𑑂𑐫𑑅 𑐥𑐣𑐵𑐩𑐵 𑐡𑐎𑑂𑐲𑐶𑐞 𑐀𑐩𑐾𑐬𑐶𑐎𑐵𑐫𑐵 𑐕𑐐𑐹 𑐨𑐵𑐐 𑐏, 𑐕𑐵𑐫𑑂 𑐢𑐵𑑅𑐳𑐵 𑐠𑑂𑐰 𑐡𑐾𑐫𑑂 𑐄𑐧𑐶𑐮𑐾 𑐎𑑀𑐮𑐩𑑂𑐧𑐶𑐫𑐵𑐫𑐵 𑐕𑐐𑐹 𑐰𑐶𑐨𑐵𑐐 𑐏𑑋 𑐂𑐮𑐫𑑂 𑐧𑑂𑐫𑐮𑐫𑑂 𑐧𑐾𑐮𑐶𑐖, 𑐳𑐣𑑂 𑑑𑑙𑑘𑑑 𑐟𑐎𑑂𑐎 𑐕𑐐𑐹 𑐧𑐾𑐮𑐵𑐫𑐟𑐷 𑐄𑐥𑐣𑐶𑐰𑐾𑐱 𑐖𑐸𑐫𑐵𑐔𑑂𑐰𑐣, 𑐐𑐣 𑐳𑑂𑐥𑐾𑐣𑐶𑐱𑐫𑐵 𑐥𑐮𑐾𑐳𑐵 𑐀𑑄𑐐𑑂𑐬𑐾𑐖𑐷 𑐨𑐵𑐫𑑂 𑐮𑑂𑐴𑐵𑐂, 𑐰 𑐐𑐣 𑐖𑐣𑐳𑑄𑐏𑑂𑐫𑐵 𑐩𑐹 𑐎𑐠𑑄 𑐀𑐦𑑂𑐬𑐶𑐎𑐷 𑐩𑐹𑐮𑐫𑐵 𑐏𑑋 𑐠𑐣𑐫𑐵 𑐩𑐣𑐹𑐟𑐾𑐟 𑐳𑑂𑐥𑐾𑐣𑐶𑐱 𑐨𑐵𑐲𑐷 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐨𑐵𑐐𑐫𑑂 𑐡𑐸𑐩𑐠𑑂𑐫𑐵𑑅𑑋

𑑑𑑗𑑐𑑐 𑐣𑐶𑐳𑐾𑑄 𑐠𑑁𑑄𑐟𑐎 𑐩𑐢𑑂𑐫 𑐀𑐩𑐾𑐬𑐶𑐎𑐵 𑐰 𑐎𑑂𑐫𑐵𑐬𑐶𑐧𑐶𑐫𑐣𑐫𑐵 𑐬𑐵𑐖𑐣𑐷𑐟𑐶𑐎 𑐰𑐶𑐎𑐵𑐳

𑐟𑐵𑑅𑐴𑐵𑐎𑑅𑐐𑐸 𑐰 𑐔𑐶𑐧𑑂𑐫𑐵𑐐𑐸, 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐳𑑂𑐥𑐲𑑂𑐚 𑐨𑑁𑐐𑑀𑐮𑐶𑐎 𑐎𑐾𑐣𑑂𑐡𑑂𑐬 𑐩𑐡𑐸 𑑋 𑑒𑑐𑐐𑐸 𑐱𑐟𑐵𑐧𑑂𑐡𑐷𑐫𑐵 𑐩𑐢𑑂𑐫 𑐟𑐎𑑂𑐎 𑐠𑐣𑐫𑐵 𑐡𑐾𑐫𑑂𑐟𑐾𑐐𑐸 𑐡𑐠𑐸𑐂 𑐮𑑃 𑐩𑐡𑐸𑐐𑐸𑐮𑐶𑑄 𑐠𑐣𑐫𑐵 𑐡𑐾𑐫𑑂 𑐠𑑅𑐠𑐰𑐫𑑂 