𑐡𑐸𑐳𑐶𑐎𑐵

𑐡𑐸𑐳𑐶𑐎𑐵 𑐰𑐵 𑐰𑐶𑐖𑑂𑐘𑐵𑐣 𑐰𑐶𑐔𑐵𑑅, 𑐀𑐰𑐮𑑀𑐎𑐣, 𑐀𑐢𑑂𑐫𑐫𑐣, 𑐰 𑐥𑑂𑐬𑐫𑑀𑐐𑐫𑑂 𑐁𑐢𑐵𑐬𑐶𑐟 𑐕𑐐𑐹 𑐰𑑂𑐫𑐰𑐳𑑂𑐠𑐶𑐟 𑐖𑑂𑐘𑐵𑐣 𑐰𑐵 𑐰𑐶𑐡𑑂𑐫𑐵 𑐏𑑋 𑐡𑐸𑐳𑐶𑐎𑐵𑐫𑑂 𑐕𑐸𑑄 𑐣𑑄 𑐰𑐶𑐲𑐫𑐫𑐵 𑐥𑑂𑐬𑐎𑐺𑐟𑐶 𑐠𑐸𑐂𑐎𑐵 𑐰 𑐥𑑂𑐬𑐎𑐺𑐟𑐶𑐫𑐵 𑐳𑐶𑐡𑑂𑐢𑐵𑐣𑑂𑐟 𑐡𑐫𑐾𑐎𑐶𑐐𑐸 𑐖𑐸𑐂𑑋 𑐡𑐸𑐳𑐶𑐎𑐵 𑐏𑑃𑐐𑑂𑐰𑑅𑐫𑐵 𑐕𑑂𑐫𑐾𑐮𑐵 𑐳𑐶𑐎𑐾𑐐𑐸 𑐖𑑂𑐫𑐵𑐫𑐵 𑐠𑐣𑑂𑐫𑐵𑑅𑐐𑐸 𑐎𑐔𑐵𑐫𑐵 𑐣𑐶𑑄𑐟𑐶𑑄 𑐫𑐵𑐫𑐾𑐕𑐶𑑄 𑐐𑐸𑐎𑐶𑐮𑐶 𑐟𑐠𑑂𑐫, 𑐳𑐶𑐡𑑂𑐢𑐵𑐣𑑂𑐟, 𑐥𑐡𑑂𑐢𑐟𑐶 𑐰 𑐥𑑂𑐬𑐫𑑀𑐐𑐫𑐵 𑐁𑐢𑐵𑐬𑐫𑑂 𑐕𑐐𑐹 𑐰𑑂𑐫𑐰𑐳𑑂𑐠𑐶𑐟 𑐖𑑂𑐘𑐵𑐣𑐫𑐵 𑐥𑐮𑐶𑐳𑑂𑐠𑐵 𑐖𑐸𑐂𑑋 𑐠𑑂𑐰 𑐎𑐠𑑄 𑐢𑐵𑐫𑐾𑐕𑐶𑑄 𑐎𑐶 𑐣𑑂𑐴𑑂𑐫𑐵𑑅𑐐𑐸 𑐣𑑄 𑐰𑐶𑐲𑐫𑐫𑐵 𑐰𑑂𑐫𑐰𑐳𑑂𑐠𑐶𑐟 𑐖𑑂𑐘𑐵𑐣 𑐴𑐾 𑐡𑐸𑐳𑐶𑐎𑐵 𑐏𑑋 𑐁𑐢𑐸𑐣𑐶𑐎 𑐡𑐸𑐳𑐶𑐎𑐵𑐫𑐵𑐟 𑐳𑐵𑐩𑐵𑐣𑑂𑐫𑐟𑐫𑐵 𑐣𑐶𑐐𑐸 𑐰𑐵 𑐳𑑂𑐰𑑄𑐐𑐸 𑐩𑐹 𑐱𑐵𑐏𑐵𑐫𑑂 𑐧𑐵𑐫𑐵𑐟𑑅𑐐𑐸 𑐡𑐸: 𑐥𑑂𑐬𑐵𑐎𑐺𑐟𑐶𑐎 𑐡𑐸𑐳𑐶𑐎𑐵 (𑐡𑐳𑐸: 𑐨𑑁𑐟𑐶𑐎 𑐱𑐵𑐳𑑂𑐟𑑂𑐬 , 𑐬𑐳𑐵𑐫𑐣 𑐱𑐵𑐳𑑂𑐟𑑂𑐬, 