झिंस्वंगु उपनिवेश
![](http://upload.wikimedia.org/wikipedia/commons/thumb/0/09/13_colonies_in_1775_%28large%29.png/200px-13_colonies_in_1775_%28large%29.png)
झिंस्वंगु उपनिवेश धाःगु उत्तर अमेरिकाय् न्हापा दूगु बेलायती उपनिवेशत ख। थ्व उपनिवेशतयेगु पलिस्था यक्व कारणं जूगु ख। छुं मनुत युरोपय् अबिलय् मदूगु चीज दसु तोबाकोया आधारय् ध्येबा दयेकेयात उपनिवेशय् थ्यन। मेमेपिं धाःसा धार्मिक स्वतन्त्रताया निंतिं वा न्हुगु सुरुवातया निंतिं उपनिवेशय् थ्यन। छुं मनुतयेसं थःगु नेतृत्त्वय् इंग्ल्यान्दय् थःइत मयःगु संस्कारय् मच्वनेत थन थ्यन। दकलय् न्हापांगु कोलोनी भर्जिनिया ख। थ्व कोलोनी सन् १६०७स जेम्सताउनय् पलिस्था जूगु ख। झिंस्वंगु उपनिवेशय् दकलय् लिपा पलिस्था जूगु उपनिवेश सन् १७३२स पलिस्था जूगु जर्जिया ख।
(उत्तरं दक्षिण तक्क सूचीबद्ध) १३गु उपनिवेश थ्व कथं दु-
- म्यासेच्युसेत्स्
- न्यु ह्याम्प्शायर
- रोद आइल्यान्द
- कनेक्तिकत
- न्यु यर्क
- न्यु जर्सी
- पेन्सिल्भेनिया
- देलावेर
- मेरील्यान्द
- भर्जिनिया
- नर्थ क्यारोलिना
- दक्षिण क्यारोलिना
- जर्जिया
फ्रेञ्च व इन्दियन हताः धुंका बेलायतं न्हुगु कर व थी-थी नियम दयेकल गुकिलिं उपनिवेशया मनुत रुष्ट जुल। थुकिया झ्वलय् बेलायत व उकिया उपनिवेशतयेगु दथुइ युद्ध जुवन। थ्व युद्धयात अमेरिकी क्रान्तिकारी युद्ध धाइगु या। उपनिवेशतयेसं जुलाई ४, सन् १७७६ खुनु स्वतन्त्रताया घोषणानापं थः स्वतन्त्र जूगु घोषणा यात। थ्व धुंका थ्व उपनिवेशत संयुक्त राज्य अमेरिका जुल।