𑐀𑐮𑐐 𑐎𑐠𑑄 𑐡𑐫𑐵𑐔𑑂𑐰𑐣, 𑐰 𑐠𑐣 𑐬𑐾𑐮𑐩𑐵𑐬𑑂𑐐𑑄 𑐣𑑄 𑐡𑐾𑐫𑑂 𑐫𑐵𑐟 𑐐𑐧𑐮𑐾𑑄 𑐳𑑂𑐰𑐵𑐣𑐵 𑐩𑐧𑐶𑐮𑑋 𑐄𑐥𑐣𑐶𑐰𑐾𑐱𑐎𑐵𑐮𑐷𑐣 𑐃𑐮𑐾 𑐐𑑂𑐰𑐵𑐚𑐾𑐩𑐵𑐮𑐵 𑐥𑑂𑐬𑐱𑐵𑐳𑐣𑐶𑐎 𑐰 𑐢𑐵𑐬𑑂𑐩𑐶𑐎 𑐎𑐾𑐣𑑂𑐡𑑂𑐬 𑐏; 𑐢𑐵𑐬𑑂𑐩𑐶𑐎𑐎𑐠𑑄 𑐠𑑂𑐰 𑐠𑑂𑐰 𑐴𑐾 𑐀𑐰𑐳𑑂𑐠𑐵 𑐡𑐣𑐶𑑋 𑐟𑐬 𑐫𑐸𑐬𑑀𑐥𑐾𑐮𑐷 𑐳𑑄𑐑 𑐠𑐾𑑄 𑐩𑐢𑑂𑐫 𑐀𑐩𑐾𑐬𑐶𑐎𑐷 𑐬𑐵𑐖𑐣𑐷𑐟𑐶𑐎 𑐳𑑄𑐑 𑐡𑐫𑐾𑐎𑐾𑐐𑐸 𑐎𑐸𑐟𑑅 𑐀𑐳𑐦𑐮 𑐖𑐹𑐐𑐸 𑐡𑐸𑑋 𑐫𑐸𑐬𑑀𑐥𑐶𑐫𑐣 𑐫𑐸𑐣𑐶𑐫𑐣 𑐡𑐸𑐴𑐵𑑄 𑐰𑑄𑐐𑐸 𑐡𑐾𑐫𑑂 𑐟𑐫𑑂𑐎𑐾 𑐬𑐾𑐮𑑄 𑐳𑐷𑐩𑐵𑐥𑐵𑐬 𑐰𑑂𑐫𑐵𑐥𑐎 𑐫𑐵𑐟𑐵𑐫𑐵𑐟 𑐖𑐸𑐂𑐢𑐸𑑄𑐎𑐹𑐐𑐸 𑐡𑐸; 𑐠𑑁𑑄 𑐣𑑄 (𑑒𑑐𑑒𑑑) 𑐟𑐸𑐮𑐣𑐵 𑐫𑐵𑐫𑐾𑐧𑐮𑐫𑑂 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑑂 𑐟𑐳𑐎𑑄 𑐩𑑂𑐴𑑂𑐰 𑐖𑐎 𑐫𑐵𑐟𑐵𑐫𑐵𑐟 𑐡𑐸, 𑐀𑐮𑐾 𑐡𑐾𑐫𑑂 𑐳𑑂𑐰𑐵𑐂𑐐𑐸 𑐬𑐾𑐮 𑐣𑑄 𑐩𑐡𑐸 𑑋

𑐠𑐣𑐫𑐵 𑐡𑐾𑐳𑐫𑑂 𑐀𑐥𑑂𑐰𑑅 𑐰𑐶𑐰𑐶𑐢𑐟𑐵 𑐣𑑄 𑐡𑐸𑑋 𑐕𑐸𑑄 (𑐐𑑂𑐰𑐵𑐚𑐾𑐩𑐵𑐮𑐵)𑐫𑑂 𑐁𑐡𑐶𑐰𑐵𑐳𑐷 𑐰𑐵 𑐩𑐹𑐮 𑐀𑐩𑐾𑐬𑐶𑐎𑐷 𑐖𑐣𑐳𑑄𑐏𑑂𑐫𑐵 𑐫𑐎𑑂𑐰 𑐡𑐸, 𑐩𑐾𑐩𑐾𑐐𑐸 (𑐎𑑀𑐳𑑂𑐚𑐵𑐬𑐶𑐎𑐵)𑐫𑑂 