𑐰 𑐖𑐷𑐰 𑐰𑐶𑐖𑑂𑐘𑐵𑐣), 𑐐𑐸𑐎𑐶𑐮𑐶𑑄 𑐨𑑁𑐟𑐶𑐎 𑐴𑐮𑐶𑑄𑐫𑐵 𑐀𑐢𑑂𑐫𑐫𑐣 𑐫𑐵𑐂; 𑐰 𑐰𑑂𑐫𑐰𑐴𑐵𑐬 𑐰𑐶𑐖𑑂𑐘𑐵𑐣 (𑐡𑐳𑐸, 𑐀𑐬𑑂𑐠𑐱𑐵𑐳𑑂𑐟𑑂𑐬 , 𑐩𑐣𑑀𑐰𑐶𑐖𑑂𑐘𑐵𑐣 , 𑐰 𑐳𑐩𑐵𑐖𑐱𑐵𑐳𑑂𑐟𑑂𑐬 ), 𑐐𑐸𑐎𑐶𑐮𑐶𑑄 𑐰𑑂𑐫𑐎𑑂𑐟𑐶 𑐰 𑐳𑐩𑐵𑐖𑐫𑐵 𑐀𑐢𑑂𑐫𑐫𑐣 𑐫𑐵𑐂𑑋 𑐍𑐥𑐔𑐵𑐬𑐶𑐎 𑐰𑐶𑐖𑑂𑐘𑐵𑐣 (𑐡𑐳𑐸, 𑐟𑐬𑑂𑐎, 𑐐𑐞𑐶𑐟, 𑐰 𑐳𑐿𑐡𑑂𑐢𑐵𑐣𑑂𑐟𑐶𑐎 𑐎𑐩𑑂𑐥𑑂𑐫𑐸𑐚𑐬 𑐰𑐶𑐖𑑂𑐘𑐵𑐣), 𑐐𑐸𑐎𑐶𑐮𑐶𑑄 𑐳𑑂𑐰𑐫𑑄𑐳𑐶𑐡𑑂𑐢 𑐰 𑐣𑐶𑐫𑐩𑑄 𑐱𑐵𑐳𑐶𑐟 𑐍𑐥𑐔𑐵𑐬𑐶𑐎 𑐥𑑂𑐬𑐞𑐵𑐮𑐷𑐫𑐵 𑐀𑐢𑑂𑐫𑐫𑐣 𑐫𑐵𑐂, 𑐐𑐧𑐮𑐾𑑄-𑐐𑐧𑐮𑐾𑑄 𑐡𑐸𑐳𑐶𑐎𑐵𑐫𑐵 𑐬𑐸𑐥𑐫𑑂 𑐣𑑄 𑐰𑐬𑑂𑐞𑐣 𑐫𑐵𑐣𑐵𑐟𑑅𑐐𑐸 𑐡𑐸; 𑐟𑐬 𑐂𑐩𑐶𑐟 𑐥𑑂𑐬𑐵𑐫𑑅 𑐕𑐐𑐹 𑐧𑐶𑐳𑑂𑐎𑑄 𑐏𑑂𑐫𑑅𑐫𑐵 𑐬𑐸𑐥𑐫𑑂 𑐎𑐵𑐫𑐾𑐐𑐸 𑐫𑐵 𑐕𑐵𑐫𑑂 𑐢𑐵𑑅𑐳𑐵 𑐂𑐩𑐶𑐳𑑄 𑐠𑑅𑐐𑐸 𑐩𑐹 𑐥𑐡𑑂𑐢𑐟𑐶𑐫𑐵 𑐬𑐸𑐥𑐫𑑂 𑐰𑐿𑐖𑑂𑐘𑐵𑐣𑐶𑐎 𑐥𑐡𑑂𑐢𑐟𑐶(scientific method) 𑐰𑐵 𑐀𑐣𑐸𑐨𑐰𑐖𑐣𑑂𑐫 𑐥𑑂𑐬𑐩𑐵𑐞𑐫𑐵(empirical evidence) 𑐥𑐮𑐾𑐳𑐵 