𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑑗

देवनागरीइ ब्वनेत: क्लियोप्याट्रा ७ तियादिसँ𑑋

𑐩𑐶𑐳𑑂𑐬𑐫𑐵 𑐮𑐵𑐣𑐷 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵, 𑐂𑐟𑐶𑐴𑐵𑐳𑐫𑐵 𑐡𑐎𑐮𑐾 𑐣𑐵𑑄𑐖𑐵𑐥𑐶𑑄 𑐩𑐶𑐳𑐵𑐫𑑂 𑐕𑐩𑑂𑐴 𑐏𑑋 𑐰𑐫𑑂𑐎𑑅𑐫𑐵 𑐣𑐵𑑄 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑑗 𑐦𑐶𑐮𑑀𑐥𑐾𑐚𑐬 (𑐃.𑐥𑐹. 𑑖𑑙 -𑑑𑑒 𑐀𑐐𑐳𑑂𑐟, 𑐃.𑐥𑐹.𑑓𑑐 ) 𑐏𑑋 𑐰𑐫𑑂𑐎𑑅 𑐩𑐶𑐳𑑂𑐬𑐫𑑂 𑐳𑐶𑐎𑑄𑐡𑐬 𑐩𑐴𑐵𑐣𑐡𑑂𑐰𑐵𑐬𑐵 𑐣𑐶𑐬𑑂𑐢𑐵𑐬𑐶𑐟 𑐮𑐶𑐥𑐵𑐩𑑂𑐴 𑐦𑐵𑐬𑑀 𑐏𑑋 𑐰𑑄𑐱𑐖 𑐎𑐠𑑄, 𑐰𑐫𑑂𑐎𑑅 𑐕𑐩𑑂𑐴 𑐩𑑂𑐫𑐵𑐳𑐾𑐡𑑀𑐣𑐶𑐫𑐣 𑐬𑐵𑐖𑐎𑐸𑐩𑐵𑐬𑐷 𑐏𑑋 𑐰𑐫𑑂𑐎𑑅 𑐩𑐡𑐫𑐾𑐢𑐸𑑄𑐎𑐵, 𑐩𑐶𑐳𑑂𑐬 𑐊𑐖𑐶𑐥𑑂𑐚𑐳 𑐣𑐵𑑄𑐫𑐵 𑐬𑑀𑐩𑐣 𑐥𑑂𑐬𑐵𑐣𑑂𑐟 𑐖𑐸𑐰𑐣𑑋

𑐰𑐫𑑂𑐎𑑅𑐫𑐵 𑐖𑐷𑐰𑐣𑐫𑐵 𑐩𑐹 𑐋𑐟𑐶𑐴𑐵𑐳𑐶𑐎 𑐳𑑂𑐬𑑀𑐟 𑐥𑑂𑐮𑐹𑐚𑐵𑐬𑑂𑐎𑐫𑐵 𑐊𑑄𑐚𑐣𑐷𑐫𑐵 𑐖𑐷𑐰𑐣 𑐫𑐵 𑐀𑐣𑐸𑐰𑐵𑐡𑐟 𑐏𑑋^[१] 𑐊𑐣𑑂𑐚𑐣𑐷 𑐊𑐞𑑂𑐜 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐰𑐶𑐮𑐶𑐫𑐩 𑐱𑐾𑐎𑑂𑐳𑐥𑐶𑐫𑐬𑑄 𑐳𑐣𑑂 𑑑𑑖𑑐𑑓 𑐰 𑑑𑑖𑑐𑑗 𑐡𑐠𑐸𑐂 𑐔𑑂𑐰𑐫𑐵𑐡𑐶𑐐𑐸 𑐰𑐶𑐱𑑂𑐰𑐵𑐳 𑐡𑐹𑐐𑐸 𑐣𑐵𑑄𑐖𑐵𑑅𑐐𑐸 𑐰𑐶𑐫𑑀𑐐𑐵𑐣𑑂𑐟 𑐏𑑋 𑐠𑑂𑐰 𑐡𑐎𑐮𑐾 𑐣𑑂𑐴𑑂𑐫𑑅 𑐳𑐣𑑂 𑑑𑑖𑑒𑑓𑐳 𑐢𑑂𑐰𑐵𑐐𑐸 𑐖𑐸𑐮𑑋

𑐖𑐷𑐰𑐣

𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐰𑑅 𑐃𑐫𑐵 𑐩𑐶𑐳𑑂𑐬𑐫𑐵 𑐬𑐵𑐖𑐢𑐵𑐣𑐷 𑐀𑐮𑐾𑐎𑑂𑐖𑐵𑐣𑑂𑐡𑑂𑐬𑐶𑐫𑐵𑐫𑑂 𑐧𑐸𑐐𑐸 𑐏𑑋 𑐰𑐫𑑂𑐎𑑅 𑑑𑑘𑐡𑑄 𑐡𑐸𑐧𑐶𑐮𑐾 𑐰𑐫𑑂𑐎𑑅𑐫𑐵 𑐀𑐧𑐸, 𑐳𑐸 𑐖𑐸𑐖𑐸 𑐣𑑄 𑐏, 𑐩𑐡𑐫𑐵𑐡𑐶𑐮𑑋 𑐰𑐫𑑂𑐎𑑅 𑐰 𑐰𑐫𑑂𑐎𑑅𑐫𑐵 𑐎𑐶𑐖𑐵, 𑐚𑐶𑐮𑐾𑐩𑐷 𑑑𑑓𑐩𑑂𑐴 𑐩𑐶𑐳𑑂𑐬𑐫𑐵 𑐱𑐵𑐳𑐎 𑐖𑐸𑐫𑐵𑐡𑐶𑐮𑑋 𑐰𑐫𑑂𑐎𑑅 𑐮𑐵𑐣𑐷 𑐰 𑐰𑐫𑑂𑐎𑑅𑐫𑐵 𑐎𑐶𑐖𑐵 𑐖𑐸𑐖𑐸 𑐖𑐸𑐫𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐎𑐶𑐖𑐵 𑑑𑑒𑐡𑑄 𑐖𑐎𑑂𑐎 𑐡𑐹𑐐𑐸𑐮𑐶𑑄 𑐰𑐫𑑂𑐎𑑅 𑐰𑐵𑐳𑑂𑐟𑐰𑐶𑐎 𑐱𑐵𑐳𑐎 𑐖𑐸𑐫𑐵𑐡𑐶𑐮𑑋

𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑑄 𑐡𑐬𑐧𑐵𑐬𑐶𑐫𑐵𑐟𑐫𑐾𑐐𑐸 𑐡𑐠𑐸𑐂 𑐕𑐸𑑄 𑐱𑐟𑑂𑐬𑐸 𑐡𑐫𑐾𑐎𑐵𑐡𑐶𑐮𑑋 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑐫𑐵 𑐱𑐵𑐳𑐣𑐎𑐵𑐮 𑐴𑐶𑐖𑐜𑐵 𑐥𑐶𑐣𑑂𑐟𑐶𑐫𑐳 (Pothinus)𑐫𑐵 𑐣𑐾𑐟𑐺𑐟𑑂𑐟𑑂𑐰𑐫𑑂 𑐖𑐹𑐐𑐸 𑐡𑐬𑐧𑐵𑐬𑐶𑐫𑐵𑐟𑐫𑐾𑐐𑐸 𑐕𑐐𑐸 𑐲𑐜𑑂𑐫𑐣𑑂𑐟𑑂𑐬𑑄 𑐎𑑂𑐰𑐔𑐵𑐮𑑋 𑐎𑐬𑐶𑐧 𑑕𑑑 𑐳𑐾 𑑔𑑘 𑐃𑐳𑐵 𑐥𑐹𑐬𑑂𑐰 𑐡𑐠𑐸𑐂 𑐂𑐩𑐶𑐳𑑄 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑐫𑐵𑐟 𑐳𑐟𑑂𑐟𑐵𑐔𑑂𑐫𑐹𑐟 𑐫𑐵𑐣𑐵 𑐚𑑀𑐮𑐾𑐩𑐷𑐫𑐵𑐟 𑐕𑐩𑑂𑐴 𑐖𑐎𑑂𑐎 𑐱𑐵𑐳𑐎 𑐡𑐫𑐾𑐎𑐮𑑋 𑐮𑐶𑐔𑑂𑐰𑑅𑐎𑐠𑑄, 𑐰𑐫𑑂𑐎𑐮𑑄 𑐡𑐾𑐫𑑂 𑐟𑑂𑐰𑐟𑐾 𑐩𑐵𑐮𑑋 𑐚𑑀𑐮𑐾𑐩𑐷 𑐖𑐸𑐖𑐸 𑐖𑐸𑐳𑐵𑑄 𑐩𑐔𑐵 𑐖𑐎𑑂𑐎 𑐖𑐹𑐐𑐸𑐮𑐶𑑄 𑐥𑐶𑐣𑑂𑐟𑐶𑐫𑐳 𑐰 𑐄𑐂𑐐𑐸 𑐥𑐸𑐔𑑅 𑐩𑐶𑐳𑑂𑐬𑐫𑐵 𑐢𑐵𑐠𑐾𑑄𑐫𑐵 𑐱𑐵𑐳𑐎 𑐖𑐸𑐮𑑋

𑐳𑐶𑐖𑐬 𑐰 𑐥𑐩𑑂𑐥𑐾𑐂

𑐰 𑐃𑐮𑐾 𑐣𑐶𑐩𑑂𑐴 𑐬𑑀𑐩𑐣 𑐖𑐣𑐬𑐮𑐟 𑐬𑑀𑐩𑐣 𑐐𑐞𑐬𑐵𑐖𑑂𑐫𑐫𑐵 𑐣𑐾𑐟𑐺𑐟𑑂𑐟𑑂𑐰𑐫𑐵 𑐣𑐶𑑄𑐟𑐶𑑄 𑐮𑑂𑐰𑐵𑐣𑐵𑐔𑑂𑐰𑐣𑑋 𑐂𑐥𑐶𑑄 𑐥𑐩𑑂𑐥𑐾𑐂 𑐰 𑐖𑐸𑐮𑐶𑐫𑐳 𑐳𑐶𑐖𑐬 𑐏𑑋 𑐖𑐸𑐮𑐶𑐫𑐳 𑐳𑐶𑐖𑐬𑑄 𑑔𑑘 𑐃.𑐥𑐹.𑐳 𑐫𑐰𑐣𑐫𑑂 𑐖𑐹𑐐𑐸 Pharsalus𑐫𑐵 𑐮𑑂𑐰𑐵𑐥𑐸𑐂 𑐥𑐩𑑂𑐥𑐾𑐂𑐫𑐵𑐟 𑐧𑐸𑐎𑐮𑑋 𑐥𑐩𑑂𑐥𑐾𑐂 Pharsalus𑐣𑑄 𑐩𑐶𑐳𑑂𑐬𑐫𑑂 𑐧𑐶𑐳𑐸𑑄𑐰𑐣 𑐰 𑐀𑐣 𑐚𑐮𑐾𑐩𑐷𑐫𑐵 𑐁𑐡𑐾𑐱𑐫𑑂 𑐰𑐫𑑂𑐎𑑅𑐫𑐵𑐟 𑐳𑑂𑐫𑐵𑐣𑐵𑐧𑐶𑐮𑑋

