प्रारम्भिक आधुनिक काल

पाओलो पेट्रिनिं दयेकूगु हलिंया १७०० मानकिपा

प्रारम्भिक आधुनिक काल छगू ऐतिहासिक कालखण्ड ख गुकियात आधुनिक काल स्वया न्ह्यःया कालया रुपय् परिभाषित याइ। थ्व कालया ब्वथला मू रुपं युरोपया इतिहास व आधुनिकताया व्यापक अवधारणाय् आधारित दु। थ्व ईया शुरुवात वा अन्त्यया निश्चित तिथि मदु व इतिहास अध्ययनया विधाकथं थ्व कालखण्ड पायेफु। सामान्यतया, प्रारम्भिक आधुनिक काल थ्यं-मथ्यं १६गु शताब्दीया शुरुइ निसें १९गु शताब्दीया शुरुइ (लगभग १५००–१८००) तक्कया ई कथं कायेगु या। युरोपियन सन्दर्भय् थ्व ईयात मध्य युग धुंका व आधुनिकताया आगमन स्वया न्ह्यःया ईया रुपय् परिभाषित याइ; तर थ्व सीमाया तिथि सर्वव्यापी सहमति मदु। हलिं इतिहासया सन्दर्भय् प्रारम्भिक आधुनिक ई प्रायः समकक्ष "मध्यकालीन" ई मदुगु सन्दर्भय् नं छ्येलिगु या।

थी-थी घटना व ऐतिहासिक संक्रमणयात प्रारम्भिक आधुनिक कालया शुरुवातया रुपय् प्रस्तावित याःगु दु, गुकिलि सन् १४५३इ कन्स्ट्यान्टिनोपलया पतन, पुनर्जागरणया शुरुवात, धर्मयुद्धया अन्त्य, जर्मनीइ जूगु सुधारं प्रोटेस्टान्ट धर्मया जन्म व मालेज्याया युगया शुरुवात व थुकिया नापं युरोपया न्हापांगु उपनिवेशया शुरुवात नं ला। थुकिया अन्त्य प्रायः फ्रान्सेली क्रान्तिं जुइ, व गबलें गबलें अमेरिकी क्रान्ति वा नेपोलियनया शासन नापं जुइ, न्हुगु साम्राज्यवादया निगुगु लहर आधुनिक उपनिवेशया आगमन नापं जुइ।

लिपांगु दशकया इतिहासकारतेगु तर्क कथं हलिंन्यंकया दृष्टिकोणं, प्रारम्भिक आधुनिक कालया दकलय् महत्त्वपूर्ण विशेषता थुकिया न्यनाच्वंगु विश्वव्यापीकरणया चरित्र ख। थ्व ईलय् न्हुगु अर्थतन्त्र व संस्थात पिहांवल, थ्व ईया क्रमय् अप्व परिष्कृत व विश्वव्यापी रुपं अभिव्यक्त जुल। प्रारम्भिक आधुनिक कालय् आर्थिक सिद्धान्तया रुपय् व्यापारिकतावादया प्रभुत्वया उदय नं दुथ्याः। थ्व ईया मेमेगु उल्लेखनीय प्रवृत्तिइ प्रयोगात्मक विज्ञानया विकास, अप्वयाच्वंगु तीव्र प्राविधिक प्रगति, धर्मनिरपेक्ष नागरिक राजनीति, मानकिपा व जहाज डिजाइनय् सुधारया कारणं तीव्र यात्रा, व राष्ट्र राज्यया उदय ला।