𑐣𑐶𑐐𑐩𑐣𑐵𑐟𑑂𑐩𑐎 𑐟𑐬𑑂𑐎 (deductive reasoning)𑐫𑑂 𑐣𑐶𑐬𑑂𑐨𑐬 𑐖𑐸𑐂𑑋 𑐰𑑂𑐫𑐰𑐴𑐵𑐬𑐶𑐎 𑐡𑐸𑐳𑐶𑐎𑐵 𑐰𑐵 𑐀𑐣𑐸𑐥𑑂𑐬𑐫𑐸𑐎𑑂𑐟 𑐰𑐶𑐖𑑂𑐘𑐵𑐣 (Applied sciences) 𑐰𑐿𑐖𑑂𑐘𑐵𑐣𑐶𑐎 𑐖𑑂𑐘𑐵𑐣𑐫𑐵𑐟 𑐰𑑂𑐫𑐵𑐰𑐴𑐵𑐬𑐶𑐎 𑐄𑐡𑑂𑐡𑐾𑐱𑑂𑐫𑐫𑐵 𑐣𑐶𑑄𑐟𑐶𑑄 𑐕𑑂𑐫𑐾𑐮𑐶𑐐𑐸 𑐰𑐶𑐲𑐫 𑐏, 𑐡𑐳𑐸 𑐂𑐣𑑂𑐖𑐶𑐣𑐶𑐫𑐬𑐶𑐒 𑐰 𑐔𑐶𑐎𑐶𑐟𑑂𑐳𑐵𑑋

𑐡𑐸𑐳𑐶𑐎𑐵 𑐋𑐟𑐶𑐴𑐵𑐳𑐶𑐎 𑐀𑐨𑐶𑐮𑐾𑐏𑐫𑐵 𑐀𑐢𑐶𑐎𑐵𑑄𑐱 𑐎𑐵𑐮𑐏𑐞𑑂𑐜𑐫𑑂 𑐏𑐣𑐾𑐡𑐸𑑋 𑐁𑐢𑐸𑐣𑐶𑐎 𑐡𑐸𑐳𑐶𑐎𑐵𑐫𑐵 𑐩𑑂𑐴𑐳𑐷𑐎𑐾𑐦𑐂𑐐𑐸 𑐥𑐹𑐬𑑂𑐰𑐰𑐬𑑂𑐟𑐷 𑐏𑑂𑐫𑑅𑐟𑐾𑐐𑐸 𑐡𑐎𑐮𑐫𑑂 𑐣𑑂𑐴𑐵𑐥𑐵𑑄𑐐𑐸 𑐔𑑂𑐰𑐫𑐵𑐟𑑅𑐐𑐸 𑐀𑐨𑐶𑐮𑐾𑐏 𑐎𑑃𑐫𑑂 𑐫𑐸𑐐𑐫𑐵 𑐥𑑂𑐬𑐵𑐔𑐷𑐣 𑐩𑐶𑐳𑑂𑐬 𑐰 𑐩𑐾𑐳𑑀𑐥𑑀𑐚𑐵𑐩𑐶𑐫𑐵𑐫𑐵 𑐎𑐬𑐶𑐧 𑑓𑑐𑑐𑑐 𑐣𑐶𑐳𑐾𑑄 𑑑𑑒𑑐𑑐 𑐃𑐳𑐵𑐥𑐹𑐬𑑂𑐰𑐫𑑂 𑐏𑐣𑐾𑐡𑐸𑑋 𑐐𑐞𑐶𑐟, 𑐏𑐐𑑀𑐮𑐱𑐵𑐳𑑂𑐟𑑂𑐬 𑐰 𑐔𑐶𑐎𑐶𑐟𑑂𑐳𑐵𑐫𑑂 𑐂𑐩𑐶𑐐𑐸 𑐫𑑀𑐐𑐡𑐵𑐣𑑄 𑐱𑐵𑐳𑑂𑐟𑑂𑐬𑐷𑐫 𑐥𑑂𑐬𑐵𑐔𑐷𑐣 𑐎𑐵𑐮𑐫𑐵 𑐐𑑂𑐬𑐷𑐎 𑐥𑑂𑐬𑐵𑐎𑐺𑐟𑐶𑐎 𑐡𑐬𑑂𑐱𑐣𑐫𑑂 