बन्तेय मिन्चेय् प्रदेश

 

बन्तेय मिन्चेय् कम्बोडियाया छगू प्रान्त ख। थ्व प्रान्त थ्व देय्या सुदूर उत्तरपश्चिमय् ला। थ्व प्रान्तया उत्तरय् ओद्दार मीन्चेय् प्रान्त, पूर्वय् सिम रियाप, दक्षिणय् बात्दम्बङ प्रान्त दु व पश्चिमय् थाइल्याण्डनाप अन्तर्राष्ट्रिय सीमा स्वानाच्वंगु दु। थुकिया मूज्याकुथि व दकलय् तःधंगु नगर सेरेइ साओफोआन ख।

बन्तेय मिन्चेय् कम्बोडियाया १३गु दकलय् तःधंगु प्रान्त ख। ८,६१,८८३ जनसंख्या दूगु थ्व थाय् देय् या न्यागूगु दकलय् अप्व जनसंख्या दूगु प्रान्त ख। थ्व प्रान्तया पश्चिमी भागय् लाःगु पोइपेत नगर थाइल्याण्डय् वनिगु छगू अन्तर्राष्ट्रिय सीमाना ख। तोन्ले साप बायोस्फीयर रिजर्भया भूभागय् लाःगु न्यागू प्रान्तय् बान्ते मीन्चेय् छगू ख।

व्युत्पत्ति

बन्तेय मिन्चेय् या अर्थ खमेर भासं "विजयी किल्ला" ख। चेय् खँग्वः ( ជ័យ ) संस्कृत खँग्वः जय पाखें वःगु ख, गुकिया अर्थ "विजय" ख। थ्व नापं मीन មាន या अर्थ "दयेमाःगु" खः, उकिं निगुलिंया संयोजनया शाब्दिक अर्थ "विजय दयेमाःगु" व बन्तेय ( បន្ទាយ ) छगु खमेर खँग्वः ख गुकिया अर्थ "किल्ला" वा "क्वाः" ख।

इतिहास

बान्तेय छमर देगःया भग्नावशेष

थ्व थाय् ब्यापक खमेर साम्राज्यया छगू भाग ख। थुकिया दकलय् उल्लेखनीय अवशेष १२गु शताब्दीइ व १३गु शताब्दीपाखे दयेकूगु प्रान्तया उत्तरय् च्वंगु बान्तेय् छ्मार देगः ख। थन दूगु मेमेगु म्हो जक म्हस्यूगु देगःत बान्तेय नेआङ व बान्तेय तोर्प देगः खः ।

सन् १७९५इ स्यामं पश्चिमी कम्बोडियाया नियन्त्रण काल, व थ्व थाय् यात भित्री कम्बोडियाया स्याम प्रान्त दयेकल गुकिया प्रशासन राजधानी फ्रा तबोङ (बात्दम्बङ)य् ला। थ्व प्रान्त सन् १९०७ तक्क दयाच्वन गुबले सियामं त्रात व दान साइया निंतिं भित्री कम्बोडियायागु बँ-हिला यात। थ्व हे दँय् जुजु सिसोवाथं लिहां वःगु भित्री कम्बोडियाया प्रान्तयात बात्दम्बङ प्रान्त (सिसोफोन नापं) व सिम रियाप प्रान्तय् ब्वथलेगु निर्णय यात। सन् १९४१य् थाइल्याण्डं पश्चिमी कम्बोडियायात हाकनं विलय यायेबलय् सिसोफोन बात्दम्बङ प्रान्तं विभाजित जुल व फिबुनसोङक्राम प्रान्तया प्रशासनिक राजधानी जुल गुकिलिं सन् १९४६ तक्क दयाच्वन गुबले थ्व फुक्क क्षेत्र फ्रान्सेली नियन्त्रणय् लात।

सन् १९८८इ बत्तेय मीन्चेय् प्रान्त बात्दम्बङं अलग जुल, गुकिलि मूल रुपं ५गु जिल्ला मोङकोल बोरेइ, थमार पुओक, सेरेइ साओफोआन, प्रेह नेत प्रेह व नोम स्रोक दु।