𑐟𑐮𑐾𑐩𑐷 𑐰 𑐰𑐫𑑂𑐎𑑅𑐫𑐵 𑐳𑐩𑐬𑑂𑐠𑐎𑐟𑐫𑐾𑐳𑑄 𑐳𑐶𑐖𑐬 𑐥𑑂𑐬𑐳𑐣𑑂𑐣 𑐖𑐸𑐂 𑐢𑐿𑐐𑐸 𑐨𑐮𑐳𑐵 𑐎𑐵𑐳𑐵𑑄 𑐠𑑂𑐰 𑐕𑐐𑐹 𑐟𑑅𑐢𑑄𑐐𑐸 𑐨𑐹𑐮 𑐖𑐸𑐰𑐣𑑋 𑐳𑐶𑐖𑐬𑑄 𑐠𑑅𑐐𑐸 𑐰𑐶𑐬𑐸𑐡𑑂𑐢 𑐮𑑂𑐰𑐵𑐥𑐶𑑄 𑐫𑐎𑑂𑐰 𑐳𑐶𑐣𑐾𑐚𑐬𑐟𑐫𑐾𑐟 𑐩𑐵𑐦𑐷 𑐧𑐶𑐢𑐸𑑄𑐎𑐸𑐐𑐸 𑐖𑐸𑐮𑑋 𑐰𑐫𑑂𑐎𑑅𑐫𑐵 𑐄𑐡𑑂𑐡𑐾𑐱𑑂𑐫 𑐬𑑀𑐩𑐫𑑂 𑐱𑐵𑐣𑑂𑐟𑐶𑐫𑐵 𑐰𑐵𑐟𑐵𑐰𑐬𑐞𑐫𑐵 𑐖𑐐 𑐡𑐫𑐾𑐎𑐶𑐐𑐸 𑐏𑑋 𑐥𑐩𑑂𑐥𑐾𑐂𑐫𑐵 𑐴𑐟𑑂𑐫𑐵𑑄 𑐳𑐶𑐖𑐬𑐫𑐵 𑐫𑑀𑐖𑐣𑐵𑐫𑐵𑐟 𑐡𑐠𑐸𑑄𑐂 𑐔𑐵𑐣𑐵𑐕𑑂𑐰𑐮𑑋 𑐗𑐣𑑂, 𑐥𑐩𑑂𑐥𑐾𑐂 𑐕𑐩𑑂𑐴 𑐬𑑀𑐩𑐣 𑐎𑐣𑑂𑐳𑐸𑐮 𑐰 𑐳𑐶𑐖𑐬𑐫𑐵 𑐕𑐩𑑂𑐴 𑐖𑐎𑑂𑐎 𑐩𑑂𑐴𑑂𑐫𑐵𑐫𑑂 𑐖𑐸𑐮𑐶𑐫𑐵𑐫𑐵 𑐰𑐶𑐢𑐸𑐬 𑐖𑐸𑐫𑐵𑐔𑑂𑐰𑐣𑑋 𑐀𑐗, 𑐥𑑀𑐩𑑂𑐥𑐾𑐂𑐫𑐵𑐟 𑐠𑑅𑐐𑐸 5𑐩𑑂𑐴𑐩 𑐎𑐮𑐵 𑐰 𑐩𑐳𑑂𑐟𑐫𑐾𑐐𑐸 𑐣𑑂𑐴𑑂𑐫𑑅𑐣𑐾 𑐂𑐥𑐶𑑄 𑐖𑐴𑐵𑐖𑐫𑑂 𑐡𑐸𑐧𑐶𑐮𑐾 𑐰 𑐥𑐩𑑂𑐥𑐾𑐂 𑐖𑐴𑐵𑐖𑑄 𑐥𑐶𑐴𑐵𑑄 𑐖𑐎𑑂𑐎 𑐰𑑅𑐧𑐶𑐮𑐾 𑐳𑑂𑐫𑐵𑐣𑐵𑐧𑐶𑐮𑑋 𑐠𑐸𑐎𑐶𑐮𑐶𑑄 𑐥𑐩𑑂𑐥𑐾𑐂𑐫𑐵 𑐱𑐎𑑂𑐟𑐶𑐱𑐵𑐮𑐷 𑐥𑐬𑐶𑐰𑐵𑐬 𑐰 𑐳𑐩𑐬𑑂𑐠𑐎𑐟𑐫𑐾𑐳𑑄 𑐳𑐶𑐖𑐬𑐫𑐵𑐟 𑐐𑐧𑑂𑐮𑐾𑑄 𑐩𑐮𑑂𑐰𑐩𑑄𑐎𑐶𑐐𑐸 𑐰 𑐣𑑂𑐴𑐫𑐵𑐧𑐶𑐮𑐾𑑄 𑐱𑐟𑑂𑐬𑐸 𑐖𑐸𑐂𑐐𑐸 𑐳𑐸𑐣𑐶𑐱𑑂𑐔𑐶𑐟 𑐫𑐵𑐟𑑋

