𑐔𑐠𑐵𑑅

𑐔𑐠𑐵𑑅 𑐧𑐵𑐫𑑂 𑐐𑐞𑐾𑐱 𑐔𑐟𑐸𑐬𑑂𑐠𑐷 𑐘𑐮𑐵𑐠𑑂𑐰 𑐔𑑁𑐠𑐶 𑐏𑐸𑐣𑑂𑐴𑐸 𑐣𑐾𑐥𑐵𑑅 𑐰 𑐴𑐮𑐶𑑄𑐫𑐵 𑐣𑐾𑐰𑐵𑑅𑐟𑐾𑐳𑑃 𑐴𑐣𑐶𑐐𑐸 𑐕𑐐𑐹 𑐔𑐏𑑅 𑐏𑑋 𑐔𑐠𑐵𑑅 𑐣𑐾𑐰𑐵𑑅 𑐟𑐖𑐶𑐮𑐖𑐶𑐫𑐵 𑐕𑐐𑐹 𑐔𑐏 𑐏𑑋 𑐠𑑂𑐰 𑐔𑐏𑑅𑐫𑐵𑐟 𑐐𑐞𑐾𑐡𑑂𑐫𑑅𑐫𑐵 𑐧𑐸𑑄𑐡𑐶𑑄𑐫𑐵 𑐎𑐠𑑄 𑐴𑐣𑐶𑐐𑐸 𑐫𑐵𑐂𑑋 𑐠𑑂𑐰 𑐔𑐏 𑐧𑐶𑐮𑐾 𑐟𑐶𑐩𑐶𑐮𑐵𑐫𑐵𑐟 𑐟𑐸𑐳𑐶, 𑐥𑐵𑐳𑐶, 𑐩𑑂𑐰𑐵𑐫𑑂, 𑐁𑐩𑐵𑑅𑐳𑐶, 𑐳𑑂𑐫𑐵𑐄, 𑐢𑐵𑐮𑐾𑐫𑑂 𑐁𑐡𑐶 𑐕𑐵𑐣𑐵𑑅 𑐥𑐸𑐖𑑂𑐫𑐵𑐂𑐐𑐸 𑐫𑐵𑐂𑑋 𑐠𑑂𑐰 𑐔𑐏𑑅 𑐧𑐶𑐮𑐫𑑂 𑐎𑑅𑐣𑐶, 𑐩𑐸𑐳𑑂𑐫𑐵, 𑐏𑐟𑑂𑐫𑐵𑑅, 𑐧𑐬𑐵𑑄, 𑐎𑐫𑑂𑐐𑐸, 𑐔𑐣𑐵, 𑐕𑑂𑐰, 𑐧𑐎𑐸𑐮𑐵:, 𑐳𑐶𑐩𑑂𑐥𑐸 𑐰 𑐩𑐵𑐫𑑂𑐁𑐡𑐶 𑐳𑐶𑐫𑐵: 𑐡𑑂𑐫𑑅𑐫𑐵𑐟 𑐕𑐵𑐂𑐐𑐸 𑐫𑐵 𑐁𑐡𑐶 𑐠𑐷𑐠𑐷 𑐧𑐸𑐧𑑅/𑐴𑐮𑐶𑐩𑐮𑐶 𑐣𑑄 𑐳𑐶𑐫𑐵: 𑐡𑑂𑐫𑑅𑐫𑐵𑐟 𑐕𑐵𑐫𑐾𑐐𑐸 𑐫𑐵𑐂𑑋 𑐠𑐸𑐧𑐮𑐫𑑂 𑐰𑐶𑐱𑐾𑐲 𑐫𑐵𑐣𑐵: 𑐧𑑅𑐳𑐶𑐫𑐵 𑐥𑐸 𑐟𑐕𑑂𑐫𑐵𑐣𑐵: 𑐄𑐎𑐶𑐂 𑐡𑐸𑐣𑐾 𑐔𑑂𑐰𑑄𑐐𑐸 𑐏𑐵𑐫𑐸𑐐𑐸 𑐳𑐶 𑐧𑐳𑐥𑐟𑐶𑐥𑐸 𑐣𑑄 𑐡𑑂𑐫𑑅𑐫𑐵𑐟 𑐕𑐵𑐫𑐾𑐐𑐸 𑐔𑐮𑐣 𑐡𑐸𑑋