𑐡𑐸𑐠𑑂𑐫𑐵𑑅𑐟 𑐰 𑐠𑐸𑐎𑐶𑐫𑐵𑐟 𑐕𑐐𑐹 𑐳𑑂𑐰𑐬𑐸𑐥 𑐧𑐶𑐮𑑋 𑐠𑐸𑐎𑐶𑐮𑐶𑑄 𑐥𑑂𑐬𑐵𑐎𑐺𑐟𑐶𑐎 𑐎𑐵𑐬𑐞𑐫𑐵 𑐁𑐢𑐵𑐬𑐫𑑂 𑐨𑑁𑐟𑐶𑐎 𑐴𑐮𑐶𑐩𑐫𑑂 𑐖𑐸𑐂𑐐𑐸 𑐑𑐚𑐣𑐵𑐫𑐵 𑐰𑐶𑐰𑐬𑐞 𑐧𑐷𑐐𑐸 𑐍𑐥𑐔𑐵𑐬𑐶𑐎 𑐎𑐸𑐟𑑅 𑐖𑐸𑐮𑑋 𑐣𑐵𑐥𑑄, 𑐠𑑂𑐰 𑐏𑑂𑐫𑐮𑐫𑑂 𑐥𑑂𑐬𑐐𑐟𑐶 𑐖𑐸𑐳𑐾𑑄 𑐴𑐶𑐣𑑂𑐡𑐹–𑐀𑐬𑐧 𑐮𑑂𑐫𑐵𑐁𑐏𑑅 𑐰𑑂𑐫𑐰𑐳𑑂𑐠𑐵 𑐨𑐵𑐬𑐟𑐫𑐵 𑐳𑑂𑐰𑐬𑑂𑐞 𑐫𑐸𑐐𑐫𑐵 𑐂𑐮𑐫𑑂 𑐥𑑂𑐬𑐟𑐶𑐥𑐵𑐡𑐶𑐟 𑐖𑐸𑐮𑑋 𑐥𑑂𑐬𑐵𑐬𑐩𑑂𑐨𑐶𑐎 𑐩𑐢𑑂𑐫 𑐫𑐸𑐐 (𑑔𑑐𑑐 𑐣𑐶𑐳𑐾𑑄 𑑑𑑐𑑐𑑐 𑐃.)𑐫𑐵 𑐃𑐮𑐾 𑐥𑐱𑑂𑐔𑐶𑐩𑐷 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫𑐫𑐵 𑐥𑐟𑐣 𑐢𑐸𑑄𑐎𑐵 𑐥𑐵𑐱𑑂𑐔𑐵𑐟𑑂𑐫 𑐬𑑀𑐩𑐣 𑐴𑐮𑐶𑐩𑐫𑑂 𑐰𑐿𑐖𑑂𑐘𑐵𑐣𑐶𑐎 𑐀𑐣𑐸𑐳𑐣𑑂𑐢𑐵𑐣 𑐳𑑂𑐫𑐣𑐵𑐰𑐣, 𑐟𑐬 𑐩𑐢𑑂𑐫𑐎𑐵𑐮𑐷𑐣 𑐥𑐸𑐣𑐬𑑂𑐖𑐵𑐐𑐬𑐞𑐫𑑂 (𑐎𑑂𑐫𑐵𑐬𑑀𑐮𑐶𑐒𑑂𑐐𑐶𑐫𑐣 𑐥𑐸𑐣𑐬𑑂𑐖𑐵𑐐𑐬𑐞 , 𑐀𑐟𑑀𑐣𑐶𑐫𑐣 𑐥𑐸𑐣𑐬𑑂𑐖𑐵𑐐𑐬𑐞 𑐰 𑑑𑑒𑐐𑐸 𑐱𑐟𑐵𑐧𑑂𑐡𑐷𑐫𑐵 𑐥𑐸𑐣𑐬𑑂𑐖𑐵𑐐𑐬𑐞) 𑐰𑐶𑐡𑑂𑐰𑐟𑐵 𑐴𑐵𑐣𑑄 