𑐩𑐡𑐸𑑋 𑐕𑐸𑑄 (𑐊𑐮 𑐳𑐵𑐮𑑂𑐨𑐵𑐜𑑀𑐬) 𑐠𑑅𑐐𑐸 𑐥𑑂𑐬𑐱𑐵𑐣𑑂𑐟 𑐟𑐚𑐫𑑂 𑐎𑐾𑐣𑑂𑐡𑑂𑐬𑐶𑐟 𑐖𑐸𑐫𑐵𑐔𑑂𑐰𑑄𑐐𑐸 𑐡𑐸 𑐢𑐵𑑅𑐳𑐵 𑐩𑐾𑐩𑐾𑐐𑐸 (𑐧𑐾𑐮𑐶𑐖, 𑐴𑑀𑐣𑑂𑐜𑐸𑐬𑐳) 𑐎𑑂𑐫𑐵𑐬𑐶𑐧𑐶𑐫𑐣 𑐰𑐵 𑐊𑐚𑐮𑐵𑐣𑑂𑐚𑐶𑐎 𑐟𑐚 𑐀𑐥𑑂𑐰 𑐩𑐴𑐟𑑂𑐟𑑂𑐰𑐥𑐹𑐬𑑂𑐞 𑐖𑐸𑐂𑑋 𑐥𑐣𑐵𑐩𑐵 𑐰 𑐩𑑂𑐴𑑀 𑐖𑐎 𑐐𑑂𑐰𑐵𑐚𑐾𑐩𑐵𑐮𑐵 𑐰 𑐎𑑀𑐳𑑂𑐚𑐵𑐬𑐶𑐎𑐵 𑐣𑐶𑐐𑐸𑐮𑐶𑑄 𑐟𑐚𑑄 𑐩𑐴𑐟𑑂𑐰𑐥𑐹𑐬𑑂𑐞 𑐨𑐹𑐩𑐶𑐎𑐵 𑐩𑑂𑐴𑐶𑐟𑐵𑐔𑑂𑐰𑑄𑐐𑐸 𑐡𑐸 𑑋 𑐕𑐸𑑄 𑐡𑐾𑐳𑐫𑑂 𑐳𑑂𑐠𑐷𑐬 𑐳𑐬𑐎𑐵𑐬 𑐡𑐸 (𑐎𑑀𑐳𑑂𑐚𑐵𑐬𑐶𑐎𑐵), 𑐩𑐾𑐩𑐾𑐐𑐸 𑐡𑐾𑐳𑐫𑑂 𑐩𑐡𑐸 (𑐣𑐶𑐎𑐵𑐬𑐵𑐐𑐸𑐁, 𑐊𑐮 𑐳𑐵𑐮𑑂𑐨𑐵𑐜𑑀𑐬)𑑋 𑐥𑐣𑐵𑐩𑐵 𑐟𑐳𑐎𑑄 𑐀𑐩𑐾𑐬𑐶𑐎𑐷𑐎𑐬𑐞 𑐖𑐹𑐐𑐸 𑐡𑐾𑐫𑑂 𑐏𑑋 𑐠𑐣 𑐀𑐩𑐾𑐬𑐶𑐎𑐷 𑐜𑐮𑐬𑐫𑐵𑐟 𑐠𑑅𑐐𑐸 𑐩𑐸𑐡𑑂𑐬𑐵𑐫𑐵 𑐬𑐸𑐥𑐫𑑂 𑐕𑑂𑐫𑐮𑐶𑐐𑐸 𑐫𑐵𑑋 𑐥𑐣𑐵𑐩𑐵𑐫𑐵 𑐟𑑅𑐢𑑄𑐐𑐸 𑐄𑐡𑑂𑐫𑑀𑐐 𑐰 𑐬𑐵𑐖𑐳𑑂𑐰𑐫𑐵 𑐳𑑂𑐬𑑀𑐟 (𑐣𑐴𑐬) 𑐡𑐸𑑋 𑐣𑐵𑐥𑑄, 𑐠𑑂𑐰 𑐡𑐾𑐳𑐫𑑂 𑐣𑑂𑐴𑐵𑐥𑐵 𑐡𑐹𑐐𑐸 𑐣𑐴𑐬 𑐎𑑂𑐲𑐾𑐟𑑂𑐬𑐫𑐵 𑐀𑐩𑐾𑐬𑐶𑐎𑐷 𑐳𑐿𑐣𑑂𑐫 𑐖𑑂𑐫𑐵𑐎𑐸𑐠𑐶 𑐰 𑐠𑐣 𑐰𑐂𑐐𑐸 𑐠𑐷𑐠𑐷 𑐖𑐴𑐵𑐖 𑐰 𑐩𑐣𑐸𑐟𑐾𑐐𑐸 𑐎𑐵𑐬𑐞𑑄 𑐠𑐣 𑐕𑐐𑐹 𑐖𑐚𑐶𑐮 𑐰𑑂𑐫𑐰𑐳𑑂𑐠𑐵 𑐡𑐸𑑋