𑐀𑐮𑐾 𑐳𑐶𑐖𑐬 𑐩𑐶𑐳𑑂𑐬𑐫𑐵 𑐬𑐵𑐖𑐢𑐵𑐣𑐷 𑐀𑐮𑐾𑐎𑑂𑐖𑐾𑐣𑑂𑐡𑑂𑐬𑐶𑐫𑐵𑐫𑑂 𑐰𑐮𑑋 𑐁𑐬𑑂𑐠𑐶𑐎 𑐬𑐸𑐥𑑄 𑐩𑐶𑐳𑑂𑐬 𑐬𑑀𑐩𑐫𑐵 𑐩𑐣𑐸𑐟𑐫𑐾𑐟 𑐣𑐎𑐾𑐟 𑐐𑐵𑑅𑐎𑑂𑐎 𑐎𑐶 𑐡𑐹𑐐𑐸 𑐕𑐐𑐸 𑐀𑐣𑑂𑐣𑐨𑐞𑑂𑐜𑐵𑐬 𑐖𑐸𑐫𑐵𑐔𑑂𑐰𑐣𑑋 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑑄 𑐳𑐶𑐖𑐬𑐫𑐵𑐟 𑐰𑐫𑑂𑐎𑑅𑐫𑐵 𑐠𑑅𑐐𑐸 𑐴𑐾 𑐁𑐖𑐹𑐔𑐵𑑅𑐐𑐸 𑐥𑐴𑐮𑑄 𑐮𑐳𑐎𑐸𑐳 𑐫𑐵𑐣𑐵𑐡𑐶𑐮𑑋 𑐰𑐫𑑂𑐎𑑅 𑐕𑐐𑐸 𑐐𑐮𑐿𑑄𑐔𑐵𑐫𑑂 𑐡𑑂𑐫𑐣𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐔𑑂𑐫𑐟𑐫𑐾𑐳𑑄 𑐰𑑂𑐫𑑂𑐎𑑅𑐫𑐵𑐟 𑐡𑐸𑐣𑐾𑐟𑐫𑐵 𑐐𑐮𑐿𑑄𑐔𑐵 𑐥𑐶𑐣𑐾𑑄 𑐦𑑂𑐫𑐾𑐣𑐵𑐧𑐶𑐮𑑋 𑐰 𑐐𑐮𑐿𑑄𑐔𑐵 𑐳𑐶𑐖𑐬 𑐔𑑂𑐰𑐵𑐣𑐵𑐔𑑂𑐰𑑄𑐐𑐸 𑐮𑐵𑐫𑑂𑐎𑐹𑐮𑐶 𑐫𑑄𑐎𑐮𑑋 𑐐𑐵𑐬𑑂𑐜𑐟𑐫𑐾𑐳𑑄 𑐕𑐸𑑄 𑐩𑐣𑐸𑐟𑐵𑐫𑐾𑐳𑑄 𑐕𑐐𑐹 𑐐𑐮𑐿𑑄𑐔𑐵 𑐎𑑂𑐰𑐵𑐧𑐶𑐣𑐵𑐔𑑂𑐰𑑄𑐐𑐸 𑐏𑐣 𑐰 𑐂𑐩𑐶𑐟 𑐩𑐡𑐶𑐎𑐸𑐳𑐾𑑄 𑐰𑐣𑐾𑐧𑐶𑐮𑑋 𑐂𑐩𑐶𑐳𑑄 𑐰 𑐐𑐮𑐿𑑄𑐔𑐵 𑐳𑐶𑐖𑐬 𑐂𑐠𑐵𑐳𑐫𑑂 𑐠𑑂𑐫𑑄𑐎𑐮𑑋 𑐀𑐮𑐾 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐐𑐮𑐿𑑄𑐔𑐵𑑄 𑐥𑐶𑐴𑐵𑑄𑐰𑐮𑑋 𑐳𑐶𑐖𑐬 𑐰𑐫𑑂𑐎𑑅𑐣𑐵𑐥 𑐩𑐟𑐶𑐣𑐵𑐫𑑂 𑐎𑑂𑐰𑐧𑐵𑐮 𑐰 𑐂𑐥𑐶𑑄 𑐥𑑂𑐬𑐾𑐩𑐷 𑐖𑐸𑐮𑑋 𑐠𑑂𑐰 𑐃𑐮𑐾 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑑒𑑑𑐡𑑄 𑐰 𑐳𑐶𑐖𑐬 𑑕𑑒𑐡𑑄 𑐖𑐸𑐫𑐵𑐔𑑂𑐰𑐣𑑋

