मिलिनियम पार्क
अमेरिकाया न्ययग राज्य मध्यय् इलिनोय राज्यय् च्वंगु छगू तःधंगु शहर खः- शिकागो। शिकागोयात छगू तसक आकर्षक पर्यटन केन्द्रकथं नं नालातःगु दु । शिकागोया मू म् आकर्षण केन्द्रत शहरय् दु- अय् धैगु थनया भासं धायेगु खःसा डाउन टाउन । शिकागोया डाउन टाउनया तसक ब्यस्त जुइगु थाय् धैगु स्टेट स्ट्रीट खःसा मेगु मिचिगन एभेन्यू खः। थुगु नितां लँपु उत्तर दक्षिण स्वया: न्ह्या: वनाच्चंगु दु । मिचिगन एभेन्यू ब्यापारिक दृष्टिकोण नं उलि हे ब्यस्तगु लपु खः। अथे हे थी थी आकर्षणया छगू मू केन्द्र बिन्दु नं खः । थ्व हे मिचिगन एभेन्यू व रायनडोल्फ स्ट्रीटय् अवस्थित तसक नांजा:गु, बांला:गु पार्कया नां ख: मिलिनियम पार्क। ९.९ हेक्टर क्षेत्रफल थाय् कयात:गु थुगु पार्क सन् २००४ जुलाइ १६ खुन्हु बिधिवतकथं उलेज्या जूगु खः । थुगु उलेज्या स्वन्हु तक थी थी ज्याझ्वः न्ह्याका: क्वचायेक्गु खः। मिलिनियम पार्क दयेकेगु बिचा: उगु ईया मेयर भाजु रिचाड एम डेलिपाखें हःगु खः। न्हापां ला थुगु पार्कयात Garden of the Arts धका: नां छुइगु क्व:छ्यगु खः। अथेसां जोन ब्रायन, सारा ली या पुलांम्ह सिइओपाखें थ्व पार्कया नां मिलिनियम पाक हे जुइमा: धका: जिद्धि यानाः आः धस्वानाच्चंगु व पाकया नां मिलिनियम पार्क जूगु खः।
थुगु पार्कया दुने दुगु मेगु छगू आकषणया वस्तु खः क्लाउद गेत गुकियात The Bean धका: नं धाइ । बूब: सिमिया आकार वःगु जुयाः थुकिया नां द बीन धका: त:गु खः । द बीन छगू स्कल्प्चर कथं दयेका तःगु खः । कम्प्यूटर प्रविधि छ्यला: थुकिया डिजाइन अनिश कपुर धैम्ह मनुखं सिर्जना याःगु खः। वय्कः मुम्बइलय् बूम्ह ब्रिटिस-इन्डियन मूर्तिकार ख: ।
थ्व बीन दयेकेत १६८ गू स्टेनलेस स्टीलया झ्यातुगु पातात स्वाना: थुकिया आकार वयेकूगु खः । द बीन या क्वय् चना: स्वयेबलय् जःखः दुगु ततःजाःगु भवनत लिसें शिकागो स्काइलाइन अन परिवर्तित जुयाच्चंगु खनेदइ। तसक तल्के जूग थुकियात मर्मतकथं न्हियान्हिथं हुइगु लिसें तल्के यानाः सफा यानातइ। दँय् निक: ४० ग्यालेन तरल डिटरजेन्टं थुकियात सफा याइ, बांलाकी। शिकागोय् वइपिं पर्यंटकतसें थुकिया क्वसं च्चनाः फोटो कायेगु छगूकथं तःजिगु ह्वःताः तायेकी।
मिलिनियम पार्कया तःलय् २२१८ ग्वः मोटर न्ह्यंगु पार्किङ्ग ग्यारेज नं दु। अथे हे रेलरोड यार्ड नं दु। सन २०१७ या तथ्यांककथं उगु दय् थ्व थासय् २ कोटी ५० लखः मनुखं स्वःवःगु खः । शिकागोया पर्यंटकतय् दकलय् अप्व: मिखा वनीगु वा दुस्वइगु थाय् आर्ट इन्स्टिच्यूट अफ शिकागो खःसा मिलिनियम पाक निगूगु थासय् ला:। अप्वःस्यां धायेगु याः मिलिनियम पार्क छक: चाःमहिल धा:सा शिकागो मथ्यं थें जुइ । मिलिनियम पाक दुनेया मेगु आकर्षण Pritzker Pavillon व पेदेस्तेरियन ब्रिज नं खः ।
थ्व निगुलिंया डिजाइन क्यानाडाय् जन्म जम्ह अमेरिकन आकिटेक्ट Frank Gehry याःगु खः। थुगु प्याभिलियनय् ११००० मनूत न्ह्यं अले थुकिया बिशेषता धैगु State of the Art Sound System छ्यःगु खः ।
अथे हे मेगु तसक बांलाक दयेका तःगु पर्यटकतय् मिखा वनीगु निग: Tower of Crown Fountain खः। प्रत्येक Fountain १०००० खाःया अप्पां दयेका तःगु खः । अले थुगु फाउन्तेनय् शिकागोया १००० म्ह मनूतय् ख्वाःपाः ब्वयातःगु दु, लिसेँ उगु ख्वाःपाःया म्हतुं लःधाः पलख पलख दिका: ल्ह्वया हइगु तसक स्वये बह-गु लू खः ।
सुथय् ६ ताः इल॑निसें बहनी ११ इतक चालीगु थुगु मिलिनियम पाकय् मे महिनांनिसें अक्टोवर महिनातक निशुल्क टुरया ब्यवस्था नं यानातःगु दु। तसक व्यवस्थितकथं संचालन जुयाच्चंगु मिलिनियम पार्कया ब्यवस्था शिकागो डिपार्टमेन्ट अफ कल्चरल एफेयसपाखें जुयाच्चंगु दु ।