𑐩𑐢𑑂𑐫 𑐀𑐩𑐾𑐬𑐶𑐎𑐵 𑐳𑐣𑑂 𑑑𑑘𑑖𑑐 𑐟𑐎𑑂𑐎, 𑐥𑐟𑑂𑐟𑐶𑐫𑐵 𑐬𑐵𑐖𑑂𑐫 𑐎𑑂𑐫𑐣𑐵𑐔𑑂𑐰𑑄𑐐𑐸 𑐡𑐸𑑋

𑐫𑐸𑐬𑑀𑐥𑐶𑐫𑐣 𑐳𑑂𑐰𑐵𑐥𑐹 𑐣𑑂𑐴𑑂𑐫𑑅

𑐎𑑀𑐮𑐩𑑂𑐧𑐳 𑐣𑑂𑐴𑑂𑐫𑑅𑐫𑐵 𑐫𑐸𑐐𑐫𑑂 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐄𑐟𑑂𑐟𑐬𑐷 𑐎𑑂𑐲𑐾𑐟𑑂𑐬𑐫𑑂 𑐩𑐾𑐳𑑀𑐀𑐩𑐾𑐬𑐶𑐎𑐵𑐫𑐵 𑐁𑐡𑐶𑐰𑐵𑐳𑐷𑐟 𑐔𑑂𑐰𑐣𑐵𑐔𑑂𑐰𑑄𑐐𑐸 𑐏𑑋 𑐠𑐸𑐎𑐶𑐮𑐶 𑐡𑐎𑐮𑐫𑑂 𑐣𑐵𑑄𑐖𑐵𑑅𑐥𑐶𑑄 𑐩𑐵𑐫𑐵 𑐖𑐵𑐟𑐶 𑐏𑑋 𑐂𑐩𑐶𑐳𑑄 𑐠𑑂𑐰 𑐎𑑂𑐲𑐾𑐟𑑂𑐬𑐫𑑂 𑐫𑐎𑑂𑐰 𑐣𑐐𑐬 𑐡𑐫𑐾𑐎𑐮𑑋 𑐩𑐾𑐐𑐸 𑐖𑐵𑐟𑐶 𑐊𑐖𑐚𑐾𑐎 𑐏, 𑐳𑐸𑐣𑐵𑑄 𑐕𑐐𑐹 𑐰𑐶𑐱𑐵𑐮 𑐳𑐵𑐩𑑂𑐬𑐵𑐖𑑂𑐫 𑐡𑐫𑐾𑐎𑐮𑑋 𑐥𑐹𑐬𑑂𑐰𑐷 𑐴𑑀𑐣𑑂𑐜𑐸𑐬𑐳, 𑐎𑑂𑐫𑐵𑐬𑐶𑐧𑐶𑐫𑐣 𑐣𑐶𑐎𑐵𑐬𑐵𑐐𑐸𑐁, 𑐎𑑀𑐳𑑂𑐚𑐵𑐬𑐶𑐎𑐵 𑐰 𑐥𑐵𑐣𑐵𑐩𑐵𑐫𑐵 𑐀𑐢𑐶𑐎𑐵𑑄𑐱 𑐨𑐵𑐐𑐫𑐵 𑐎𑑀𑐮𑐩𑑂𑐧𑐳 𑐣𑑂𑐴𑑂𑐫𑑅𑐫𑐵 𑐳𑑄𑐳𑑂𑐎𑐺𑐟𑐶 𑐫𑐸𑐬𑑀𑐥𑐶𑐫𑐣 𑐳𑑂𑐰𑐵𑐥𑐹𑐫𑐵 𑐂𑐮𑐫𑑂 𑐔𑐶𑐧𑐔𑐵𑐣 𑐨𑐵𑐲𑐵𑐫𑐵 𑐥𑑂𑐬𑐢𑐵𑐣𑐟𑐵 𑐡𑐸𑑋 𑐂𑐩𑐶𑐟 𑐕𑐸𑑄 𑐩𑐣𑐸𑐟𑐾𑐳𑑄 𑐳𑐵𑑄𑐳𑑂𑐎𑐺𑐟𑐶𑐎 𑐬𑐸𑐥𑑄 𑐥𑐵𑑅𑐐𑐸 𑐰 𑐂𑐳𑑂𑐠𑐩𑑀-𑐎𑑀𑐮𑐩𑑂𑐧𑐶𑐫𑐵 𑐎𑑂𑐲𑐾𑐟𑑂𑐬𑐫𑐵 𑐥𑐸𑐔𑐮𑐫𑑂 𑐡𑐸𑐠𑑂𑐫𑐵𑐎𑐶𑑋