𑐐𑐞𑐾𑐡𑑂𑐫𑑅 𑐣𑐵𑐥𑑄 𑐁𑐐𑑃𑐡𑑂𑐫𑑅, 𑐡𑐶𑐐𑐸𑐡𑑂𑐫𑑅 𑐰 𑐔𑐠𑐵𑑅𑐡𑑂𑐫𑑅(𑐟𑐶𑐩𑐶𑐮𑐵) 𑐥𑐸𑐖𑑂𑐫𑐵𑐂𑐐𑐸 𑐠𑑂𑐰 𑐔𑐏𑑅𑐫𑐵𑐟 𑐩𑑀𑐴𑐣𑐶 𑐣𑐏𑑅 𑐰𑐫𑐾𑐟𑑂𑐫𑑄𑐐𑐸 𑐳𑐹𑐔𑐎 𑐔𑐏𑑅𑐫𑐵 𑐎𑐠𑑄 𑐣𑑄 𑐩𑑂𑐴𑐳𑐷𑐎𑐶𑐐𑐸 𑐫𑐵𑑋

𑐴𑐣𑐵𑑅

𑐠𑑂𑐰 𑐔𑐏𑑅𑐫𑐵 𑐧𑐴𑐣𑐷 𑐣𑐾𑐰𑐵𑑅𑐟𑐾𑐳𑑄 𑐠𑑅𑐠𑑅𑐐𑐸 𑐕𑐾𑑃𑐫𑑂 𑐟𑐶𑐩𑐶𑐮𑐵 𑐡𑑂𑐫𑑅𑐫𑐵𑐟 𑐴𑐮𑐶𑐩𑐮𑐶 𑐕𑐵𑐣𑐵𑑅 𑐡𑑂𑐫𑑅 𑐥𑐸𑐖𑑂𑐫𑐵𑐫𑐾𑐐𑐸 𑐫𑐵𑐂𑑋 𑐣𑐵𑐥𑑄, 𑐐𑐞𑐾𑐡𑑂𑐫𑑅𑐫𑐵𑐟 𑐣𑑄 𑐥𑐸𑐖𑑂𑐫𑐵𑐂𑐐𑐸 𑐫𑐵𑑋 𑐠𑑂𑐰 𑐡𑐶𑑄 𑐏𑐸𑐣𑐸 𑐣𑐾𑐥𑐵𑐮𑐩𑐣𑑂𑐡𑑅𑐫𑐵 𑐠𑐷𑐠𑐷 𑐐𑐞𑐾𑐡𑑂𑐫𑑅𑐫𑐵 𑐡𑐾𑐐𑐮𑐫𑑂 𑐫𑐎𑑂𑐰 𑐩𑐣𑐹𑐟 𑐥𑐸𑐖𑑂𑐫𑐵𑐰𑐣𑐶𑐐𑐸 𑐔𑐮𑐣 𑐡𑐸𑑋

