माउन्त रशमोर
माउन्त रशमोर राष्ट्रिय स्मारक संयुक्त राज्य अमेरिकाया छगू राष्ट्रिय स्मारक ख। थ्व स्मारक संयुक्त राज्य अमेरिकाया साउद डकोटाया ब्ल्याक हिल्सया कीस्टोनया लिक्क लाःगु माउन्ट रशमोरया ग्रेनाइट पाखाय् ल्वहँय् दयेकातःगु छगू तःधंगु प्रस्तर मूर्तिइ केन्द्रित दु। मूर्तिकार गुत्जोन बोर्ग्लमं (Gutzon Borglum) थुकियात लोकतन्त्रया तीर्थस्थल (Shrine of Democracy) नां तयादिल व सन् १९२७ निसें १९४१ तक्क थः काय् लिंकन बोर्ग्लमया ग्वहालिं दयेकादिल। थ्व मूर्तिकलाय् संयुक्त राज्य अमेरिकाया प्यम्ह राष्ट्रपतितेगु ख्वा कियातःगु दु: जर्ज वाशिङ्गटन, थोमस जेफरसन, थियोदर रुजभेल्त व अब्राहम लिंकन। थ्व प्यम्ह राष्ट्रपतिपिन्त अमेरिकी राष्ट्रया जन्म, वृद्धि, विकास व संरक्षणया प्रतिनिधित्वया निंतिं ल्यःगु खः। माउन्त रशमोरं दँय् २० लख स्वया अप्व पाहाँ वइ। थ्व स्मारक पार्क दुने १,२७८ एकड (२.०० वर्ग माइल; ५.१७ वर्ग किमि)बुँ ला। थ्व पर्वःया जाः समुद्र सतह स्वया ५,७२५ फीट (१,७४५ मिटर) दु।
बोर्ग्लमं माउन्ट रशमोरयात थ्व पर्वतय् त्वइगु अधिकतम निभाःया जःया निंतिं दक्षिणपूर्वया भाग ल्यादीगु ख। ल्वहँय् मूर्ति दयेकीगु ज्याया बिचाः धाःसा साउथ डकोटा राज्यया इतिहासकार दन रबिन्सनया ख। रबिन्सनं मूल रुपं मूर्तिकलाय् अमेरिकी पश्चिमया नायःत, गथेकि लुइस व क्लार्क , इमिगु अभियानया गाइड साकागावेआ , ओग्लाला लाकोटा नायः रेड क्लाउड, बफेलो बिल कोडी, व ओग्लाला लाकोटा नायः क्रेजी हर्सया चित्रण यायेगु इच्छा याःगु खः। बोर्ग्लमं थुकिया पलेसा प्यम्ह राष्ट्रपति ल्ययादिल।
पीटर नोर्बेक (Peter Norbeck), साउथ डकोटाया अमेरिकी सेनेटरं थ्व परियोजना प्रायोजन यानाः संघीय कोष सुरक्षित यानादिल। सन् १९२७इ निर्माण ज्या न्ह्यात व सन् १९३४ निसें १९३९या दथुइ राष्ट्रपतितेगु ख्वाः दयेकेगु ज्या क्वचाल। सन् १९४१या मार्चय् गुत्जोन बोर्ग्लम मदयेधुंका वय्कःया काय् लिंकनं निर्माण परियोजनाया नायःया जिम्मेवारी कायादिल। सकल राष्ट्रपतिया मूल चित्रण छ्यंनिसें जं तक्कया दयेकीगु बिचाः जुसां आर्थिक अभावं निर्माण ज्या सन् १९४१ अक्टोबर ३१ खुनु क्वचायेकेमाल व वाशिंगटनया मूर्तिकलाय् जक ख्वा स्वया क्वसं छुं विवरण दुथ्याःगु दु।