𑐳𑐶𑐖𑐬𑑄 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑐫𑐵𑐟 𑐴𑐵𑐣𑑄 𑐮𑐵𑐣𑐷 𑐡𑐫𑐾𑐎𑐶𑐐𑐸 𑐦𑐿𑐳𑐮𑐵 𑐫𑐵𑐣𑐵𑐡𑐶𑐮𑑋 𑐟𑐮𑐾𑐩𑐷𑐫𑐵𑐟 𑐠𑑂𑐰 𑐏𑑄 𑐩𑐫𑐾𑐮𑑋 𑐠𑐸𑐎𑐶𑐫𑐵 𑐣𑐶𑑄𑐟𑐶𑑄 𑐫𑐎𑑂𑐰 𑐮𑑂𑐰𑐵𑐥𑐹 𑐢𑐸𑑄𑐎𑐵 𑐳𑐶𑐖𑐬𑑄 𑐟𑑂𑐫𑐵𑐟𑑋 𑐟𑐮𑐾𑐩𑐷 𑐧𑐶𑐳𑐸𑑄𑐰𑐣𑐾𑐟 𑐳𑑂𑐰𑐧𑐶𑐮𑐾 𑐣𑐵𑐂𑐮 𑐏𑐸𑐳𑐶𑐂 𑐎𑐸𑐟𑐸𑑄 𑐰𑐣𑐵 𑐎𑑂𑐰𑐧𑐵𑐣𑐵 𑐳𑐶𑐟𑑋 𑐩𑐾𑐩𑑂𑐴 𑐔𑐶𑐢𑑄𑐩𑑂𑐴 𑐎𑐶𑐖𑐵 𑐖𑐸𑐖𑐸 𑐖𑐸𑐮 𑐰 𑐴𑐵𑐣𑑄 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐩𑐶𑐳𑑂𑐬𑐫𑐵 𑐰𑐵𑐳𑑂𑐟𑐰𑐶𑐎 𑐱𑐵𑐳𑐎 𑐖𑐸𑐮𑑋 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑑄 𑐖𑐸𑐮𑐶𑐫𑐳 𑐳𑐶𑐖𑐬𑐣𑐵𑐥 𑐂𑐴𑐶𑐥𑐵 𑐩𑐫𑐵𑐳𑐵𑑄 𑐂𑐩𑐶𑐐𑐸 𑐕𑐩𑑂𑐴 𑐎𑐵𑐫𑑂 𑐡𑐫𑐵𑐔𑑂𑐰𑐣𑑋 𑐰𑐫𑑂𑐎𑑅𑐫𑐵 𑐣𑐵𑑄 𑐳𑐶𑐖𑐬𑐶𑐫𑐣 𑐏𑑋

𑐳𑐶𑐖𑐬𑐶𑐫𑐣 𑐧𑐸𑐖𑐎𑑂𑐎 𑐧𑐸𑐧𑐶𑐮𑐾 𑐳𑐶𑐖𑐬𑐫𑐵𑐟 𑐳𑐶𑐣𑐾𑐚𑐫𑑂 𑐳𑑂𑐫𑐵𑐣𑐵𑐧𑐶𑐮𑑋 𑑑𑑕 𑐩𑐵𑐬𑑂𑐔, 𑑔𑑔 𑐃.𑐥𑐹.𑐳 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐰 𑐰𑐫𑑂𑐎𑑅𑐫𑐵 𑐁𑐳𑐥𑐵𑐳𑐾 𑐬𑑀𑐩𑐫𑑂 𑐡𑐸𑐧𑐶𑐮𑐾 𑐴𑐾 𑐳𑐶𑐖𑐬𑐫𑐵𑐟 𑐳𑑂𑐫𑐵𑐣𑐵𑐧𑐶𑐮𑑋 𑐠𑑂𑐰 𑐢𑐸𑑄𑐎𑐵 𑐰𑐫𑑂𑐎𑑅 𑐩𑐶𑐳𑑂𑐬𑐫𑑂 𑐮𑐶𑐴𑐵𑑄𑐗𑐵𑐮𑑋

𑐩𑐵𑐬𑑂𑐎 𑐊𑐣𑑂𑐚𑐣𑐷 𑐰 𑐀𑐎𑑂𑐚𑐾𑐨𑐶𑐫𑐣

𑐳𑐶𑐖𑐬𑐫𑐵 𑐳𑐾𑐣𑐵𑐥𑐟𑐶 𑐩𑐵𑐬𑑂𑐎 𑐊𑐣𑑂𑐚𑐣𑐷 𑐰 𑐳𑐶𑐖𑐬𑐫𑐵 𑐰𑐿𑐢 𑐄𑐟𑑂𑐟𑐬𑐵𑐢𑐶𑐎𑐵𑐬𑐷 𑐀𑐎𑑂𑐚𑐾𑐨𑐶𑐫𑐣 𑐖𑐵𑐣𑐵 𑐳𑐶𑐖𑐬𑐫𑐵 𑐰𑐶𑐬𑐸𑐡𑑂𑐢 𑐲𑐜𑑂𑐫𑐣𑑂𑐟𑑂𑐬 𑐫𑐵𑐂𑐥𑐶𑑄𑐐𑐸 𑐥𑐸𑐔𑑅𑐫𑐵𑐟 𑐧𑐸𑐎𑐮𑑋 𑐠𑑂𑐰 𑐥𑐸𑐔𑑅𑐫𑐵 𑐣𑐾𑐟𑐺𑐟𑑂𑐟𑑂𑐰 𑐫𑐵𑐥𑐶𑑄 𑐧𑑂𑐬𑐸𑐚𑐳 𑐰 𑐎𑑂𑐫𑐵𑐳𑐶𑐫𑐳 𑐥𑐹𑐬𑑂𑐰𑐷 𑐨𑐹𑐩𑐢𑑂𑐫 𑐳𑐵𑐐𑐬𑐫𑑂 𑐠𑑅𑐐𑐸 𑐳𑐾𑐣𑐵 𑐫𑑄𑐎𑐵 𑐀𑐣𑐫𑐵 𑐫𑐎𑑂𑐰 𑐨𑐹𑐨𑐵𑐐 𑐠𑑅𑐐𑐸 𑐀𑐢𑐷𑐣𑐫𑑂 𑐣𑐶𑐫𑐣𑑂𑐟𑑂𑐬𑐞 𑐫𑐵𑐣𑐵𑐟𑐮𑑋 𑐠𑑂𑐰 𑐩𑐸𑐡𑑂𑐡𑐵 𑐀𑑄𑐟𑐟𑑅 𑐩𑑂𑐫𑐵𑐳𑐾𑐜𑑀𑐣𑐶𑐫𑐵𑐫𑐵 𑐦𑐶𑐮𑐶𑐥𑑂𑐥𑐷𑐫𑐵 𑐮𑑂𑐰𑐵𑐥𑐸𑑄 𑐳𑐶𑐢𑐫𑐾𑐎𑐮𑑋