𑐳𑑂𑐥𑐾𑐣𑐶𑐱 𑐄𑐥𑐣𑐶𑐰𑐾𑐱 𑐫𑐸𑐐

𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑑂 𑑗𑐐𑐸 𑐳𑑂𑐰𑐟𑐣𑑂𑐟𑑂𑐬 𑐡𑐾𑐫𑑂 𑐡𑐸: 𑐧𑐾𑐮𑐶𑐖, 𑐎𑑀𑐳𑑂𑐚𑐵𑐬𑐶𑐎𑐵, 𑐊𑐮 𑐳𑐵𑐮𑑂𑐨𑐵𑐜𑑀𑐬, 𑐐𑑂𑐰𑐵𑐚𑐾𑐩𑐵𑐮𑐵, 𑐴𑑀𑐣𑑂𑐜𑐸𑐬𑐳, 𑐣𑐶𑐎𑐵𑐬𑐵𑐐𑐸𑐁 𑐰 𑐥𑐣𑐵𑐩𑐵 𑐡𑐸𑑋 𑑑𑑖𑐐𑐸 𑐱𑐟𑐵𑐧𑑂𑐡𑐷𑐂 𑐳𑑂𑐥𑐾𑐣𑐶𑐱 𑐰𑐶𑐖𑐫 𑐢𑐸𑑄𑐎𑐵 𑐩𑐢𑑂𑐫 𑐀𑐩𑐾𑐬𑐶𑐎𑐵𑐫𑐵 𑐀𑐥𑑂𑐰 𑐧𑐵𑐳𑐶𑐣𑑂𑐡𑐵𑐟𑐾𑐐𑐸 𑐂𑐟𑐶𑐴𑐵𑐳 𑐳𑐩𑐵𑐣 𑐖𑐸𑐮𑑋 𑐠𑐸𑐎𑐶𑐫𑐵 𑐀𑐥𑐰𑐵𑐡 𑐥𑐱𑑂𑐔𑐶𑐩𑐷 𑐎𑑂𑐫𑐵𑐬𑐶𑐧𑐶𑐫𑐣 𑐎𑑂𑐲𑐾𑐟𑑂𑐬 𑐏, 𑐐𑐸𑐎𑐶𑐫𑐵𑐟 𑐋𑐟𑐶𑐴𑐵𑐳𑐶𑐎 𑐬𑐸𑐥𑐫𑑂 𑐎𑑂𑐫𑐵𑐬𑐶𑐧𑐶𑐫𑐣 𑐟𑐚𑐫𑑂 𑐡𑐸𑐠𑑂𑐫𑐵𑑅𑐐𑐸 𑐡𑐸𑑋 𑐠𑑂𑐰 𑐀𑐥𑐰𑐵𑐡 𑐡𑐸𑐣𑐾 𑐣𑐶𑐐𑐸𑐮𑐶𑑄 𑐀𑐬𑑂𑐢-𑐳𑑂𑐰𑐟𑐣𑑂𑐟𑑂𑐬 𑐁𑐡𑐶𑐰𑐵𑐳𑐷 𑐳𑐩𑐵𑐖, 𑐧𑐶𑐳𑑂𑐫𑐸𑑄 𑐰𑐣𑐵𑐔𑑂𑐰𑑄𑐥𑐶𑑄 𑐡𑐵𑐳 𑐥𑐸𑐔𑑅, 𑐰 𑐠𑐣 𑐥𑐶𑐣𑑄 𑐔𑑂𑐰𑑄𑐰𑑅𑐥𑐶𑑄, 𑐰𑐶𑐱𑐾𑐲 𑐫𑐵𑐣𑐵𑑅 𑐧𑐾𑐮𑐵𑐫𑐟𑐷𑐟 𑐳𑐸𑐣𑐵𑑄 𑐀𑐣𑑂𑐟𑐟𑑅 𑐧𑑂𑐬𑐶𑐚𑐶𑐱 𑐴𑑀𑐣𑑂𑐜𑐸𑐬𑐳 (𑐁𑐢𑐸𑐣𑐶𑐎-𑐡𑐶𑑄𑐫𑐵 𑐬𑐵𑐲𑑂𑐚𑑂𑐬 