𑐟𑑂𑐬𑐵𑐣𑑂𑐖𑐶𑐳𑑂𑐟𑐬

𑐟𑑂𑐬𑐵𑐣𑑂𑐖𑐶𑐳𑑂𑐟𑐬 𑐢𑐵𑑅𑐐𑐸 𑐕𑐐𑐹 𑐳𑐾𑐩𑐶𑐎𑐣𑑂𑐡𑐎𑑂𑐟𑐬 𑐨𑑅 𑐏। 𑐠𑑂𑐰 𑐨𑑅𑐫𑐵𑐟 𑐂𑐮𑐾𑐎𑑂𑐟𑑂𑐬𑑀𑐣𑐶𑐎 𑐳𑐶𑐐𑑂𑐣𑐮 𑐰 𑐂𑐮𑐾𑐎𑑂𑐟𑑂𑐬𑐶𑐎 𑐥𑐵𑐰𑐬 𑐊𑐩𑑂𑐥𑑂𑐮𑐶𑐦𑐵𑐂 𑐰 𑐳𑑂𑐰𑐶𑐔 𑐫𑐵𑐫𑐾𑐟 𑐕𑑂𑐫𑐮𑐶। 𑐟𑑂𑐬𑐵𑐣𑑂𑐖𑐶𑐳𑑂𑐟𑐬 𑐳𑐾𑐩𑐶𑐎𑐣𑑂𑐡𑐎𑑂𑐟𑐬 𑐰𑐳𑑂𑐟𑐸𑑄 𑐡𑐫𑐾𑐎𑐵𑐟𑑅𑐐𑐸 𑐡𑐿। 𑐠𑐸𑐎𑐶𑐮𑐶 𑐥𑐶𑐣𑐾𑐫𑐵 𑐳𑐬𑑂𑐎𑐶𑐟𑐫𑑂 𑐳𑑂𑐰𑐵𑐫𑐾𑐟 𑐩𑑂𑐴𑑀𑐫𑑂 𑐣𑑄 𑐳𑑂𑐰𑑄𑐐𑐸 𑐟𑐬𑑂𑐩𑐶𑐣𑐮 𑐡𑐂। 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐕𑐖𑐸 𑐟𑐬𑑂𑐩𑐶𑐣𑐮𑐫𑑂 𑐨𑑀𑐮𑑂𑐟𑐾𑐖 𑐰𑐵 𑐎𑐬𑐾𑐣𑑂𑐟 𑐕𑑂𑐰𑐂𑐧𑐶𑐮𑐫𑑂 𑐩𑐾𑐐𑐸 𑐕𑐖𑐸 𑐟𑐬𑑂𑐩𑐶𑐣𑐮𑐫𑑂 𑐎𑐬𑐾𑐣𑑂𑐟 𑐧𑐵𑐴𑐵 𑐥𑐵𑐂। 𑐣𑐶𑐫𑐣𑑂𑐟𑑂𑐬𑐶𑐟 (𑐁𑐄𑐟𑐥𑐸𑐟) 𑐥𑐵𑐰𑐬 𑐣𑐶𑐫𑐣𑑂𑐟𑑂𑐬𑐞 𑐫𑐵𑐂𑐐𑐸 (𑐂𑐣𑑂𑐥𑐸𑐟) 𑐥𑐵𑐰𑐬 𑐳𑑂𑐰𑐫𑐵 𑐀𑐥𑑂𑐰 𑐖𑐸𑐂𑐐𑐸𑐖𑐸𑐮𑐶𑑄 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵𑐟 𑐳𑐶𑐐𑑂𑐣𑐮 𑐊𑐩𑑂𑐥𑑂𑐮𑐶𑐦𑐶𑐎𑐾𑐳𑐣𑐫𑐵 𑐣𑐶𑑄𑐟𑐶𑑄 𑐕𑑂𑐫𑐮𑐾𑐖𑑂𑐫𑐸। 𑐠𑑁𑑄𑐎𑐣𑑂𑐴𑐾 𑐕𑐸𑑄 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐟 𑐀𑐮𑐐𑑂𑐐 𑐰𑑅𑐳𑐵𑑄 𑐫𑐎𑑂𑐰 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐟 𑐂𑐣𑑂𑐟𑐾𑐐𑑂𑐬𑐾𑐟𑐾𑐡 𑐳𑐬𑑂𑐎𑐶𑐟𑐫𑐵 𑐨𑐵𑐐𑐫𑐵 𑐬𑐸𑐥𑐫𑑂 𑐰𑐂𑐐𑐸 𑐫𑐵। 𑐟𑑂𑐬𑐵𑐣𑑂𑐖𑐶𑐳𑑂𑐟𑐬 𑐁𑐢𑐸𑐣𑐶𑐎 𑐂𑐮𑐾𑐎𑑂𑐟𑑂𑐬𑑀𑐣𑐶𑐎 𑐖𑑂𑐫𑐵𑐨𑑅𑐫𑐵 𑐁𑐢𑐵𑐬𑐨𑐹𑐟 𑐥𑐹𑐬𑑂𑐖𑐵 𑐏। 𑐠𑑂𑐰 𑐥𑐹𑐬𑑂𑐖𑐵 𑐁𑐢𑐸𑐣𑐶𑐎 𑐂𑐮𑐾𑐎𑑂𑐟𑑂𑐬𑑀𑐣𑐶𑐎 𑐖𑑂𑐫𑐵𑐨𑐮𑐫𑑂 𑐣𑑂𑐴𑑂𑐫𑐵𑐠𑐵𑐳𑐫𑑂 𑐣𑑄 𑐏𑐣𑐾𑐡𑐸। 𑐳𑐣𑑂 𑑑𑑙𑑕𑑐𑐫𑐵 𑐡𑐱𑐎𑐫𑑂 𑐖𑐹𑐐𑐸 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐰𑐶𑐎𑐵𑐳 𑐢𑐸𑑄𑐎𑐵 𑐠𑑂𑐰 𑐨𑐮𑑄 𑐂𑐮𑐾𑐎𑑂𑐟𑑂𑐬𑑀𑐣𑐶𑐎𑑂𑐳𑐫𑐵 𑐏𑑂𑐫𑐮𑐫𑑂 𑐴𑐶𑐄𑐥𑐵 𑐴𑐮। 𑐠𑐸𑐎𑐶𑐫𑐵 𑐮𑐶𑐔𑑂𑐰𑐫𑐵 𑐎𑐠𑑄 𑐔𑐶𑐢𑑄𑐐𑐸 𑐰 𑐡𑑄𑐐𑐸 𑐬𑐾𑐡𑐶𑐫𑑀, 𑐎𑑂𑐫𑐵𑐮𑑂𑐎𑐸𑐮𑐾𑐟𑐬, 𑐎𑐩𑑂𑐥𑑂𑐫𑐸𑐟𑐬 𑐁𑐡𑐶 𑐡𑐫𑐾𑐎𑐾𑐕𑐶𑐣।

