न्हसिभु

A satellite view of the Hawaiian islands, with the top of the image being North. There are few clouds, and most of the image is the seawater swirling in the wind, surrounding the islands. — हवाइयन न्हसिभु प्रशान्त महासागरया छगू मू न्हसिभु पुचः ख

न्हसिभु ^[१] (Island) धइगु छचाखेरं लः (खुसि, पुखू वा समुद्र) दूगु बँ खः। न्हसिभुया आकार खुसिइ दूगु चिधंगु बँ निसें कयाः तःधंगु महाद्वीप (दसु: अस्ट्रेलिया) तक जुइफु।

न्हसिभुया ताजि

भूगर्भ विज्ञानकथं न्हसिभुय्तय्यात मू रूपं स्वंगू पुचलय् बाये फइ:

महाद्वीपीय न्हसिभु (Continental Islands): थ्व न्हसिभु महाद्वीप नाप हे स्वानाच्वंगु दइ, तर समुद्री सतह थहां वइबलय् वा जमिनया छुं भाग क्वबानाः मूल भूभाग पाखें अलग जुइ।
समुद्रिक न्हसिभु (Oceanic Islands): थ्व न्हसिभु समुद्रया क्वय् दूगु ज्वालामुखी मुयाः दयेकी। थ्व महाद्वीप नाप स्वानाच्वनि मखु।
खुसि व पुखूया न्हसिभु (River/Lake Islands): खुसिया बाहालं फियाःगु चा व ध्याचः (Sedimentation) छगू थायय् मुनाः वा खुसि निगू भागय् बायाः वइबलय् दथुइ न्हसिभु दयेकी।

पारिस्थितिक महत्त्व

न्हसिभुया भौगोलिक पृथकता (Isolation) या कारणं अन थीथी आजूचाःगु विशेष प्रजातिया जीवजन्तु व वनस्पति खनेदु। यक्व न्हसिभुत 'जैविक विविधता' (Biodiversity) या हटस्पटया कथं कायेगु या। दसु हवाई गन कोलिया थें न्याःगु झंगः अलास्कां चिकुलाय् च्वं वइ।

आर्थिक व सामाजिक पक्ष

पर्यटन: बांलाःगु तटीय क्षेत्र व शान्त वातावरणया कारणं न्हसिभुत पर्यटनया मू केन्द्र जुइ।
संसाधन: समुद्री न्हसिभुत न्या लाकाः जीविकोपार्जन यायेत व समुद्री खनिज लिकायेगु खानीज्या या निंतिं महत्वपूर्ण जुइ।
यातायात: रणनीतिक रूपं तःधंगु न्हसिभुत समुद्री व्यापार व वाणिज्य या निंतिं 'ट्रान्जिट पोइन्ट' कथं छ्यली।

जलवायु परिवर्तनया खतरा

आधुनिक ईलय् 'ग्लोबल वार्मिङ' या कारणं च्वापुगुँ (Glacier) नायाः समुद्री सतह थहां वयाच्वंगु दु। थुकिं यानाः हलिंया यक्व चिधंगु न्हसिभुत बिस्तारं लः क्वय् क्वबाना वनेगु खतरा दु।