𑐧𑐾𑐮𑐶𑐖 ) 𑐡𑐫𑐾𑐎𑐮𑑋 𑐧𑐾𑐮𑐶𑐖 𑐕𑐐𑐹 𑐩𑑂𑐴𑑀 𑐖𑐣𑐳𑑄𑐏𑑂𑐫𑐵 𑐡𑐹𑐐𑐸 𑐎𑑂𑐲𑐾𑐟𑑂𑐬 𑐏 𑐐𑐣 𑐧𑐾𑐮𑐵𑐫𑐟𑐷𑐟𑐾𑐳𑑄 𑐩𑐵𑐡𑑂𑐬𑐶𑐡𑐫𑐵 𑐳𑐣𑑂𑐢𑐶𑑄 𑐳𑑂𑐥𑐾𑐣𑑄 𑐧𑐾𑐮𑐵𑐫𑐟𑐫𑐵 𑐀𑐢𑐷𑐣𑐫𑑂 𑐮𑐵𑐎𑐹𑐐𑐸 𑐏𑑋 𑐳𑑂𑐥𑐾𑐣𑑄 𑐧𑐾𑐮𑐵𑐫𑐟𑐷 𑐴𑑀𑐣𑑂𑐜𑐸𑐬𑐳𑐫𑑂 𑐴𑐵𑐎𑐣𑑄 𑐣𑐶𑐫𑐣𑑂𑐟𑑂𑐬𑐞 𑐎𑐵𑐫𑐾 𑐩𑐦𑐹𑐐𑐸𑐮𑐶𑑄 𑐧𑐾𑐮𑐵𑐫𑐟𑐷𑐟𑐫𑐾𑐳𑑄 𑐠𑑂𑐰 𑐡𑐾𑐳𑐫𑑂 𑐧𑐳𑑀𑐧𑐵𑐳 𑐫𑐵𑐣𑐵𑐔𑑂𑐰𑐣 𑐰 𑐀𑐣𑑂𑐟𑐟𑑅 𑐠𑑂𑐰 𑐡𑐾𑐫𑑂 𑐫𑐵𑐟 𑐄𑐥𑐣𑐶𑐰𑐾𑐱 𑐡𑐫𑐾𑐎𑐮𑑋 𑐐𑑂𑐰𑐵𑐚𑐾𑐩𑐵𑐮𑐵𑑄 𑐠𑑅𑐐𑐸 𑐳𑑂𑐰𑐟𑐣𑑂𑐟𑑂𑐬𑐟𑐵 𑐥𑑂𑐬𑐵𑐥𑑂𑐟 𑐫𑐵𑐫𑐾𑐢𑐸𑑄𑐎𑐵, 𑐠𑑂𑐰 𑐡𑐾𑐳𑑄 𑐳𑑂𑐥𑐾𑐣𑐫𑐵 𑐧𑐾𑐮𑐵𑐫𑐟𑐷 𑐴𑑀𑐣𑑂𑐜𑐸𑐬𑐳𑐫𑐵 𑐄𑐟𑑂𑐟𑐬𑐵𑐢𑐶𑐎𑐵𑐬 𑐐𑑂𑐬𑐴𑐞 𑐫𑐵𑐟𑑋 𑐧𑐾𑐮𑐵𑐫𑐟𑐷 𑐴𑑀𑐣𑑂𑐜𑐸𑐬𑐳 𑐟𑑅𑐡𑑃 𑐣𑑂𑐴𑑂𑐫𑑅𑐣𑐶𑐳𑐾𑑄 𑐄𑐥𑐣𑐶𑐰𑐾𑐱 𑐩𑐏𑐸𑐳𑐾𑑄 𑐧𑐾𑐮𑐵𑐫𑐟𑐷 𑐧𑐳𑑂𑐟𑐷 𑐖𑐸𑐫𑐵𑐔𑑂𑐰𑐣 (𑐳𑑂𑐥𑐾𑐣 𑐰 𑐧𑐾𑐮𑐵𑐫𑐟 𑐡𑐠𑐸𑐂 𑐖𑐹𑐐𑐸 𑐳𑐣𑑂𑐢𑐶𑑄 𑐠𑑂𑐰 𑐨𑐹𑐨𑐵𑐐𑐫𑑂 𑐧𑐾𑐮𑐵𑐫𑐟𑐷 𑐄𑐥𑐣𑐶𑐰𑐾𑐱 𑐟𑐫𑐾𑐐𑐸 𑐣𑐶𑐲𑐾𑐢 𑐫𑐵𑑅𑐐𑐸 𑐏𑑅) 𑑋 𑐫𑐎𑑂𑐰 𑐡𑑃𑐫𑐵 𑐰𑐶𑐰𑐵𑐡 𑐢𑐸𑑄𑐎𑐵 𑐐𑑂𑐰𑐵𑐚𑐾𑐩𑐵𑐮𑐵 𑐰 𑐧𑐾𑐮𑐵𑐫𑐟 𑐡𑐠𑐸𑐂 𑐕𑐐𑐹 