𑐖𑑂𑐫𑐵

𑐊𑐣𑐥𑐶𑐊𑐣 𑐧𑐵𑐂𑐥𑑀𑐮𑐬 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐳𑐶𑐩𑑂𑐥𑐮 𑐳𑐬𑑂𑐎𑐶𑐟 𑐎𑐶𑐥𑐵।

𑐔𑐶𑐢𑑄𑐐𑐸 𑐳𑐶𑐐𑑂𑐣𑐮 𑐕𑐖𑑂𑐰 𑐟𑐬𑑂𑐩𑐶𑐣𑐮𑐫𑑂 𑐕𑐫𑐮𑐵 𑐩𑐾𑐐𑐸 𑐕𑐖𑑂𑐰 𑐟𑐬𑑂𑐩𑐶𑐣𑐮𑐫𑑂 𑐟𑐔𑑂𑐰𑑅𑐐𑐸 𑐳𑐶𑐐𑑂𑐣𑐮 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐦𑐹𑐐𑐸 𑐎𑑂𑐲𑐩𑐟𑐵 𑐴𑐾 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐖𑑂𑐫𑐵𑐫𑐵 𑐳𑐵𑐬 𑐏। 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐠𑑂𑐰 𑐐𑐸𑐞𑐫𑐵𑐟 𑐐𑐾𑐣 𑐢𑐵𑐂। 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑑄 𑐠𑑅𑐐𑐸 𑐁𑐄𑐟𑐥𑐸𑐟, 𑐰𑑅𑐐𑐸 𑐂𑐣𑑂𑐥𑐸𑐟𑐫𑐵 𑐩𑐵𑐟𑑂𑐬𑐵 𑐎𑐠𑑄 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐦𑐸। 𑐠𑑂𑐰 𑐐𑐸𑐞𑐫𑐵 𑐎𑐵𑐬𑐞𑑄 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑑄 𑐊𑐩𑑂𑐥𑑂𑐮𑐶𑐦𑐵𑐫𑐬𑐫𑐵 𑐖𑑂𑐫𑐵 𑐫𑐵𑐫𑐾𑐦𑐸। 𑐣𑐵𑐥𑑄, 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵𑐟 𑐳𑐬𑑂𑐎𑐶𑐟𑐫𑑂 𑐎𑐬𑐾𑐣𑑂𑐟 𑐀𑐣 𑐰𑐵 𑐀𑐦 𑐫𑐵𑐎𑐾𑐟 𑐂𑐮𑐾𑐎𑑂𑐟𑑂𑐬𑐶𑐎𑐮 𑐣𑐶𑐫𑐣𑑂𑐟𑑂𑐬𑐶𑐟 𑐳𑑂𑐰𑐶𑐔𑐫𑐵 𑐬𑐸𑐥𑐫𑑂 𑐕𑐫𑐮𑐾 𑐕𑐶𑑄।

𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵 𑐣𑐶𑐐𑐸 𑐬𑐸𑐥 𑐡𑐸। 𑐠𑑂𑐰 𑐣𑐶𑐐𑐸 𑐬𑐸𑐥 𑐳𑐬𑑂𑐎𑐶𑐟𑐫𑑂 𑐕𑑂𑐫𑐮𑐶𑐐𑐸 𑐬𑐸𑐥𑐫𑐵 𑐁𑐢𑐵𑐬𑐫𑑂 𑐨𑐟𑐶-𑐨𑐟𑐶 𑐥𑐵। 𑐧𑐵𑐂𑐥𑑀𑐮𑐵𑐬 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑑂 𑐟𑐬𑑂𑐩𑐶𑐣𑐮𑐟𑐫𑐾𑐟 𑐧𑐾𑐳, 𑐎𑐮𑐾𑐎𑑂𑐟𑐬, 𑐰 𑐂𑐩𑐶𑐟𑐬 𑐢𑐵𑐂। 𑐔𑐶𑐧𑐵𑐴𑐵 𑐎𑐬𑐾𑐣𑑂𑐟 𑐧𑐾𑐳 𑐟𑐬𑑂𑐩𑐶𑐣𑐮𑐫𑑂 (𑐧𑐾𑐳 𑐰 𑐂𑐩𑐶𑐟𑐬𑐫𑐵 𑐡𑐠𑐸𑐂) 𑐧𑐷𑐧𑐮𑐫𑑂 𑐎𑐮𑐾𑐎𑑂𑐟𑐬 𑐰 𑐂𑐩𑐶𑐟𑐬𑐫𑐵 𑐡𑐠𑐸𑐂 𑐟𑐔𑑂𑐰𑑅𑐐𑐸 𑐎𑐬𑐾𑐣𑑂𑐟 𑐣𑐶𑐫𑐣𑑂𑐟𑑂𑐬𑐞 𑐰𑐵 𑐳𑑂𑐰𑐶𑐔 𑐫𑐵𑐫𑐾𑐕𑐶𑑄। 𑐦𑐶𑐮𑑂𑐡-𑐂𑐦𑐾𑐎𑑂𑐟 𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑑂 𑐟𑐬𑑂𑐩𑐶𑐣𑐮𑐟𑐫𑐾𑐟 𑐐𑐾𑐟, 𑐳𑑀𑐬𑑂𑐳, 𑐰 𑐡𑑂𑐬𑐾𑐣 𑐢𑐵𑐂, 𑐰 𑐐𑐾𑐟𑐫𑑂 𑐨𑑀𑐮𑑂𑐟𑐾𑐖 𑐧𑐶𑐫𑐵 𑐳𑑀𑐬𑑂𑐳 𑐰 𑐡𑑂𑐬𑐾𑐣𑐫𑐵 𑐡𑐠𑐸𑐫𑐵 𑐎𑐬𑐾𑐣𑑂𑐟 𑐣𑐶𑐫𑐣𑑂𑐟𑑂𑐬𑐞 𑐫𑐵𑐫𑐾𑐕𑐶𑑄।