𑐳𑐶𑐖𑐬𑐫𑐵 𑐠𑐵𑐫𑑂 𑐳𑑂𑐰𑑄𑐩𑑂𑐴 𑐳𑑄𑐫𑐸𑐎𑑂𑐟 𑐎𑐣𑑂𑐳𑐸𑐮𑐟𑐫𑐾𑐐𑐸 𑐣𑐶𑐎𑑂𑐰𑑅𑐐𑐸 𑐟𑑂𑐬𑐿𑐢𑐫𑐵 𑐬𑐸𑐥𑐫𑑂 𑐎𑐵𑐮𑑋 𑐂𑐩𑐶𑐐𑐸 𑐣𑐵𑑄 𑐀𑐎𑑂𑐚𑐾𑐨𑐶𑐫𑐣, 𑐩𑐵𑐬𑑂𑐎 𑐊𑐣𑑂𑐚𑐣𑐷 𑐰 𑐮𑐾𑐥𑐶𑐡𑐳 𑐏𑑋 𑐮𑐾𑐥𑐶𑐡𑐳 𑐕𑐩𑑂𑐴 𑐔𑐶𑐢𑑄𑐩𑑂𑐴 𑐥𑐵𑐟𑑂𑐬 𑐖𑐎𑑂𑐎 𑐏 𑐰 𑐳𑐵𑐩𑑂𑐬𑐵𑐖𑑂𑐫𑐫𑐵 𑐡𑐷𑐬𑑂𑐑𑐎𑐵𑐮𑐷𑐣 𑐨𑐵𑐐𑑂𑐫 𑐊𑐣𑑂𑐚𑐣𑐷 𑐰 𑐀𑐎𑑂𑐚𑐾𑐨𑐶𑐫𑐣𑐫𑐵 𑐕𑐐𑐸 𑐳𑑄𑐑𑐬𑑂𑐲𑑄 𑐣𑐶𑐬𑑂𑐞𑐫 𑐫𑐵𑐟𑑋 𑐩𑐵𑐬𑑂𑐎 𑐊𑐣𑑂𑐚𑐣𑐷 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐳𑑂𑐰𑐾𑐟 𑐰𑑅𑐧𑐶𑐮𑐾 𑐰𑐫𑑂𑐎𑑅𑐣𑐵𑐥 𑐩𑐟𑐶𑐣𑐵 𑐖𑐸𑐮, 𑐟𑐬 𑐊𑐣𑑂𑐚𑐣𑐷𑐫𑐵 𑐣𑑂𑐴𑐵𑐥𑐵 𑐴𑐾 𑐕𑐩𑑂𑐴 𑐎𑐮𑐵 𑐡𑐫𑐵𑐔𑑂𑐰𑐣𑑋 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑐫𑐵 𑐀𑐗 𑐳𑑂𑐰𑑄𑐩𑑂𑐴 𑐩𑐔𑐵 𑐡𑐟𑑋 𑐄𑐎𑐶𑐮𑐶 𑐣𑐶𑐩𑑂𑐴 𑐖𑐸𑐜𑐸𑐰𑐵 𑐖𑐸𑐮 𑐰 𑐳𑑂𑐰𑑄𑐩𑐾𑐳𑐶𑐫𑐵𑑃 𑐴𑐾 𑐀𑐧𑐸 𑐩𑐵𑐬𑑂𑐎 𑐊𑐣𑑂𑐚𑐣𑐷 𑐏𑑋

𑐀𑐎𑑂𑐚𑐾𑐨𑐶𑐫𑐣 𑐰 𑐊𑐣𑑂𑐚𑐣𑐷 𑐡𑐠𑐸𑐫𑐵 𑐳𑑄𑐑𑐬𑑂𑐲 𑐟𑑅𑐔𑑂𑐰𑐫𑐵 𑐰𑐣 𑐰 𑐫𑐵𑐎𑐣𑑄 𑐴𑐾 𑐴𑐟𑐵𑑅 𑐖𑐸𑐰𑐣𑑋 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐟𑑅𑐩𑐶 𑐖𑐸𑐎𑐠𑑄 𑐰𑐫𑑂𑐎𑐮𑑄 𑐠𑑅𑐐𑐸 𑐢𑑂𑐫𑐾𑐧𑐵 𑐊𑐣𑑂𑐚𑐣𑐷𑐫𑐵 𑐐𑑂𑐰𑐴𑐵𑐮𑐶𑐂 𑐕𑑂𑐫𑐾𑐮𑑋 𑐟𑐬 𑐀𑐎𑑂𑐚𑐾𑐨𑐶𑐫𑐣𑑄 𑐴𑐟𑐵𑑅 𑐟𑑂𑐫𑐵𑐟𑑋 𑐰𑐫𑑂𑐎𑑅 𑐬𑑀𑐩𑐣 𑐳𑐵𑐩𑑂𑐬𑐵𑐖𑑂𑐫𑐫𑐵 𑐱𑐵𑐳𑐎 𑐖𑐸𑐫𑐵𑐡𑐶𑐮 𑐰 𑐀𑐐𑐳𑑂𑐚𑐳 𑐰𑐵 𑐳𑐶𑐖𑐬 𑐀𑐐𑐳𑑂𑐚𑐳𑐫𑐵 𑐣𑐵𑑄 𑐎𑐫𑐵𑐡𑐶𑐮𑑋 𑐰𑐫𑑂𑐎𑐮𑑄 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑑄 𑐩𑐶𑐳𑑂𑐬𑐫𑐵 𑐣𑐶𑐫𑐣𑑂𑐟𑑂𑐬𑐞 𑐠𑑅𑐐𑐸 𑐮𑑂𑐴𑐵𑐟𑐶𑐂 𑐎𑐫𑐵𑐡𑐶𑐮𑑋 𑐰𑐫𑑂𑐎𑑅𑐫𑐵 𑐬𑐵𑐖𑑂𑐫 𑐀𑐐𑐳𑑂𑐚𑐳𑐫𑐵 𑐀𑐢𑐷𑐣𑐫𑑂 𑐮𑐵𑐫𑐾𑐢𑐸𑑃𑐎𑐵 𑐰𑐫𑑂𑐎𑐮𑑄 𑐕𑐩𑑂𑐴 𑐊𑐳𑑂𑐥𑑄 (𑐰𑐶𑐲 𑐡𑐹𑐩𑑂𑐴 𑐧𑐷) 𑐠𑑅𑐂𑐟 𑐣𑑂𑐫𑐵𑐎𑐵 𑐁𑐟𑑂𑐩𑐴𑐟𑑂𑐫𑐵 𑐫𑐵𑐣𑐵𑐡𑐶𑐮𑑋 𑐊𑐣𑑂𑐚𑐣𑐷𑑄 𑐣𑑄 𑐁𑐟𑑂𑐩𑐴𑐟𑑂𑐫𑐵 𑐫𑐵𑐟𑑋

