जन एदम्स

जन एदम्स बाय् जन एडम्स (अक्टोबर ३०, १७३५ – जुलाई ४, १८२६) छम्ह अमेरिकी राजनेता, वकिल, व च्वमि ख गुम्हेस्यां संयुक्त राज्य अमेरिकाया निम्हम्ह राष्ट्रपतिया रुपय् १७९७ निसें १८०१ तक्क ज्या यानादिल। राष्ट्रपति जुइन्ह्यः वय्कः राष्ट्रपति जर्ज वाशिङ्तनया उपराष्ट्रपतिया कथं १७८९ निसें १७९७तक ज्या यानादिल। वय्कः संयुक्त राज्य अमेरिकाया पलिस्थामि अबुपिंया धलखय् दुथ्यानातम्ह छम्ह मनू ख।

एदम्स अमेरिकन क्रान्तिकारी युद्धया नेता ख गुकिलिं संयुक्त राज्य अमेरिकायात ग्रेट ब्रिटेन स्वया स्वतन्त्रता प्राप्त यात। युद्धया इलय् वय्कलं युरोपय् छम्ह वरिष्ठ कूटनीतिज्ञया रुपय् अमेरिकी सरकारया सेवा यानादिल ।

प्रारम्भिक जीवन

एडम्सया जन्म म्यासाचुसेट्सया ब्रेनट्रीइ जूगु खः । वय्कः लिउतिनेन्त कर्नल जन एडम्स, सिनियर (१६९१-१७६१), व सुजाना बोयलस्टन (१७०८-१७९७)या काय् या कथं जूगु ख व वय्कः दार्शनिक व सहकर्मी संयुक्त राज्य अमेरिकाया पलिस्थामि स्यामुअल एडम्सया कजन ख।

जन एदम्स हार्वर्ड कलेजय् ब्वनादिल । वय्कलं १७६४ स एबिगेल एडम्सलिसे इहिपा यानादिल।

अमेरिकी क्रान्तिकारी हःताः

एडम्सं ग्रेट ब्रिटेनं झिन्स्वंगु उपनिवेशयात मुक्त यायेगु इच्छा यानादिल । अथे जुसां, वय्कलं निष्पक्ष रुपं सकसितं न्यायोचित ब्यवहार यायेमाः धकाः बिचाः तयादिल। बोस्टनय् बेलायती सैनिकत दूगु खँ वय्कःयात मयःसां बोस्टन नरसंहारय् संलग्न बेलायती सैनिकतय्गु पक्षं वकालत यानादिम्ह अधिवक्ता वय्कः हे खः।

एडम्स निक्वःगु महाद्वीपीय कांग्रेसया इलय् म्यासाचुसेट्सया प्रतिनिधि यानादिल। वय्कलं थोमस जेफरसनयात स्वतन्त्रताया घोषणापत्र च्वयेत ग्वाहालि यानादिल । अमेरिकी क्रान्तिकारी युद्धया इलय् एडम्सं ग्रेट ब्रिटेनलिसे शान्ति यायेत ग्वाहालि यानादिल। वय्कलं फ्रान्स, नेदरल्यान्द, व ग्रेट ब्रिटेनय् सन् १७८०या दशकय् राजदूतया रुपय् ज्या यानादिल।

उप-राष्ट्रपति

एडम्स राष्ट्रपति जर्ज वाशिंगटनया कार्यकालय् न्हापांम्ह उपराष्ट्रपति जुयादिल। वाशिंगटनं हाकनं चुनावय् ब्वति मकायेगु ल्ययेधुंकाः सन् १७९६ या चुनावय् एडम्सं त्याकूगु खः ।

एडम्स वाशिंगटनयात समर्थन याःगु छगू राजनीतिक दल फेदेरलिस्त पार्टीइ दुथ्याःम्ह न्हापांम्ह राष्ट्रपति जूगु अनुमान दु, तर वाशिंगटन थें वय्कलं नं थःत छुं विशेष पार्टीइ आबद्ध मजुसें पार्टी स्वया च्वय् च्वनादिल। एडम्सं निर्वाचनय् डेमोक्र्याटिक रिपब्लिकन पार्टीया दुजः जेफरसनयात बुकूगु खः।

उबलय्या राष्ट्रपति व उपराष्ट्रपतिया उम्मेदवारत थौं थें छगु हे पदया चुनावय् ब्वति मकाःगु चलन दयाच्वन। जेफरसनं निगूगु दकलय् अप्वः मत कायेफःगुलिं वय्कः उपराष्ट्रपति जुयादीगु खः।

राष्ट्रपति

थःगु कार्यकालय् एडम्सं फ्रान्स विरुद्धया द्वन्द्वयात शान्तिपूर्ण रुपं समाधान यानादिल। वय्कलं एलियन एन्द सेदिसन एक्त नं पारित यानादिल, गुकिलिं सरकारया बारे बांमलाःगु खँ ल्हायेगु ज्यायात गैरकानूनी दयेकल। यक्व मनूतय्त उगु ज्या मयकल, व इमिसं थ्व कानुनं इमिगु खँल्हायेगु स्वतन्त्रता चीकूगु तायेकल। सन् १८०० य् राष्ट्रपतिया निंतिं पुनःनिर्वाचनय् एडम्स जेफरसनलिसे बूगु खःसा एडम्स निर्वाचित जूगु इलय् स्वयां फेदेरलिस्त पार्टी म्हो जक लोकंह्वाःगु खः।

राष्ट्रपतिया रुपय् एडम्सया लिपांगु ज्या मध्ये छगू जन मार्शलयात संयुक्त राज्य अमेरिकाया प्रधानन्यायाधीश दयेकेगु खः । उकिं फेदेरलिस्त पार्टीयात महत्वपूर्ण भूमिकाय् थ्यंकल।

न्हापांया न्याम्ह अमेरिकी राष्ट्रपतित मध्ये एडम्स छम्ह जक खः गुम्हेस्यां गुबलें नं थःगु अधीनय् दास मतः। न्हापायाम्ह न्याम्हया दथुइ वय्कः न्यू इंग्ल्याण्डयाम्ह छम्ह जक राष्ट्रपति खः।