नर्मन विजय
नर्मन विजय ११गु शताब्दीइ द्वलंद्वः नर्मन, फ्रान्सेली, फ्लेमिश व ब्रेटन सैनिकतेगु सेनां इंग्ल्याण्डया आक्रमण व कब्जा ख। थ्व सकलें कब्जा ड्यूक अफ नर्मन्डीया नेतृत्वय् जूगु ख। विजय धुंका वय्कःयात लिपा विलियम द कन्क्वेररया नामं म्हसीकल।
विलियमया अंग्रेजी सिंहासनया दाबी मचा मदुम्ह एंग्लो-स्याक्सन जुजु एडवर्ड द कन्फेसर नापया पारिवारिक स्वापूं वःगु ख, गुम्हेस्यां विलियमया सिंहासनया इच्छायात प्रोत्साहित याःगु जुइफु। एडवर्ड १०६६ जनवरीइ मन्त व वयागु उत्तराधिकारी वया किजा हेरोल्ड गोडविन्सन जुल । नर्वेया जुजु हेराल्ड हार्द्रादां सन् १०६६या सेप्टेम्बरय् उत्तरी इंग्ल्याण्डय् आक्रमण यात व २० सेप्टेम्बरय् जूगु फुलफोर्ड युद्धय् विजयी जुल तर गोडविन्सनया सेनां २५ सेप्टेम्बरय् स्ट्यामफोर्ड ब्रिजया युद्धय् हार्द्रादायात बुकाः वयात स्यानाबिल। स्वन्हु लिपा २८ सेप्टेम्बरय् विलियमया द्वलंद्वः मनूत व सलंसः जहाजया आक्रमणकारी सेना दक्षिणी इंग्ल्याण्डया ससेक्सया पेभेन्सीइ अवतरण जुल। हेरोल्डं वयागु विरोध यायेत दक्षिणपाखे वन। थ्व झ्वलय् वयागु सेनाया छगू महत्वपूर्ण भाग उत्तरय् त्वःताः वन। हेरोल्डया सेनां १४ अक्टोबरय् हेस्टिङया युद्धय् विलियमया आक्रमणकारीतेगु सामना यात। विलियमया सेनां रणभूमिइ हेरोल्डयात बुकल व स्यात, थ्व नापं विलियम जुजु जुल।
विलियमया मू प्रतिद्वन्द्वीत मदुसां वय्कलं लिपाया दँय् नं विद्रोहया सामना यायेमाल व १०७२ लिपा तक्क अंग्रेजी गद्दीइ सुरक्षित मजुल। प्रतिरोध याइपिं अंग्रेज अभिजात वर्गया बुँ जफत यात; व छुं अभिजात वर्ग निर्वासनय् बिस्युं वन। थःगु न्हुगु राज्ययात नियन्त्रण यायेत विलियमं थः अनुयायीतेत भूमि प्रदान यात व भूमि न्यंकं सैन्य बल्लाःगु थासय् कमाण्ड याइगु क्वाः दयेकल। द दूम्सदे बुक, इंग्ल्याण्डया यक्व भाग व वेल्सया छुं भागया "महान सर्वेक्षण"या छगू हस्तलिखित अभिलेख, १०८६ तक्क पूवन। विजयया मेमेगु प्रभावय् लाय्कू व सरकार, अभिजात वर्गया भाय् कथं फ्रान्सेली भाय् या छगू भाषिकाया प्रवेश व उच्च वर्गया संरचनाय् हिउपाः ला। विलियमं जुजुपाखें प्रत्यक्ष रुपं कब्जा यायेगु भूमियात फिअफमेन्त प्रथाय् यंकल। अप्व क्रमिक हिउपां कृषि वर्ग व गांया जीवनयात प्रभावित यात: मू हिउपा दासताया औपचारिक उन्मूलन खनेदु, गुकि आक्रमणनाप प्रत्यक्ष स्वापू दूगु सम्भावना दु। न्हुगु नर्मन प्रशासकतेसं एंग्लो-स्याक्सन सरकारया यक्व सत्ता थःगु ल्हातय् काल व सरकारया संरचनाय् यक्व हिउपा मवः।