𑐳𑐣𑑂𑐢𑐶 𑐖𑐸𑐮 𑐐𑐸𑐎𑐶𑐮𑐶 𑐄𑐐𑐸 𑐃𑐫𑐵 𑐐𑑂𑐰𑐵𑐚𑐾𑐩𑐵𑐮𑐵𑐫𑐵 𑐬𑐵𑐲𑑂𑐚𑑂𑐬𑐥𑐟𑐶𑑄 𑐧𑐾𑐮𑐶𑐖𑐫𑐵 𑐩𑐹 𑐨𑐹𑐨𑐵𑐐 (𑐳𑑂𑐥𑐾𑐣 𑐬𑐵𑐖𑑂𑐫𑑄 𑐧𑐾𑐮𑐵𑐫𑐟𑐫𑐵𑐟 𑐧𑑂𑐫𑐹𑐐𑐸) 𑐳𑐣𑑂𑐢𑐶𑐫𑐵𑐟 𑐩𑐵𑐣𑑂𑐫𑐟𑐵 𑐧𑐶𑐮𑑋 𑐠𑑂𑐰 𑐳𑐣𑑂𑐢𑐶 𑐡𑐸𑐣𑐾, 𑐐𑑂𑐰𑐵𑐚𑐾𑐩𑐵𑐮𑐵 𑐳𑐶𑐚𑐷𑑄 𑐧𑑂𑐬𑐶𑐚𑐶𑐱 𑐴𑑀𑐣𑑂𑐜𑐸𑐬𑐳 𑐖𑐸𑐫𑐵 𑐎𑑂𑐫𑐵𑐬𑐶𑐧𑐶𑐫𑐣 𑐳𑐵𑐐𑐬 𑐟𑐎𑑂𑐎 𑐎𑐵𑐬𑑂𑐚 𑐬𑑀𑐜 𑐡𑐫𑐾𑐎𑐾𑐐𑐸 𑐳𑐩𑑂𑐗𑑁𑐟𑐵 𑐣𑑄 𑐖𑐸𑐮𑑋 𑐎𑐵𑐬𑑂𑐚 𑐬𑑀𑐜 𑐐𑐧𑐮𑐾𑑄 𑐩𑐡𑐫𑐾𑐎𑐹𑐐𑐸𑐮𑐶𑑄 𑐐𑑂𑐰𑐵𑐚𑐾𑐩𑐵𑐮𑐵𑑄 𑐳𑐣𑑂𑐢𑐶𑐫𑐵𑐟 𑐱𑐹𑐣𑑂𑐫 𑐑𑑀𑐲𑐞𑐵 𑐫𑐵𑐟 𑑋 𑐧𑑂𑐬𑐶𑐚𑐶𑐱 𑐴𑑀𑐣𑑂𑐜𑐸𑐬𑐳 (𑐧𑐾𑐮𑐵𑐫𑐟𑐷𑐟𑐾𑐳𑑄 𑐧𑑂𑐫𑐸𑐐𑐸 𑐣𑐵𑑄), 𑐰 𑐧𑐾𑐮𑐶𑐖 (𑐳𑑂𑐥𑐾𑐣𑐶𑐱 𑐰 𑐐𑑂𑐰𑐵𑐚𑐾𑐩𑐵𑐮𑐵𑐩𑐶𑐟𑐾𑐳𑑄 𑐧𑑂𑐫𑐹𑐐𑐸 𑐣𑐵𑑄) 𑐢𑐵𑑅𑐐𑐸 𑐠𑐵𑐫𑑂 𑐀𑐣𑑂𑐟𑐟𑑅 𑐳𑐣𑑂 𑑑𑑙𑑘𑑑𑐂 𑐐𑑂𑐬𑐾𑐚 𑐧𑑂𑐬𑐶𑐚𑐾𑐣 𑐳𑑂𑐰𑐫𑐵 𑐳𑑂𑐰𑐟𑐣𑑂𑐟𑑂𑐬𑐟𑐵 𑐥𑑂𑐬𑐵𑐥𑑂𑐟 𑐫𑐵𑐟 𑐰 "𑐧𑐾𑐮𑐶𑐖" 𑐣𑐵𑑄𑐫𑐵 𑐡𑐾𑐫𑑂 𑐖𑐸𑐮𑑋 𑐐𑑂𑐰𑐵𑐚𑐾𑐩𑐵𑐮𑐵𑑄 𑐁𑑅 𑐣𑑄 𑐧𑐾𑐮𑐶𑐖𑐫𑐵 𑐨𑐹𑐨𑐵𑐐𑐫𑐵𑐟 𑐎𑐫𑐵𑑅 𑐰𑐶𑐰𑐵𑐡 𑐫𑐵𑐣𑐵𑐔𑑂𑐰𑑄𑐐𑐸 𑐡𑐸 𑑋

