विश्लेषणात्मक न्यायशास्त्र

विश्लेषणात्मक न्यायशास्त्र कानूनया छगू दार्शनिक दृष्टिकोण ख गुकिलिं आधुनिक विश्लेषणात्मक दर्शनया स्रोत साधनयात छ्यला कानूनया प्रकृति थुइकेगु कुतः याइ। थ्व न्यायशास्त्रया छगू कचा ख, गुकियात कानूनया दर्शन नं धाइ । विश्लेषणात्मक दर्शनया सीमा छुं भचा अस्पष्ट जूगुलिं थुकिया परिधि निर्धारण याये थाकु । एचएलए हार्ट आधुनिक विश्लेषणात्मक न्यायशास्त्रया इतिहासय् दकलय् प्रभावशाली च्वमि ख, यद्यपि न्यायशास्त्रया विश्लेषणात्मक दृष्टिकोण म्होति नं जेरेमी बेन्थमया ईले तक लिहां वं।

विश्लेषणात्मक न्यायशास्त्रयात कानूनी औपचारिकता (कानूनी तर्कयात यान्त्रिक, एल्गोरिदमिक प्रक्रियाया रुपय् मोडेल यायेगु वा यायेछिं धइगु बिचाः)या रुप नाप ज्व नः धैगु विचाः पाय्छि मजू। खय्त ला कानूनी औपचारिकतायात कानूनया सिद्धान्त धकाः मौलिक रुपं दकलय् न्हापां विश्लेषणात्मक न्यायाधीशतय्सं हे क्यंगु ख।

विश्लेषणात्मक, वा 'स्पष्टीकरणात्मक' न्यायशास्त्रं कानूनी प्रणालीया पक्षयात सन्दर्भित यायेबलय् तटस्थ दृष्टिकोण व वर्णनात्मक भाषा छ्यलि। कानून छु खः व छु जुइमाः धइगु प्राकृतिक कानूनया विचायात थुकिं अस्वीकार याइ । डेभिड ह्यूमं ए ट्रेटिस अफ ह्युमन नेचरय् प्रसिद्ध तर्क बियादिगु दु कि मनूतेसं अपरिहार्य रुपं संसार छगू निश्चित कथं (दयाच्वंगु) खः धकाः वर्णन यायेगु या व अथे जूगुलिं झीसं छगू विशेष क्रियाकलापय् लगे जुइमाः धकाः निष्कर्ष पिकाइगु गल्ती याइ। तर शुद्ध तर्कया जक रुपं स्वयेगु खःसा छुं खँ जूगुलिं जक झीसं छुं ज्या यायेमाः धकाः निष्कर्ष पिकाये फइमखु । अथे जुयाः विश्लेषण कथं संसारया मापदण्डयात मूल्यांकनात्मक न्ह्यसःत स्वयां ब्यागलं कथं कायेमाः।

विश्लेषणात्मक न्यायशास्त्रया दकलय् महत्त्वपूर्ण न्ह्यसःत थ्व कथं दु: " कानूनत छु ख ?"; "कानून छु खः ?"; "कानून व शक्तिया दथुइ छु स्वापू दु ?"; व "कानून व नैतिकताया दथुइ छु स्वापू दु ?"

थ्व नं स्वयादिसँ

• न्यायशास्त्र
• न्याय
• विधिया शासन
• वैधता
• उच्च विधि अनुसारया शासन