𑐳𑐶𑐖𑐬𑐶𑐫𑐣𑐫𑐵𑐟 𑐀𑐎𑑂𑐚𑐾𑐨𑐶𑐫𑐣𑑄 𑐳𑑂𑐫𑐵𑐟 𑐰 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵𑐫𑐵 𑐩𑐾𑐩𑐾𑐥𑐶𑑄 𑐩𑐳𑑂𑐟𑐫𑐾𑐟 𑐬𑑀𑐩𑐫𑑂 𑐎𑐿𑐡𑐷𑐫𑐵 𑐬𑐹𑐥𑐫𑑂 𑐫𑑄𑐎𑐮𑑋 𑐂𑐥𑐶𑑄𑐂 𑐣𑐶𑐩𑑂𑐴 𑐩𑐦𑐸𑐫𑐵 𑐳𑐷𑐟 𑐟𑐬 𑐎𑑂𑐮𑐶𑐫𑑀𑐥𑑂𑐫𑐚𑑂𑐬𑐵𑐫𑐵 𑐩𑑂𑐴𑐵𑐫𑑂 𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐳𑐾𑐮𑐶𑐣 𑐡𑑂𑐰𑐶𑐟𑐷𑐫𑑄 𑐀𑐦𑑂𑐬𑐶𑐎𑐵𑐫𑐵 𑐣𑐸𑐩𑐶𑐡𑐶𑐫𑐵𑐫𑐵 𑐖𑐸𑐖𑐸 𑐖𑐸𑐧𑐵 𑐡𑑂𑐰𑐶𑐟𑐷𑐫𑐣𑐵𑐥 𑐂𑐴𑐶𑐥𑐵 𑐫𑐵𑐟𑑋 𑐀𑐎𑑂𑐚𑐾𑐨𑐶𑐫𑐣𑑄 𑐂𑐩𑐶𑐟 𑐩𑐵𑐄𑐬𑐶𑐚𑐵𑐣𑐶𑐫𑐵𑐫𑑂 𑐱𑐵𑐳𑐣 𑐫𑐵𑐫𑐾𑐟 𑐕𑑂𑐰𑐮𑑋 𑐂𑐩𑐶𑐳𑑄 𑐠𑑅𑐐𑐸 𑐡𑐎𑑂𑐰𑑄 𑐖𑐷𑐰𑐣 𑐀𑐣 𑐴𑐾 𑐩𑑂𑐰𑐵𑐟 𑐰 𑐩𑐳𑑂𑐟 𑐡𑐫𑐾𑐎𑐮𑑋^[२] ^[३]