𑐡𑑂𑐫𑑅 𑐥𑐸𑐖𑑂𑐫𑐵𑐂𑐐𑐸 𑐣𑐶𑑄𑐟𑐶𑑄 𑐔𑐠𑐵𑑅𑐳𑑂𑐰𑐵𑑄, 𑐩𑑀𑐴𑐣𑐷𑐳𑑂𑐰𑐵𑑄, 𑐰 𑐮𑐎𑑂𑐲𑑂𑐩𑐷𑐳𑑂𑐰𑐵𑑄 𑐣𑐵𑐥𑑄 𑐧𑐴𑐣𑐶𑐫𑐵 𑐃𑐮𑐫𑑂 𑐥𑐸𑐖𑑂𑐫𑐵𑐂𑐐𑐸 𑐖𑐸𑐂𑑋 𑐥𑐮𑐾𑐳𑑂𑐰𑐵𑑄, 𑐔𑐠𑐵𑑅𑐳𑑂𑐰𑐵𑑄, 𑐥𑐵𑐮𑐸𑐩𑐵𑑅, 𑐟𑐸𑐩𑐵, 𑐥𑐵𑐳𑐶, 𑐮𑐿𑑄, 𑐟𑐸𑐳𑐶, 𑐳𑐩𑐫𑑂𑐧𑐖𑐶, 𑐴𑐮𑐶𑐩𑐮𑐶 𑐣𑐵𑐥𑑄 𑐡𑑂𑐫𑑅 𑐥𑐸𑐖𑑂𑐫𑐵𑐂𑐐𑐸 𑐫𑐵𑑋 𑐥𑐮𑐾𑐳𑑂𑐰𑐵𑑄𑐫𑐵 𑐴𑑅 𑐕𑑂𑐫𑐮𑐵 𑐡𑐫𑐾𑐎𑐵𑐟𑑅𑐐𑐸 𑐥𑐮𑐾𑐮𑐥𑑂𑐟𑐾𑐫𑑂 𑑙𑐐𑐸 𑐴𑐮𑐶𑐩𑐮𑐶 𑐦𑐳𑐶𑐥𑐸, 𑐧𑑅𑐳𑐶𑐥𑐸, 𑐦𑑂𑐰𑑄𑐳𑐶𑐥𑐸, 𑐎𑑅𑐣𑐶, 𑐩𑐸𑐳𑑂𑐫𑐵, 𑐕𑐸𑐳𑑂𑐫𑐵 , 𑐧𑐎𑐸𑐮𑐵𑑅, 𑐎𑐾𑐐𑐸, 𑐴𑑂𑐫𑐵𑐄𑑃 𑐳𑐶𑐩𑑂𑐥𑐸 𑐕𑑂𑐫𑐮𑐷𑐐𑐸 𑐫𑐵𑑋

𑐣𑐳𑐵

𑐔𑐠𑐵𑑅 𑐧𑐶𑐮𑐾 𑐠𑐷𑐠𑐷 𑐳𑐶𑐳𑐵𑐧𑐸𑐳𑐵 𑐡𑐳𑐸 𑐟𑐸𑐳𑐶, 𑐥𑐵𑐳𑐶, 𑐩𑑂𑐰𑐵𑐫𑑂, 𑐁𑐩𑐵:𑐳𑐶, 𑐳𑑂𑐫𑐵𑐄, 𑐢𑐵𑐮𑐾𑐫𑑂, 𑐰 𑐠𑐷𑐠𑐷 𑐧𑐹𑐧𑑅 𑐰 𑐴𑐮𑐶𑐩𑐮𑐶 𑐎𑑅𑐣𑐶, 𑐩𑐸𑐳𑑂𑐫𑐵, 𑐏𑐟𑑂𑐫𑐵𑑅, 𑐧𑐬𑐵𑑄, 𑐎𑐫𑑂𑐐𑐸, 𑐔𑐣𑐵, 𑐕𑑂𑐰, 𑐧𑐎𑐸𑐮𑐵:, 𑐳𑐶𑐩𑑂𑐥𑐸 𑐰 𑐩𑐵𑐫𑑂𑐁𑐡𑐶 𑐕𑑂𑐫𑐮𑐵 𑐥𑐸𑐖𑑂𑐫𑐵𑐫𑐾𑐐𑐸 𑐰 𑐣𑐫𑐾𑐐𑐸 𑐖𑐸𑐂𑑋

𑐳𑑂𑐰𑐫𑐵𑐡𑐶𑐳𑑃

• 𑐔𑐏𑑅