𑐡𑐫𑐵𑐰𑐮𑑋 𑐥𑐱𑑂𑐔𑐶𑐩𑐷 𑐫𑐸𑐬𑑀𑐥𑐫𑑂 𑐟𑐣𑐵𑐔𑑂𑐰𑑄𑐐𑐸 𑐕𑐸𑑄 𑐐𑑂𑐬𑐷𑐎 𑐴𑐳𑑂𑐟𑐮𑐶𑐏𑐶𑐟 𑐐𑑂𑐬𑐣𑑂𑐠𑐟 𑐂𑐳𑑂𑐮𑐵𑐩𑐶𑐎 𑐳𑑂𑐰𑐬𑑂𑐞 𑐫𑐸𑐐𑐫𑑂 𑐩𑐢𑑂𑐫𑐥𑐹𑐬𑑂𑐰𑐫𑑂 𑐳𑑄𑐬𑐎𑑂𑐲𑐞 𑐰 𑐰𑐶𑐳𑑂𑐟𑐵𑐬 𑐖𑐸𑐮𑑋 𑐣𑐵𑐥𑑄, 𑐥𑐹𑐬𑑂𑐰𑐷 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫 𑐰 𑐐𑑂𑐬𑐷𑐎 𑐧𑐿𑐖𑐣𑑂𑐚𑐵𑐂𑐣 𑐳𑐵𑐩𑑂𑐬𑐵𑐖𑑂𑐫 𑐥𑐟𑐣𑐫𑐵 𑐗𑑂𑐰𑐮𑐫𑑂 𑐀𑐣𑐫𑐵 𑐰𑐶𑐡𑑂𑐰𑐵𑐣𑐟𑐾𑐐𑐸 𑐮𑐶𑐥𑐵𑐫𑐵 𑐎𑐸𑐟𑑅𑐫𑐵 𑐮𑐶𑐔𑑂𑐰𑑅 𑐎𑐠𑑄 𑐐𑑂𑐬𑐷𑐎 𑐴𑐳𑑂𑐟𑐮𑐶𑐏𑐶𑐟 𑐐𑑂𑐬𑐣𑑂𑐠𑐟 𑐥𑐱𑑂𑐔𑐶𑐩𑐷 𑐫𑐸𑐬𑑀𑐥𑐫𑑂 𑐥𑐸𑐣𑐬𑑂𑐖𑐵𑐐𑐬𑐞 𑐎𑐵𑐮𑐫𑑂 𑐠𑑂𑐫𑐣𑑋

𑑑𑑐𑐐𑐸 𑐣𑐶𑐳𑐾𑑄 𑑑𑑓𑐐𑐸 𑐱𑐟𑐵𑐧𑑂𑐡𑐷𑐂 𑐥𑐱𑑂𑐔𑐶𑐩𑐷 𑐫𑐸𑐬𑑀𑐥𑐫𑑂 𑐐𑑂𑐬𑐷𑐎 𑐎𑐺𑐟𑐶 𑐰 𑐂𑐳𑑂𑐮𑐵𑐩𑐶𑐎 𑐀𑐣𑐸𑐳𑐣𑑂𑐢𑐵𑐣𑐫𑐵 𑐥𑐸𑐣𑑅𑐥𑑂𑐬𑐵𑐥𑑂𑐟𑐶 𑐰 𑐁𑐟𑑂𑐩𑐳𑐵𑐟𑑄 "𑐥𑑂𑐬𑐵𑐎𑐺𑐟𑐶𑐎 𑐡𑐬𑑂𑐱𑐣"𑐫𑐵𑐟 𑐥𑐸𑐣𑐬𑑂𑐖𑐷𑐰𑐶𑐟 𑐫𑐵𑐟, 𑐐𑐸𑐎𑐶𑐫𑐵𑐟 𑐮𑐶𑐥𑐵 𑑑𑑖𑐐𑐸 𑐱𑐟𑐵𑐧𑑂𑐡𑐷𑐂 𑐣𑑂𑐴𑑂𑐫𑐵𑑅𑐐𑐸 𑐰𑐿𑐖𑑂𑐘𑐵𑐣𑐶𑐎 