जीवनया इतिहास
जीवनया इतिहास (History of Life) पृथ्वीइ जीवतय्गु उत्पत्ति निसें थौंकन्हय् तकया विकासक्रमया अध्ययन खः। पृथ्वीया उत्पत्ति करिब ४.५ अर्ब दँ न्ह्यः जूगु खः, व उकिया १ अर्ब दँ दुने हे जीवनया न्हापांगु चिं खनेदत। जीवनया विकासक्रमयात "भौगर्भिक समय मान" (Geological Time Scale) कथं थीथी इओन (Eon), इरा (Era), व कालखण्ड (Period) य् बायातःगु दु।[१]
जीवनया उत्पत्ति
[सम्पादन]जीवन गुकथं सुरु जुल धइगु विषयस वैज्ञानिकतय्गु दथुइ थीथी सिद्धान्त दु। दकलय् स्वीकार यानातःगु सिद्धान्त "एबायोजेनेसिस" (Abiogenesis) खः, गुकिया कथं निर्जीव रसायन (non-living matter) पाखें प्राकृतिक प्रक्रियाया माध्यमं जीवनया उत्पत्ति जुल।
प्रारम्भिक पृथ्वी: ४ अर्ब दँ न्ह्यःया पृथ्वी तसकं क्वाःगु खः व वायुमण्डलय् अक्सिजन मदु। ज्वालामुखीया विष्फोटं पिहाँ वःगु ग्यास व लःया वाफं महासागर दयेकल।
आर.एन.ए. हलिम (RNA World): वैज्ञानिकतय्गु विश्वास दु कि न्हापां आर.एन.ए. (RNA) अणुया विकास जुल, गुकिलिं थःगु प्रतिलिपि (replication) दयेके फत।[२]
प्रोक्यारियोटिक युग (Prokaryotic Era)
[सम्पादन]३.५ अर्ब – २ अर्ब दँ न्ह्यः जीवनया दकलय् न्हापांगु रुप "प्रोक्यारियोट" (Prokaryotes) खः। थुपिं सरल, छगू-कोषीय (single-celled) जीव खः, गन "न्युक्लियस" दइ मखु।
साइनोब्याक्टेरिया (Cyanobacteria): करिब ३.५ अर्ब दँ न्ह्यः दतः, "साइनोब्याक्टेरिया" वा "वाउँ-वचु" न्हा [३] (blue-green algae) विकास जुल। थुपिं जीवतय्सं सूर्यया जः छ्यलाः "जः-संश्लेषण" (photosynthesis) प्रक्रिया सुरु यात।
महान अक्सिजन घटना (Great Oxygenation Event): साइनोब्याक्टेरिया अक्सिजन उत्पादन यात, गुकिलिं पृथ्वीया वायुमण्डलयात हिलाबिल। थुकिलिं लिपा जटिल जीवनया निंतिं लँपु चायेकल।[४]
युक्यारियोटिक व बहुकोषीय जीवन (Eukaryotic and Multicellular Life)
[सम्पादन]२ अर्ब – ५४ कोटी दँ न्ह्यः युक्यारियोट (Eukaryotes) जीवया विकास जुल। २ अर्ब दँ ति न्ह्यः, जटिल कोष दुपिं जीवत दयावल, गुमिगु दुने न्युक्लियस व "माइटोकोन्ड्रिया" दयावल। "एन्डोसिम्बायोसिस" (Endosymbiosis) सिद्धान्त कथं, छगू तःधंगु कोषं मेगु चिधंगु ब्याक्टेरियायात नयेबलय् माइटोकोन्ड्रियाया विकास जूगु खः।
बहुकोषीय जीवन: १ अर्ब दँ न्ह्यः, छगू स्वया अप्वः कोष दुपिं (multicellular) जीवत विकास जुल।
प्यालियोजोइक इरा (Paleozoic Era)
[सम्पादन]५४ कोटी– २५ कोटी ति दँ न्ह्यःया थ्व युगयात "प्राचीन जीवन" या युग धाइ।
१. क्याम्ब्रियन विष्फोट (Cambrian Explosion)
[सम्पादन]५४ कोटी दँ न्ह्यः, पृथ्वीइ जीवनया विविधता तसकं अप्वया वन। थ्व घटनायात "क्याम्ब्रियन विष्फोट" धाइ। थ्व इलय् अप्वः धैया "इन्भर्टिब्रेट" (invertebrates - दुगःक्वँय् मदुपिं) पशुत विकास जुल, दसु: ट्रिलोबाइट (Trilobites)।[५]
२. दुगःक्वँय् दुपिं व बँय् जीवन
[सम्पादन]न्या (Fish): ओर्डोभिसियन (Ordovician) व सिलुरियन (Silurian) कालखण्डय् न्हापांगु दुगःक्वँय् दुपिं (vertebrates) प्राणी, अर्थात् न्या, विकास जुल।
