लुइकेगु युग

A replica of the Spanish carrack

A replica of the Portuguese carrack

A replica of the French carrack

मालेज्याया युग, लुइकेगु युग (थ्यं-मथ्यं सन् १४१८ निसें सन् १६२० तक) बाय् अन्वेषणया युग प्रारम्भिक आधुनिक कालया छगू भाग ख व पाल-लखःया युगनाप क्वातुक स्वापू दूगु युग ख। थ्व ई करिब १५गु निसें १७गु शताब्दीया ई ख, गुकिलि युरोपियन देय् या समुद्री यात्रीतेसं हलिंन्यंकया क्षेत्रया अन्वेषण, उपनिवेश व विजय यात। थ्व युग छगू परिवर्तनकारी ई ख गुबले हलिंया अलग-अलग भागतेत स्वानाः हलिं-प्रणाली दयेकल, व विश्वव्यापीकरणया आधार दयेकल। व्यापक विदेशी सामुद्रिक अन्वेषण, विशेष यानाः पूर्वी भारतया समुद्री मार्ग चायेकेगु, स्पेनिश व पोर्चुगिजतय्सं अमेरिकाया युरोपियन उपनिवेश दयेकूगु, व लिपा अंग्रेजी, फ्रान्सेली व डचतय्सं थ्व ज्याझ्वलय् ब्वति कयाः अन्तर्राष्ट्रिय वैश्विक व्यापारयात प्रेरित यात। २१गु शताब्दीया अन्तरसम्बन्धित विश्व अर्थतन्त्रया उत्पत्ति थ्व युगय् व्यापारिक संजालया विस्तारय् जूगु ख।

थ्व अन्वेषणं उपनिवेशवादी साम्राज्यत दयेकल व यक्व युरोपियन राज्यतेसं उपनिवेशवादयात सरकारी नीतिया रुपय् नालाकाल। थुकथं, थ्व युगयात गबलें गबलें युरोपेली उपनिवेशया न्हापांगु लहरया पर्यायवाची कथं थुइकेगु नं जुइ । थ्व उपनिवेशवादं शक्ति गतिशीलतायात पुनःआकार बिल गुकिलिं युरोपय् भूराजनीतिक हिउपाः वल व युरोप स्वया पिने न्हुगु शक्ति केन्द्र दयेकल। मानव इतिहासयात विश्वव्यापी साझा मार्गय् तयाः वंगु थ्व युगया प्रभावं थौं नं विश्वया आकार बियाच्वंगु दु।

युरोपियन महासागरीय अन्वेषण सन् १३३६इ क्यानरी टापुइ पोर्चुगलया समुद्री अभियानं न्ह्याःगु ख, व पोर्चुगिजतेसं एटलान्टिक द्वीपसमूह मदेइरा व अजोरेस, पश्चिम अफ्रिकाया तट सन् १४३४य् लुइकूगु व सन् १४३४य् पश्चिम अफ्रिकाया तट व भारतया समुद्री मार्गया स्थापना भास्को दे गामां १४९८स केरल व हिन्द महासागरय् पुर्तगाली समुद्री व व्यापारिक उपस्थितिया कथं दयेकल। स्पेनं क्रिस्टोफर कोलम्बसया ट्रान्सएटलान्टिक समुद्रया यात्रायात प्रायोजन व वित्तपोषण यात, गुकिलिं सन् १४९२ निसें १५०४ तक्क अमेरिकाय् उपनिवेशया शुरुवात जुल, व पोर्चुगिज अन्वेषक फर्डिनेन्ड म्यागेलनया अभियानं एटलान्टिकं प्रशान्त महासागर तक्कया मार्ग चायेकल, गुकिलिं लिपा न्हापांगु सर्कमन्याभिगेसन १५१९ व १५२२या दथुइ यात। थुगु स्पेनिश अभियानं हलिंया युरोपियन धारणायात यक्व हे प्रभावित यात। थ्व लुइकेगु ज्यां एटलान्टिक, भारतीय व प्रशान्त महासागर पार यानाः यक्व नौसेना अभियान व अमेरिका, एसिया, अफ्रिका व अष्ट्रेलियाय् भूमि अभियान १९गु शताब्दी तक्क न्ह्यात व २०गु शताब्दीइ ध्रुवीय अन्वेषण जुल।

युरोपियन अन्वेषणं पुलांगु हलिं (युरोप, एसिया, व अफ्रिका) व न्हुगु हलिं (अमेरिका) दथुइ कोलम्बियाया कायेबिये ज्या न्ह्यथन। थ्व आदानप्रदानय् पूर्वी व पश्चिमी गोलार्धय् वनस्पति, पशु, मनुया जनसंख्या ( दास नापं), संक्रामक ल्वे, व संस्कृतिया हस्तान्तरण दुथ्याः। खोजया युग व युरोपेली अन्वेषणय् हलिंया नक्सा दयेकेगु, न्हुगु हलिंदृष्टिकोणया आकार दयेकेगु व तापाःगु सभ्यतानाप स्वापू तयेगु ज्या दुथ्याःगु ख। युरोपेली नक्सा दयेकिपिंसं दयेकूगु महाद्वीपत अमूर्त रुपं निसें झीसं अप्व म्हसीके फइगु रुपरेखाय् विकास जुल। नापं, न्हुगु ल्वेया प्रसार, विशेष यानाः अमेरिकी आदिवासीतेत प्रभावित यात व इमिगु जनसंख्याय् तीव्र ह्रासया कारण जुल। थ्व युगय् आदिवासी जनजातिया व्यापक दासता, शोषण व सैन्य पराजय खनेदत, पश्चिमी संस्कृतिया वृद्धिशील आर्थिक प्रभाव व प्रसारलिसे समवर्ती, विज्ञान व प्रविधिं छगू द्रुत जनसंख्या वृद्धि विश्वव्यापी रुपं न्ह्यःथन।