𑐎𑑂𑐬𑐵𑐣𑑂𑐟𑐶𑐂 𑐬𑐸𑐥𑐵𑐣𑑂𑐟𑐬𑐞 𑐖𑐸𑐮𑑋 𑐰𑐿𑐖𑑂𑐘𑐵𑐣𑐶𑐎 𑐎𑑂𑐬𑐵𑐣𑑂𑐟𑐶𑐫𑐵 𑐗𑑂𑐰𑐮𑐫𑑂 𑐣𑑂𑐴𑐸𑐐𑐸 𑐰𑐶𑐔𑐵𑑅 𑐰 𑐏𑑀𑐖/𑐩𑐵𑐮𑐾𑐖𑑂𑐫𑐵𑑄 𑐣𑑂𑐴𑐵𑐥𑐵𑐫𑐵 𑐐𑑂𑐬𑐷𑐎 𑐀𑐰𑐢𑐵𑐬𑐞𑐵 𑐰 𑐥𑐬𑐩𑑂𑐥𑐬𑐵𑐫𑐵 𑐐𑐮𑑂𑐟𑐷𑐟𑐾𑐟 𑐳𑐸𑐢𑐵𑐬 𑐫𑐵𑐳𑐾𑑄 𑐡𑐸𑐳𑐶𑐎𑐵 𑐕𑐐𑐹 𑐐𑑂𑐬𑐣𑑂𑐠𑐫𑑂 𑐁𑐢𑐵𑐬𑐶𑐟 𑐥𑐬𑐩𑑂𑐥𑐬𑐵 𑐩𑐖𑐸𑐳𑐾𑑄 𑐕𑐐𑐹 𑐟𑐠𑑂𑐫𑐫𑑂 𑐁𑐢𑐵𑐬𑐶𑐎 𑐏𑑂𑐫𑑅𑐫𑐵 𑐬𑐸𑐥𑐫𑑂 𑐰𑐶𑐎𑐱𑐶𑐟 𑐖𑐸𑐮𑑋 𑐰𑐿𑐖𑑂𑐘𑐵𑐣𑐶𑐎 𑐥𑐡𑑂𑐢𑐟𑐶𑑄 𑐫𑐵𑐎𑐣𑑄 𑐴𑐾 𑐖𑑂𑐘𑐵𑐣 𑐣𑐶𑐬𑑂𑐩𑐵𑐞𑐫𑑂 𑐀𑐥𑑂𑐰 𑐨𑐹𑐩𑐶𑐎𑐵 𑐩𑑂𑐴𑐶𑐟𑐮 𑐰 𑑑𑑙𑐐𑐸 𑐱𑐟𑐵𑐧𑑂𑐡𑐷𑐂 𑐠𑑂𑐫𑑄 𑐧𑐶𑐮𑐾 𑐡𑐸𑐳𑐶𑐎𑐵𑐫𑐵 𑐫𑐎𑑂𑐰 𑐳𑑄𑐳𑑂𑐠𑐵𑐐𑐟 𑐰 𑐰𑑂𑐫𑐵𑐰𑐳𑐵𑐫𑐶𑐎 𑐰𑐶𑐱𑐾𑐲𑐟𑐵𑐟𑐫𑐾𑐳𑑄 𑐁𑐎𑐵𑐬 𑐎𑐵𑐫𑐾𑐐𑐸 𑐱𑐸𑐬𑐸 𑐫𑐵𑐟𑑋 𑐣𑐵𑐥𑑄, "𑐥𑑂𑐬𑐵𑐎𑐺𑐟𑐶𑐎 𑐡𑐬𑑂𑐱𑐣" "𑐥𑑂𑐬𑐵𑐎𑐺𑐟𑐶𑐎 𑐡𑐸𑐳𑐶𑐎𑐵/𑐰𑐶𑐖𑑂𑐘𑐵𑐣"𑐫𑑂 𑐴𑐶𑐮𑐵𑐰𑐣𑑋