बँय् जीवन: सुरुइ मा (plants) व की (insects) बँय् वल। डेभोनियन (Devonian) कालखण्डय्, न्या थें न्याःपिं प्राणीत बँय् वयेगु ज्या न्ह्यथन, गुकिलिं "एम्फिबियन" (Amphibians) या विकास जुल।
३. पर्मियन लोप (Permian Extinction)
[सम्पादन]प्यालियोजोइक इराया अन्त्य "पर्मियन-ट्रियासिक लोप" (Permian-Triassic extinction) घटना पाखें जुल। थ्व इलय् पृथ्वीया ९६% समुद्री प्रजाति व ७०% स्थलीय प्रजाति लोप जुल। थ्व पृथ्वीया इतिहासया दकलय् तःधंगु विनाश खः।[६]
मेसोजोइक इरा (Mesozoic Era)
[सम्पादन]२५ कोटी – ६.६ कोटी दँ न्ह्यःया थ्व युगयात "रेप्टाइलया युग" (Age of Reptiles) धाइ। थ्व युगयात स्वंगू ब्वय् बायातःगु दु: ट्रियासिक, जुरासिक, व क्रेटासियस।
डाइनोसरया उदय: थ्व ईलय् डाइनोसर (Dinosaurs) पृथ्वीया प्रमुख प्राणी जुल। इपिं तःधंगु शाकाहारी निसें मांसाहारी तक थीथी कथंया खः।
झंगः (Birds): जुरासिक कालखण्डय्, डाइनोसर (थेरोपोड) पाखें न्हापांगु झंगः विकास जुल। आर्कियोप्टेरिक्स (Archaeopteryx) थुकिया नांजाःगु दसु खः।
दुरुप्वः दुपिं (Mammals): न्हापांगु दुरुप्वः दुपिं प्राणीत थ्व हे ईलय् दयावल, तर इपिं तसकं चिचीधं खः।
के-पीजी लोप (K-Pg Extinction): ६.६ करोड दँ न्ह्यः, छगू तःधंगु उल्कापिण्ड (asteroid) मेक्सिकोया युकाटनय् कुतुवल। थुकिलिं यानाः डाइनोसर (झंगः त्वताः) व मेमेगु ७५% प्रजाति लोप जुल।[७]
सेनोजोइक इरा (Cenozoic Era)
[सम्पादन]६.६ कोटी दँ न्ह्यः निसें वर्तमान तकया थ्व इरा/युगय् डाइनोसर लोप जुइधुंकाः, "दुरुप्वः दुपिं" (Mammals) या युग सुरु जुल।
दुरुप्वः दुपिंया विस्तार: खाली जूगु पृथ्वीया वातावरणय् दुरुप्वः दुपिं प्राणीतय्सं थःगु प्रभुत्व दयेकल। ह्वेल, धुँ, व सा थें न्याःपिं प्राणीत विकास जुल।
मनू विकास: ६०-७० लख ति दँ न्ह्यः, अफ्रिकाय् न्हापांगु होमिनिड (Hominid) विकास जुल।
अस्ट्रेलोपिथेकस (४० लख ति दँ न्ह्यः)
होमो इरेक्टस (२० लख ति दँ न्ह्यः)
आधुनिक मनू (Homo sapiens) (करिब ३ लख ति दँ न्ह्यः)।
निष्कर्ष
[सम्पादन]जीवनया इतिहास छगू निरन्तर जुयाच्वंगु प्रक्रिया खः। सरल ब्याक्टेरिया निसें जटिल मानव तकया यात्रा अरबौं दँया विकासक्रम (Evolution) व अनुकूलन (Adaptation) या लिच्वः खः।
लिधंसा
[सम्पादन]- ↑ Campbell, N.A.; Reece, J.B. (2005). Biology. Benjamin Cummings.
- ↑ Gilbert, W. (1986). "The RNA World". Nature.
- ↑ तुलाधर, कमल रत्न (१९९६). English–Nepalbhasa Wordbook (𑐀𑑄𑐐𑑂𑐬𑐾𑐖𑐷-𑐣𑐾𑐥𑐵𑐮𑐨𑐵𑐲𑐵 𑐏𑑃𑐐𑑂𑐰𑑅 𑐳𑐦𑐹), with रमेश काजी स्थापित; रुक्मिणी श्रेष्ठ; ओम चरण अमात्य, न्हापां (in en,new), येँ, नेपाः: भुलुखा पिथना.
- ↑ Holland, H.D. (2006). "The oxygenation of the atmosphere and oceans". Philosophical Transactions of the Royal Society.
- ↑ Gould, S.J. (1989). Wonderful Life: The Burgess Shale and the Nature of History. W.W. Norton.
- ↑ Benton, M.J. (2005). When Life Nearly Died: The Greatest Mass Extinction of All Time. Thames & Hudson.
- ↑ Alvarez, L.W., et al. (1980). "Extraterrestrial cause for the Cretaceous-Tertiary extinction". Science.