सन् १९७० व १९८०या दशकया कम्बोडियाया गृहयुद्धया इलय् बान्तेय मीन्चेय् प्रान्त यक्व ल्वापुया अग्रपंक्तिइ लाःगु ख व थुकिया लिच्वः कथं थ्व प्रान्त पैलिन व बात्दम्बङ नापं कम्बोडियाया दकलय् अप्व ल्यान्दमाइन दूगु स्वंगु प्रान्तय् छगू ख।

भूगोल

सेरेइ साओफोआनया चिकिचाधंगु पुखू ।

बन्तेय मीन्चेय् अप्व यानाः तःधंगु चकं-बँ दु, गुकिलि उत्तर व पूर्वय् छुं गुं व च्वका दु। थ्व खुसिया मू खुसि मोङकोल बोरेइ व सिसोफोन खुसि ख। थ्व प्रान्तया दक्षिणय् बात्दम्बङ , पूर्वय् सिम रियाप, उत्तरय् ओदर मीन्चेय् व पश्चिम व उत्तरय् थाइल्याण्ड ला।

धर्म

राज्य धर्म थेरवाद बौद्ध धर्म ख। बान्तेय मीन्चेय् प्रान्तया ९९.३% स्वया अप्व मनुत बौद्ध धर्मावलम्बी ख। बन्ते मीन्चेय् प्रान्तया करिब ०.४% जनसंख्या इस्लाम धर्मया अनुसरण याइ व वयां लिपा चाम धर्मया अनुसरण याइ। थ्व प्रान्तय् ईसाई धर्म ०.२% दु।

अर्थव्यवस्था

पोइपेट अन्तर्राष्ट्रिय सीमा नाका

पोइपेट अन्तर्राष्ट्रिय सीमा नाका

बान्ते मीन्चेय् प्रान्त दुने कम्बोडियाया दकलय् व्यस्त नाका मध्ये छगू पोइपेट अन्तर्राष्ट्रिय सीमा नाका दु, गन मनू व सामान निगुलिंया निंतिं दु । थ्व नाकाय् करिब २००० पर्यटक (५०,००० पर्यटक वा २०१५स देय् या पर्यटकया १४%) व न्हिथं सामान ल्ह्यइगु ३०० ट्रक जुइ।

बुंज्या

थ्व प्रान्तया अर्थतन्त्रय् बुँज्या, विशेष यानाः वाया तसकं महत्त्वपूर्ण भूमिका दु।

प्रशासन

थ्व प्रान्तयात ७गु जिल्ला ( स्रोक ) व २गु नगर पालिका ( क्रोङ )य् उपविभाजित यानातःगु दु, गुकियात अझ ५५गु कम्युन ( खुम ) व १०गु क्वार्टर ( सङकत ), व ६५४गु गां ( फुम )य् उपविभाजित यानातःगु दु।

आइएसओ कोड	नाँ	ख्मेर	मनूल्या (२०१९)	उपविभाग
— नगर पालिका —
०१-०६	सेरेइ साओफोआन	សិរីសោភ័ណ	९९,०१९	७ सङकत
०१-१०	पोइपेत	ប៉ោយប៉ែត	९८,९३४	३ सङकत
- जिल्ला -
०१-०२	मोङकोल बोरे	មង្គលបូរី	१८७,२८६	१३ खुम
०१-०३	नोम स्रोक	ភ្នំស្រុក	६५,९४५	६ खुम
०१-०४	प्रेह नेत्र प्रेह	ព្រះនេត្រព្រះ	१२४,९०२	९ खुम
०१-०५	ओउ क्रोभ	អូរជ្រៅ	६३,४१३	७ खुम
०१-०७	थ्मा पुओक	ថ្មពួក	७६,९२६	६ खुम
०१-०८	स्वाय् चेक	ស្វាយចេក	८१,१०६	८ खुम
०१-०९	मलाई	ម៉ាឡៃ	५५,७२१	६ खुम

बान्तेय् छ्मारया छपा पःखाः

खाइ, पूर्वपाखेया किपा

देगःया जःखःया लँपु व गाः

चम्पा विरुद्ध खमेरया हःताःया चित्रण यानातःगु ल्वहँकिपा