𑐎𑑂𑐮𑐶𑐫𑑀𑐥𑑂𑐫𑐵𑐚𑑂𑐬𑐵 𑐐𑐸𑐮𑐶 𑐟𑑅𑐩𑐶 𑐢𑐂𑐐𑐸 𑐰𑐶𑐲𑐫𑐫𑑂 𑐫𑐎𑑂𑐰 𑐧𑐵𑐏𑑃𑐟 𑐡𑐸 𑐟𑐬 𑐠𑐸𑐎𑐶𑐫𑐵 𑐰𑐵𑐳𑑂𑐟𑐰𑐶𑐎𑐟𑐵𑐫𑐵 𑐧𑐵𑐬𑐾𑐫𑑂 𑐗𑐷 𑐥𑐎𑑂𑐎𑐵 𑐖𑐸𑐂 𑐩𑐦𑐸𑑋 𑐡𑐳𑐸, 𑐕𑐥𑐸 𑐧𑐵𑐏𑑃 𑐎𑐠𑑄 𑐰𑐫𑑂𑐎𑐮𑑄 𑐠𑑅𑐐𑐸 𑐕𑑂𑐫𑐾𑑄𑐐𑐸 𑐣𑐵𑐂𑐳𑐾 𑐔𑑂𑐰𑑄𑐎𑐾𑐟 𑐡𑐸𑐬𑐹𑐂 𑐩𑑀𑐴𑑀 𑐮𑑂𑐴𑐸𑐂𑐐𑐸 𑐫𑐵𑑋 𑐕𑐥𑐸 𑐩𑐾𑐐𑐸 𑐧𑐵𑐏𑑃 𑐎𑐠𑑄 𑐰𑐫𑑂𑐎𑐮𑑄 𑐊𑑄𑐚𑐣𑐷𑐣𑐵𑐥 𑐰𑐫𑑂𑐎𑐮𑑄 𑐡𑐎𑐮𑐾 𑐠𑐶𑐎𑐾𑐐𑐸 𑐣𑐳𑐵 𑐡𑐫𑐾𑐎𑐾𑐦𑐸 𑐢𑐎𑐵 𑐧𑐵𑐖𑐷 𑐟𑐮𑑋 𑐧𑐵𑐖𑐷 𑐟𑑂𑐫𑐵𑐫𑐾𑐟 𑐰𑐫𑑂𑐎𑐮𑑄 𑐕𑐐𑐸 𑐩𑑀𑐟𑐶𑐫𑐵 𑐣𑑂𑐴𑑂𑐫𑐵𑐫𑑂𑐥𑑄 𑐧𑐵𑐮𑐷 𑐰𑐵𑐄𑑃𑐥𑐵𑐄𑑃(𑐨𑐶𑐣𑐾𑐐𑐬)𑐂 𑐮𑑂𑐰𑐵𑐎𑐕𑑂𑐫𑐵𑐣𑐵 𑐟𑑂𑐰𑐣𑐵𑐡𑐶𑐮𑑋

𑐮𑐶𑐢𑑄𑐳𑐵

↑ Bradford, Ernle Dusgate Selby 2000. Cleopatra . Penguin Group. 9780141390147 ISBN
↑ Roller D.W. 2003. The world of Juba II and Kleopatra Selene: royal scholarship on Rome's African frontier . Routledge, London.
↑ 𑐥𑑂𑐬𑐵𑐔𑐷𑐣 𑐩𑐵𑐄𑐬𑐷𑐚𑐵𑐣𑐶𑐫𑐵 𑐬𑐵𑐖𑑂𑐫 𑐁𑐫𑐵𑑅𑐐𑐸 𑐥𑐱𑑂𑐔𑐶𑐩 𑐳𑐴𑐵𑐬𑐵𑐫𑐵 𑐡𑐎𑑂𑐲𑐶𑐞𑐫𑑂 𑐊𑐚𑑂𑐮𑐵𑐞𑑂𑐚𑐶𑐎 𑐟𑐚𑐫𑑂, 𑐁𑐢𑐸𑐣𑐶𑐎 𑐩𑐵𑐄𑐬𑐷𑐚𑐵𑐣𑐶𑐫𑐵 𑐡𑐹𑐐𑐸 𑐠𑐵𑐳𑐫𑑂 𑐩𑐮𑐵 𑑋 𑐀𑐧𑐶𑐮𑐾𑐫𑐵 𑐬𑐵𑐖𑑂𑐫 𑐁𑑅𑐫𑐵 𑐀𑐮𑑂𑐖𑐾𑐬𑐶𑐫𑐵𑐡𑐹𑐐𑐸 𑐠𑐵𑐳𑐫𑑂 𑐡𑐫𑐵𑐔𑑂𑐰𑑄𑐐𑐸 𑐕𑐐𑐸 𑐧𑐬𑑂𑐧𑐬 𑐬𑐵𑐖𑐟𑐣𑑂𑐟𑑂𑐬 𑐏𑑋

विकिमिडिया मंका य् थ्व विषय नाप स्वापु दुगु मिडिया दु: Cleopatra VII of Egypt

[1] Bradford, Ernle Dusgate Selby 2000. Cleopatra . Penguin Group. 9780141390147 ISBN

[2] Roller D.W. 2003. The world of Juba II and Kleopatra Selene: royal scholarship on Rome's African frontier . Routledge, London.

[3] 𑐥𑑂𑐬𑐵𑐔𑐷𑐣 𑐩𑐵𑐄𑐬𑐷𑐚𑐵𑐣𑐶𑐫𑐵 𑐬𑐵𑐖𑑂𑐫 𑐁𑐫𑐵𑑅𑐐𑐸 𑐥𑐱𑑂𑐔𑐶𑐩 𑐳𑐴𑐵𑐬𑐵𑐫𑐵 𑐡𑐎𑑂𑐲𑐶𑐞𑐫𑑂 𑐊𑐚𑑂𑐮𑐵𑐞𑑂𑐚𑐶𑐎 𑐟𑐚𑐫𑑂, 𑐁𑐢𑐸𑐣𑐶𑐎 𑐩𑐵𑐄𑐬𑐷𑐚𑐵𑐣𑐶𑐫𑐵 𑐡𑐹𑐐𑐸 𑐠𑐵𑐳𑐫𑑂 𑐩𑐮𑐵 𑑋 𑐀𑐧𑐶𑐮𑐾𑐫𑐵 𑐬𑐵𑐖𑑂𑐫 𑐁𑑅𑐫𑐵 𑐀𑐮𑑂𑐖𑐾𑐬𑐶𑐫𑐵𑐡𑐹𑐐𑐸 𑐠𑐵𑐳𑐫𑑂 𑐡𑐫𑐵𑐔𑑂𑐰𑑄𑐐𑐸 𑐕𑐐𑐸 𑐧𑐬𑑂𑐧𑐬 𑐬𑐵𑐖𑐟𑐣𑑂𑐟𑑂𑐬 𑐏𑑋

[१]

[२]

[३]