तकती अजिमा

तकती अजिमा छम्ह अजिमा ख। वसपोलयात नीलबाराहीया नामं नं म्हसीकिगु या। येँ देसय् खड्गाकार कथं देय्या सीमाय् पलिस्था यानातम्ह च्याम्ह अजिमा(अष्टमातृका)या पीठय् छगू पीठ वसपोलया नं दु। वसपोलया पीठ थौंया कालिमाति नापं ला।

जात्रा

तकती अजिमाया जात्रा पाहाँचःह्रे बहनीइ न्ह्यथनि। थ्व जात्राय् तकती अजिमा नापं अलुमरी(लुमढी) अजिमा (भद्रकाली), कङ्गः अजिमा (चामुन्दा,चन्देश्वरी, कंकेश्वरी), म्हयपि अजिमा (ज्ञानेश्वरी), मय्‌ति अजिमा(पञ्चकुमारी, मैतिदेवी), बसला अजिमा (बसलादेवी), व ङ्यतमरुअजिमा (श्वेतकाली, नरदेवी)या जात्रा जुइ। थ्व खः जात्रा जुजु अमर मल्लया ईलय् नेपाल सम्बत ५८० (सन् १४६०)स शुरु जूगु ख। थ्व खः याः न्हापा छिपा (रञ्जितकार)तेसं संकिजु जुसां लिपा वना ज्यापुतेसं संकिगु जुल। ज्यापुतेसं मजिपाः लाखेया याः छिपातेत लःल्हाःगु व छिपातेसं ज्यापुतेत तकती अजिमाया याः लःल्हागु किम्बदन्ति दु। थथे हिलाः जुसां थ्व जात्राय् चिराग ज्वनिगु ज्या रञ्जितकारतेसं याइगु या।

लहना बुखँपौस त्रिरत्न महर्जनया च्वसु कथं थ्व जात्रा थथे हनि:

• पाहाँचःह्रे बहनीइ क्वहितिइ द्यः छेँय् द्यः खतय् तयाः भिंद्यःत्वाः, चिकंमुगः, मजिपाः, न्हूघः, क्वहिति जुयाः विष्णुमति खुसि छिकाः तकती गमय् तय् यंकी। गमय् तय् धुंकाः उखुनु चान्हय् होम पुजा याइ।
• चिल्लागा आमै न्हिच्छि गमय् जुइ व बहनिया इलय् गमं थनाः जात्रा न्ह्यथनि। जात्रा तकती, कालिमातिं सोल्टी दुवाततक यंकाः, लित हयाः टंकेश्वर, ताहाचल चाःहिका हयाः विष्णुमति खुसि पुलाः क्वहिति यंकाः

क्वहिती पुज्याना दिकी।

• मेन्हु कन्हय् सुथय् क्वःने लागाय् क्वहिति त्वाःया म्ह्याय् मचा बियाछ्वया तःथाय् यंकाः पुजा/जात्रा याइ। जात्राया

लँपु क्वहितिं सुरु जुयाः ज्याःबहाः,लगं, खिं खः, गणबहाः, लगं, नाय्पाचो, फसिगां, तःननि, यंकाः, ओमबहाः, खिचापुखूतक वनाः अनं लिहाँ वयाः जोरगणेद्यः, चिकंमुगः, मजिपाः-मञ्जुश्री, न्हूघः देगः जुयाः क्वहितिइ क्वचाइ।

• थ्व खुनु न्हिने थःहने याः न्ह्याकी । थहने याः जात्राया लँपु क्वहिति जुयाः भिंद्यःत्वाः, मरुसतः, मरुहिति, दोखाद्वः, दमाइत्वाः,पाछाइ गल्ली, नेतपाःचो, न्यत, किलाघः, त्यंगः, क्षेत्रपाटी, थँहिति, ज्याथा, नाय्त्वाः, त्यःर, असं, वंघः, मखं, मरुत्वाः, अट्कोनारायण, चिकंमुगः, मजिपाः जुयाः क्वहिति द्यःछेँय् द्यः दुकयाः जात्रा क्वचाय्की।