𑐖𑐰𑑅𑐫𑐵 𑐎𑐶𑐥𑐵𑐫𑑂 𑐳𑐬𑑂𑐎𑐶𑐟𑐫𑑂 𑐳𑐵𑐢𑐵𑐬𑐞 𑐧𑐵𑐂𑐥𑑀𑐮𑐵𑐬 𑐟𑑂𑐬𑐵𑐣𑑂𑐖𑐶𑐳𑑂𑐟𑐬 𑐎𑑂𑐫𑐣𑐵𑐟𑑅𑐐𑐸 𑐡𑐸। 𑐧𑐾𑐳𑐫𑑂 𑐡𑐹𑐐𑐸 𑐎𑐬𑐾𑐣𑑂𑐟𑐫𑐵 𑐁𑐢𑐵𑐬𑐫𑑂 𑐂𑐩𑐶𑐟𑐬 𑐰 𑐎𑐮𑐾𑐎𑑂𑐟𑐬 𑐟𑐬𑑂𑐩𑐶𑐣𑐮𑐫𑐵 𑐡𑐠𑐸𑐂 𑐔𑐵𑐬𑑂𑐖 𑐧𑐵𑐴𑐵 𑐰𑐣𑐶। 𑐁𑐣𑑂𑐟𑐬𑐶𑐎 𑐎𑐠𑑄 𑐧𑐾𑐳 𑐰 𑐂𑐩𑐶𑐟𑐬 𑐳𑑂𑐰𑐵𑐥𑐹𑑄 𑐳𑐾𑐩𑐶𑐎𑐣𑑂𑐡𑐎𑑂𑐟𑐬 𑐡𑐵𑐫𑑀𑐡𑐫𑐵 𑐬𑐸𑐥𑐫𑑂 𑐖𑑂𑐫𑐵 𑐫𑐵𑐂𑐐𑐸 𑐖𑐸𑐮𑐶𑑄 𑐧𑐾𑐳 𑐎𑐬𑐾𑐣𑑂𑐟 𑐡𑐂𑐧𑐶𑐮𑐫𑑂 𑐧𑐾𑐳 𑐰 𑐂𑐩𑐶𑐟𑐬𑐫𑐵 𑐡𑐠𑐸𑐂 𑐨𑑀𑐮𑑂𑐟𑐾𑐖 𑐡𑑂𑐬𑐥 𑐖𑐸𑐂। 𑐠𑑂𑐰 𑐨𑑀𑐮𑑂𑐟𑐾𑐖𑐫𑐵 𑐩𑐵𑐟𑑂𑐬𑐵 𑐟𑑂𑐬𑐵𑐣𑑂𑐖𑐶𑐳𑑂𑐟𑐬 𑐡𑐫𑐾𑐎𑐹𑐐𑐸 𑐰𑐳𑑂𑐟𑐸𑑄 𑐣𑐶𑐬𑑂𑐢𑐵𑐬𑐞 𑐫𑐵𑐂 𑐰 𑐠𑐸𑐎𑐶𑐫𑐵𑐟 V_BE 𑐢𑐵𑐂।

𑐟𑑂𑐬𑐵𑐣𑑂𑐖𑐶𑐳𑑂𑐟𑐬𑐫𑐵𑐟 𑐳𑐬𑑂𑐎𑐶𑐟𑐫𑑂 𑐣𑐶𑐐𑐸 𑐥𑑂𑐬𑐎𑐵𑐬𑑄 𑐕𑑂𑐫𑐮𑐾𑐕𑐶𑑄

• 𑐳𑑂𑐰𑐶𑐔𑐫𑐵 𑐬𑐸𑐥𑐫𑑂 𑐟𑑂𑐬𑐵𑐣𑑂𑐖𑐶𑐳𑑂𑐟𑐬
• 𑐊𑐩𑑂𑐥𑑂𑐮𑐶𑐦𑐵𑐫𑐬𑐫𑐵 𑐬𑐸𑐥𑐫𑑂 𑐟𑑂𑐬𑐵𑐣𑑂𑐖𑐶𑐳𑑂𑐟𑐬

𑐳𑑂𑐰𑐫𑐵𑐡𑐶𑐳𑑃

• 𑐎𑐩𑑂𑐥𑑂𑐫𑐸𑐟𑐬
• 𑐐𑐞𑐶𑐟
• 𑐳𑐾𑐩𑐶𑐎𑐣𑑂𑐡𑐎𑑂𑐟𑐬