𑑑𑑖𑐐𑐸 𑐱𑐟𑐵𑐧𑑂𑐡𑐷 𑐣𑐶𑐳𑐾𑑄 𑑑𑑘𑑒𑑑 𑐟𑐎𑑂𑐎 𑐩𑐢𑑂𑐫 𑐀𑐩𑐾𑐬𑐶𑐎𑐵𑑄 𑐐𑑂𑐰𑐵𑐚𑐾𑐩𑐵𑐮𑐵𑐫𑐵 𑐎𑑂𑐫𑐵𑐥𑑂𑐚𑐾𑐣𑐳𑐷 𑐖𑐣𑐬𑐮 𑐡𑐫𑐾𑐎𑐮, 𑐐𑐸𑐎𑐶𑐫𑐵𑐟 𑐐𑐸𑐧𑐮𑐾𑑄-𑐐𑐸𑐧𑐮𑐾𑑄 𑐐𑑂𑐰𑐵𑐚𑐾𑐩𑐵𑐮𑐵 𑐬𑐵𑐖𑑂𑐫𑐫𑐵 𑐣𑐵𑐩𑑄 𑐣𑑄 𑐩𑑂𑐴𑐳𑐷𑐎𑐶𑐐𑐸 𑐫𑐵𑑋 𑐠𑑂𑐰 𑐬𑐵𑐖𑑂𑐫 𑐔𑐶𑐫𑐵𑐥𑐵𑐳 𑐬𑐵𑐖𑑂𑐫𑐫𑐵 𑐕𑐐𑐹 𑐨𑐵𑐐 (𑐠𑑁𑑄𑐎𑐣𑑂𑐴𑐫𑑂 𑐩𑐾𑐎𑑂𑐳𑐶𑐎𑑀𑐫𑐵 𑐨𑐵𑐐), 𑐐𑑂𑐰𑐵𑐚𑐾𑐩𑐵𑐮𑐵, 𑐊𑐮 𑐳𑐵𑐮𑑂𑐨𑐵𑐜𑑀𑐬, 𑐴𑑀𑐣𑑂𑐜𑐸𑐬𑐳, 𑐣𑐶𑐎𑐵𑐬𑐵𑐐𑐸𑐁 𑐰 𑐎𑑀𑐳𑑂𑐚𑐵𑐬𑐶𑐎𑐵𑑄 𑐡𑐫𑐾𑐎𑐮𑑋 𑐁𑐢𑐶𑐎𑐵𑐬𑐶𑐎 𑐬𑐸𑐥𑑄, 𑐎𑑂𑐫𑐵𑐥𑑂𑐚𑐾𑐣𑐳𑐷 𑐣𑑂𑐫𑐹 𑐳𑑂𑐥𑐾𑐣𑐫𑐵 𑐄𑐥𑐬𑐵𑐖𑐥𑐬𑐶𑐰𑐵𑐬𑐫𑐵 𑐕𑐐𑐹 𑐨𑐵𑐐 𑐏 𑐰 𑐄𑐎𑐶𑑄 𑐩𑐾𑐎𑑂𑐳𑐶𑐎𑑀 𑐳𑐶𑐚𑐷𑐂 𑐳𑑂𑐥𑐾𑐣𑐶𑐱 𑐨𑐵𑐂𑐳𑐾𑐬𑑀𑐫𑐫𑐵 𑐥𑐬𑑂𑐫𑐰𑐾𑐎𑑂𑐲𑐞𑐫𑑂 𑐮𑐵𑑋 𑐀𑐠𑐾 𑐖𑐸𑐳𑐵𑑄, 𑐨𑐵𑐂𑐳𑐾𑐬𑑀𑐫 𑐰𑐵 𑐰𑐫𑑂𑐎𑑅𑐫𑐵 𑐡𑐾𑐥𑐸𑐟𑐶𑐟𑐾𑐳𑑄 𑐥𑑂𑐬𑐱𑐵𑐳𑐣 𑐩𑐖𑐸𑐳𑐾𑑄 𑐳𑑂𑐰𑐟𑐣𑑂𑐟𑑂𑐬 𑐬𑐸𑐥𑑄 𑐣𑐶𑐫𑐸𑐎𑑂𑐟 𑐎𑑂𑐫𑐵𑐥𑑂𑐚𑐾𑐣 𑐖𑐣𑐬𑐮𑑄 𑐣𑑂𑐴𑐵𑐥𑐵 𑐊𑐣𑑂𑐚𑐶𑐐𑐸𑐁𑐫𑑂 𑐰 𑐮𑐶𑐥𑐵 𑐐𑑂𑐰𑐵𑐚𑐾𑐩𑐵𑐮𑐵 𑐳𑐶𑐚𑐷𑐂 𑐩𑐸𑐏𑑂𑐫𑐵𑐮𑐫𑑄 𑐳𑑄𑐔𑐵𑐮𑐣 𑐖𑐸𑐮𑑋

𑐳𑑂𑐰𑐫𑐵𑐡𑐶𑐳𑑃

• 𑐩𑐢𑑂𑐫 𑐀𑐩𑐾𑐬𑐶𑐎𑐵