लानिकाई समुद्री तट

Lanikai Beach with the twin islands of Nā Mokulua

Beachgoers on Lanikai Beach

लानिकाइ समुन्द्र सिथय् मनूत

लानिकाई समुद्र तट वा का ʻओहाओ समुद्र तट काʻओहाओ समुदाय, काइलुआ नगरय् दूगु छगू समुद्र सिथ ख। थ्व बीच ओआहु, हवाईया विन्दवार्द तटय् ला। लानिकाइ नांया अर्थ "स्वर्गीय समुद्र" ख धइगु व्यापक विश्वास दुसां थ्व छगू भ्रम व व्याकरणिक त्रुटि ख, छाय् धाःसा हवाई भाषाय् विशेषण (लानि) संज्ञा (काइ)या लिउने वइ, न्ह्यःने मखु। लानिकाइ नां सन् १९२०या दशकय् बसोबास विकासकर्ता चार्ल्स फ्रेजरं आविष्कार याःगु खः। वय्कःया हवाईयन भासय् काओहाओ धकाः म्हसीकातःगु थासय् समुद्रया सिथय् ३०० एकड सम्पत्ति दुगु खः । थ्व चिधंगु बा-माइलया समुद्री तटया हाकः निरन्तर रुपं हलिंया दकलय् बांलाःगु समुद्री तटया धलखय् लानाच्वंगु दु । लानिकाइ समुद्र तटया लिक्कसं छगू मुख्यतः उच्च वर्गीय आवासीय क्षेत्र ख व थुकिया कारणं थ्व थासय् थ्यनेत सार्वजनिक समुद्र तटया लं छ्यला जक वनेछिं। थ्व समुद्र तट स्वयं सार्वजनिक सम्पत्ति जूसां थ्व राज्यया जग्गा मखु व हवाईया यक्व समुद्र तट थें काउन्टी समुद्र तट पार्क मखु। थन सार्वजनिक पार्किङ मदु व नापं सार्वजनिक शौचालय, शावर वा लाइफगार्ड थेंज्याःगु सुविधा मदु। सन् २०१४ जुलाई १ निसें समुद्रया सिथय् दुहां वनेगु थाय् घेरे यानातःगु आवासीय क्षेत्रय् मनूतय्सं गैरकानूनी रुपं पार्किङ यायेगु पनेगु कुतःया झ्वलय् पार्किङ उल्लंघन याःगु जरिवाना ३५ डलरं २०० डलर तक अप्वयेकूगु दु । पार्किङ उल्लंघन कडा रुपं लागू जुइ व थुकी मेमेगु कडा नियम दसु: ड्राइभवे ध्वखा वा एप्रनया प्यंगू फिट दुने पार्किङ यायेमदूगु, थीथी थासय् न्यासेवनिपिनिगु लँपुयात अवरुद्ध याये मदूगु, स्टप साइनया ३० फिट दुने, छगू मि-लःस्रोत (फायर हाइड्रेन्ट)या झिगू फिट दुने व क्रसवाकया २० फिट दुने गसा दिके मज्यूगु नियम दुथ्या। अथे जुसां, काइलुआया डाउनटाउनय् कानूनी पार्किङ्ग लागा दु ।

वाःया न्हिइ समुद्रया सिथय् सप्ताहन्तया तुलनाय् म्हो जक भीड जुइ, यद्यपि सार्वजनिक समुद्रया सिथय् वनेगु छगू पहुँचया लिक्क पार्किङ मालेत अझ नं तसकं थाकुइ। सप्ताहन्तय् समुद्रया सिथय् तसकं भीडभाड जुइगु व चिकुला व गर्मीया बिदाया इलय् समुद्रया सिथय् न्हिंन्हिं लगभग पूर्ण रुपं भीडभाड जुइगु या। लानिकाइ नांजाःपिं मोडल व फोटोग्राफरत बांलाःगु न्हिइ वइगु जूगुलिं फोटो सुटया निंतिं छगू लोकंह्वाःगु थाय् खः । लानिकाइ समुद्र तटयात फोटोग्राफरतेगु निंतिं लोकंह्वाःगुया कारण धाःसा थनया पृष्ठभूमिइ खनिगु निगु टापु ख गुकियात ना मोकुलुआ वा "मोक्स" धाइ। कायाकर्सतय्सं थनं प्रायः तःधंगु उत्तरी टापुइ कायाक याइ, तर दक्षिणी टापु झंगः अभयारण्य जूगुलिं सुयातं अन अवतरण याये मदु । लःया तापक्रम अप्वः धया थें 75–80 °F (24–27 °C) जुइ । थनया बीचय् तसकं नाइसे च्वंगु पाउडर थें जाःगु पीचूगु तुयुगु फि दु। लानिकाइ बीचयात नियमित रुपं अमेरिकाया दकलय् बांलाःगु समुद्र तटया रुपय् मतदान याइगु या। नापं, हलिंया दकलय् बांलाःगु समुद्र तटया रुपय् मतदान जूगु थ्व अमेरिकाया छगू जक बीच खः। लानिकाई समुद्र तटय् प्राचीन समुद्र व थीथी समुद्री जीवनया कारणं पाहां लिसें स्थानीय मनूतय्गु निंतिं नं स्नोर्कलिङ यायेगु छगू अद्वितीय अनुभव खः ।

टापुया विन्डवार्ड वा पूर्वपाखे लाःगुलिं लानिकाइयात मोकुलुआसय् चन्द्रोदय स्वयेगु छगू बांलाःगु थाय् कथं कायेगु याः, विशेष यानाः पुन्हि बिलय् । दच्छिया दुने गुबलें गुबलें ना मोकुलुआ टापुया दथुइ तप्यंक निभाः त्वइ ।