𑐴𑐮𑐶𑑄𑐫𑐵 𑐥𑑂𑐬𑐟𑐶 𑐎𑑁𑐟𑐸𑐴𑐸𑐮𑐟𑐵 𑐰 𑐳𑐩𑐳𑑂𑐫𑐵 𑐳𑐩𑐵𑐢𑐵𑐣 𑐫𑐵𑐫𑐾𑐐𑐸 𑐂𑐔𑑂𑐕𑐵𑑄 𑐥𑑂𑐬𑐾𑐬𑐶𑐟 𑐰𑐿𑐖𑑂𑐘𑐵𑐣𑐶𑐎𑐟𑐾𑐐𑐸 𑐀𑐣𑐸𑐳𑐣𑑂𑐢𑐵𑐣𑑄 𑐡𑐸𑐳𑐶𑐎𑐵/𑐰𑐶𑐖𑑂𑐘𑐵𑐣𑐫𑑂 𑐣𑑂𑐴𑐸𑐐𑐸 𑐖𑑂𑐘𑐵𑐣𑐫𑐵𑐟 𑐣𑑂𑐴𑑂𑐫𑑅𑐣𑐾 𑐫𑑄𑐎𑐮𑑋 𑐳𑐩𑐎𑐵𑐮𑐷𑐣 𑐰𑐿𑐖𑑂𑐘𑐵𑐣𑐶𑐎 𑐀𑐣𑐸𑐳𑐣𑑂𑐢𑐵𑐣 𑐟𑐳𑐎𑑄 𑐳𑐴𑐎𑐵𑐬𑑂𑐫𑐵𑐟𑑂𑐩𑐎 𑐡𑐸 𑐰 𑐳𑐵𑐩𑐵𑐣𑑂𑐫𑐟𑐫𑐵 𑐥𑑂𑐬𑐵𑐖𑑂𑐘𑐶𑐎 𑐰 𑐀𑐣𑐸𑐳𑐣𑑂𑐢𑐵𑐣 𑐳𑑄𑐳𑑂𑐠𑐵, 𑐳𑐬𑐎𑐵𑐬𑐷 𑐣𑐶𑐎𑐵𑐫, 𑐰 𑐎𑐩𑑂𑐥𑐣𑐷𑐟𑐾𑐳𑑄 𑐩𑑄𑐎𑐵 𑐎𑐠𑑄 𑐫𑐵𑐂𑑋 𑐂𑐩𑐶𑐐𑐸 𑐖𑑂𑐫𑐵𑐫𑐵 𑐰𑑂𑐫𑐵𑐰𑐴𑐵𑐬𑐶𑐎 𑐥𑑂𑐬𑐨𑐵𑐰𑑄 𑐰𑑂𑐫𑐵𑐰𑐳𑐵𑐫𑐶𑐎 𑐄𑐟𑑂𑐥𑐵𑐡𑐣, 𑐱𑐳𑑂𑐟𑑂𑐬𑐵𑐳𑑂𑐟𑑂𑐬, 𑐄𑐳𑐵𑑃𑐫𑑂, 𑐳𑐵𑐬𑑂𑐰𑐖𑐣𑐶𑐎 𑐥𑐹𑐬𑑂𑐰𑐵𑐢𑐵𑐬, 𑐰 𑐰𑐵𑐟𑐵𑐰𑐬𑐞 𑐳𑑄𑐬𑐎𑑂𑐲𑐞 𑐁𑐡𑐶 𑐏𑑂𑐫𑐮𑐫𑑂 𑐏𑐣𑐾𑐡𑐸𑑋

𑐎𑐔𑐵

𑐡𑐸𑐳𑐶𑐎𑐵𑐫𑐵 𑐫𑐎𑑂𑐰 𑐎𑐔𑐵 𑐡𑐸𑑋 𑐣𑐵𑐥𑑄, 𑐡𑐸𑐳𑐶𑐎𑐵𑐫𑐵𑐟 𑐫𑐎𑑂𑐰 𑐏𑑂𑐫𑐮𑐫𑑂 𑐕𑑂𑐫𑐮𑐶𑐐𑐸 𑐣𑑄 𑐫𑐵𑑋

• 𑐥𑑂𑐬𑐵𑐎𑐺𑐟𑐶𑐎 𑐡𑐸𑐳𑐶𑐎𑐵: 𑐥𑑂𑐬𑐵𑐎𑐺𑐟𑐶𑐎 𑐡𑐸𑐳𑐶𑐎𑐵 𑐥𑑂𑐬𑐎𑐺𑐟𑐶 𑐰 𑐨𑑁𑐟𑐶𑐎 𑐴𑐮𑐶𑐩𑐫𑐵 𑐰𑑂𑐫𑐰𑐳𑑂𑐠𑐶𑐟 𑐖𑑂𑐘𑐵𑐣 𑐏𑑋 𑐡𑐸𑐳𑐶𑐎𑐵 𑐏𑑃𑐐𑑂𑐰𑑅𑐫𑐵 𑐕𑑂𑐫𑐾𑐮𑐵 