विलियम बट्लर येट्स
| विलियम बट्लर येट्स | |
|---|---|
 सन् १९०३स येट्स | |
| बूगु | 13 जुन सन् 1865 |
| मदूगु | 28 ज्यानुवरी 1939 (आयु 73) |
विलियम बटलर येट्स (जुन १३, १८६५ – २८ जनवरी १९३९) छम्ह आइरिश चिनाखँमि, दबूप्याखँमि (नाटककार) व च्वमि, व २०गु शताब्दीया साहित्यया छम्ह अग्रणी व्यक्तित्व ख। वय्कः आइरिश साहित्यिक पुनरुत्थानया छम्ह मू व्यक्तित्त्व ख, व जन मिलिङ्गटन सिन्ज व लेडी ग्रेगरी नापं, वय्कलं एबी थिएटरया पलिस्था यानादिल। वय्कलं थ्व थिएटरया प्रारम्भिक दँय् थुकिया प्रमुखया रुपय् ज्या यानादिल। सन् १९२३इ साहित्यय् वय्कःयात नोबेल सिरपाः लःल्हात, व लिपा निगु कार्यकाल तक आइरिश फ्री स्टेटया सेनेटरया रुपय् ज्या यानादिल ।
एंग्लो-आयरिश वंशजया प्रोटेस्टेन्ट, येट्सया जन्म स्यान्दिमाउन्त, आयरल्याण्डय् जूगु खः। वय्कःया अबु अधिवक्ता जुसें कानूनया अभ्यास यानादीम्ह खः, नापं, छम्ह सफल पोर्ट्रेट चित्रकार नं खः। वय्कलं डब्लिन व लन्दनय् शिक्षा कयादिल व मचाबलय्या बिदा काउन्टी स्लिगोय् बिकादिल। वय्कलं चीधंबलय् निसें हे चिनाखँ अध्ययन यानादिल। थ्व कालय् वय्कः आइरिश किम्बदन्ति व दन्त्यबाखँय् मोहित जुयादिल। लण्डनय् च्वनादीबलय् वय्कः आइरिश साहित्यिक पुनरुत्थानया छम्ह दुजः जुयादिल। वय्कःया प्रारम्भिक काव्यय् जन कीट्स, विलियम वर्डस्वर्थ, विलियम ब्लेक व मेमेपिं यक्वं प्रभावित याःगु जुल। थ्व विषयत वय्कःया ज्याया न्हापांगु चरणय् थ्व खनेदु। थ्व काल डब्लिनया मेट्रोपोलिटन स्कूल अफ आर्टय् वय्कःया विद्यार्थी ई निसें शताब्दीया अन्त्य तक्क दयाच्वन। वय्कःया दकलय् न्हापांगु चिनाखँ सफू सन् १८८९य् पिहांवल, व थुकिलि मन्द गतिइ, आधुनिकतावादी व छ्न्दात्मक चिनाखँतेसं एडमण्ड स्पेन्सर, पर्सी बाइशे शेली व प्रि-राफेलाइट ब्रदरहुडया चिनाखँमितेगु गुण क्यनि।
सन् १९०० निसें वय्कःया काव्यया भौतिक, यथार्थवादी व राजनीतिकरण रुपान्तरण जुल । वय्कः जीवनया चक्रीय सिद्धान्तया छुं तत्वय् व्यस्त जुयाच्वंसां वय्कः थःगु युवावस्थाया पारलौकिक विश्वासं तापाना वन । वय्कः सन् १८९७इ आइरिश साहित्यिक दबूया मू नाटककार जुयादिल, व न्हापां हे एज्रा पाउण्ड थें न्यापिं ल्याय्म्ह चिनाखँमितेत प्रवर्द्धन यानादिल। वय्कःया मू कृतिइ द ल्यान्द अफ हार्ट्स डिजायर (१८९४), क्याथलीन नि हौलिहान (१९०२), डेइरद्रे (१९०७), द वाइल्ड स्वान्स एट कूल (१९१९), द टावर (१९२८) व लास्ट पोम्स एण्ड प्लेज (१९४०) ला।
राजनीति
[सम्पादन]
येट्स छम्ह आयरिश राष्ट्रवादी खः, गुम्हेस्यां 'द फिशरम्यान' थेंज्याःगु चिनाखँया माध्यमं परम्परागत जीवनशैली मालादिल । तर वय्कःया जीवनया प्रगति जुजुं वनेवं वय्कलं थःगु क्रान्तिकारी भावनाया यक्व भागयात आश्रय बियादिल व सन् १९२२ तक्क तीव्र राजनीतिक परिदृश्यं थःत तापाकादिल। १९२२स वय्कःयात आइरिश स्वतन्त्र राज्यया निंतिं सेनेटर नियुक्त यात। [१] [२]
वय्कःया जीवनया न्हापांगु भागय् येट्स आइरिश रिपब्लिकन ब्रदरहुडया दुजः ख। सन् १९३०या दशकय् येट्स युरोपया निरंकुश, लोकतान्त्रिक विरोधी, राष्ट्रवादी आन्दोलनय् मोहित जुल, व वय्कलं ब्लुशर्टया निंतिं यक्व मार्चिङ म्ये दयेकल। यद्यपि, थ्व म्येत गबलें छ्येलाय् मवल। वय्कः व्यक्तिवाद व राजनीतिक उदारवादया कडा विरोधी खःसा वय्कलं फासीवादी आन्दोलनयात सार्वजनिक व्यवस्था व क्षुद्र व्यक्तिवादया विरुद्ध राष्ट्रिय सामूहिकताया आवश्यकताया विजयया रुपय् कयादिल । वय्कः छम्ह अभिजातवर्गवादी ख गुम्हेस्यां भीड-शासनया विचारयात घृणा यानादिल, व लोकतन्त्रयात सुशासन व सार्वजनिक व्यवस्थाया निंतिं खतराया रुपय् खनादिल। आयरल्याण्डय् ब्लुशर्ट आन्दोलन असफल जुइगु इलय् वय्कलं थःगु न्हापाया धारणापाखें छुं भचा तापाः यानादिल, तर निरंकुश व राष्ट्रवादी नेतृत्वयात प्राथमिकता समर्थन यानादिल ।
लिधंसा
[सम्पादन]- ↑ Sanford, John (18 April 2001). Roy Foster: Yeats emerged as poet of Irish Revolution, despite past political beliefs. Stanford University.
- ↑ Ellmann 1948.