𑐁𑐥𑐵𑐮𑑄 𑐥𑑂𑐬𑐵𑐎𑐺𑐟𑐶𑐎 𑐡𑐸𑐳𑐶𑐎𑐵𑐫𑐵 𑐣𑐶𑑄𑐟𑐶𑑄 𑐫𑐵𑐂𑐐𑐸 𑐫𑐵𑑋 𑐠𑐸𑐎𑐶𑐫𑐵 𑑓𑐐𑐸 𑐩𑐹 𑐎𑐔𑐵 𑐨𑑁𑐟𑐶𑐎𑐱𑐵𑐳𑑂𑐟𑑂𑐬, 𑐬𑐳𑐵𑐫𑐣𑐱𑐵𑐳𑑂𑐟𑑂𑐬 𑐰 𑐖𑐷𑐰𑐱𑐵𑐳𑑂𑐟𑑂𑐬 𑐏𑑋 𑐠𑑂𑐰 𑐣𑐵𑐥𑑄 𑐩𑐾𑐩𑐾𑐐𑐸 𑐩𑐹 𑐎𑐔𑐵𑐫𑑂 𑐏𑐐𑑀𑐮𑐱𑐵𑐳𑑂𑐟𑑂𑐬 𑐁𑐡𑐶 𑐮𑐵𑑋
• 𑐳𑐵𑐩𑐵𑐖𑐶𑐎 𑐡𑐸𑐳𑐶𑐎𑐵 :𑐳𑐵𑐩𑐵𑐖𑐶𑐎 𑐡𑐸𑐳𑐶𑐎𑐵 𑐩𑐵𑐣𑐰 𑐳𑐩𑐵𑐖𑐫𑐵 𑐧𑐣𑐵𑐰𑐚 𑐰 𑐠𑐸𑐎𑐶𑐫𑐵 𑐳𑐡𑐳𑑂𑐫𑐟𑐾𑐐𑐸 𑐎𑑂𑐬𑐶𑐫𑐵𑐎𑐮𑐵𑐥 𑐣𑐵𑐥 𑐳𑑂𑐰𑐵𑐥𑐹 𑐟𑐿𑐐𑐸 𑐀𑐢𑑂𑐫𑐫𑐣 𑐏𑑋 𑐠𑐸𑐎𑐶𑐮𑐶 𑐂𑐟𑐶𑐴𑐵𑐳, 𑐀𑐬𑑂𑐠𑐱𑐵𑐳𑑂𑐟𑑂𑐬, 𑐳𑐩𑐵𑐖𑐱𑐵𑐳𑑂𑐟𑑂𑐬, 𑐁𑐡𑐶 𑐮𑐵𑑋
• 𑐣𑐶𑐐𑐩𑐣𑐵𑐟𑑂𑐩𑐎 𑐥𑑂𑐬𑐞𑐵𑐮𑐷: 𑐣𑐶𑐐𑐩𑐣𑐵𑐟𑑂𑐩𑐎 𑐥𑑂𑐬𑐞𑐵𑐮𑐷 𑐕𑐸𑑄 𑐠𑐣𑑂𑐫𑐵𑑅𑐐𑐸 𑐰𑐶𑐡𑑂𑐫𑐵𑐟𑐫𑐾𑐐𑐸 𑐥𑐸𑐔𑑅 𑐏 𑐐𑐸𑐎𑐶𑐮𑐶 𑐡𑐬𑑂𑐱𑐣 𑐰 𑐡𑐸𑐳𑐶𑐎𑐵𑐫𑐵 𑐰𑐶𑐲𑐫𑐫𑑂 𑐟𑐬𑑂𑐎 𑐰 𑐐𑐞𑐣𑐵𑐫𑐵 𑐳𑐶𑐡𑑂𑐢𑐵𑐣𑑂𑐟𑐫𑐵 𑐕𑑂𑐫𑐾𑐮𑐵 𑐖𑐸𑐂𑑋 𑐠𑐸𑐎𑐶𑐮𑐶 𑐐𑐞𑐶𑐟 𑐰 𑐟𑐬𑑂𑐎 𑐮𑐵𑑋

𑐥𑐶𑐣𑐾𑐫𑐵 𑐳𑑂𑐰𑐵𑐥𑐹

• 𑐡𑐸𑐳𑐶𑐎𑐵 𑐥𑑂𑐬𑐳𑐵𑐬

𑐡𑐸𑐳𑐶𑐎𑐵 दबू