गुह्येश्वरी देगः

गुह्येश्वरी देगः नेपाःया येँ जिल्लाया ग्वलय् च्वंगु छगु शक्तिपीठ व हिन्दू देगः खः। थ्व देगः शाक्त पिठ खःसा थ्व पशुपति क्षेत्रं थ्यं-मथ्यं १ किलोमिटर पूर्वय् बागमती खुसिया दक्षिणी तटय् लाः। विशेष यानाः तान्त्रिक उपासकपिनिगु निंतिं थ्व छगू महत्वपूर्ण तीर्थस्थल खः । थ्व देगःया जीर्णोद्धार जुजु प्रताप मल्लं १७ औं शताब्दीइ यानादिल।

देवी भागवत पुराणय् आदिशक्तिया पवित्र स्थलया धलंखय् थ्व देगःया उल्लेख यानातःगु दु व नेपाःया द्यःयात गुह्यकाली धकाः म्हसीकातःगु दु ।

थ्व देगःया नां संस्कृतया गुह्य (गोप्य वा गुप्त) व ईश्वरी (देवी) खँग्वः स्वानाः दयावःगु ख। हिन्दू बाखँ कथं गुह्येश्वरी देगलय् सतीया मलाशय कुतुं वःगु थाय्या चिं कथं म्हसीकातःगु दु ।

गुह्येश्वरी देगःया मू ध्वाखा

गुह्येश्वरी देगलय् न्हिथंया पूजा (नित्यपूजा) कर्माचार्य आचाजु तयेसं सर्वम्नाय तन्त्र कथं याइ। विशेष अवसरय् व मू समारोहया इलय् राजोपाध्याय ब्राह्मण, गुपिं वैदिक व कौल पुजारी निगुलिं जुइ, वैदिक पूजा याइ, धाःसा आचाजु तयेसं तन्त्र कथं पुजा याई ।

बाखं

गुह्येश्वरी देगःया तोलं

मेरुतन्त्र व स्कन्दपुराणया हिमवतखण्ड कथं सतीया मलाशय कुतुं वःगु थाय् गुह्येश्वरी देगः खः । थ्व हे विवरण देवमाला वंशावली, भाषा वंशावली व स्वस्थानी बाखनय् नं खनेदु।

थ्व ग्रन्थय् थ्व देगःयात सतीया गुह्य वा गुद कुतुं वःगु थाय् धकाः उल्लेख यानातःगु दु, अले द्यःयात गुह्यकाली, गुह्येशी, गुह्येश्वरी, गुह्यकेश्वरी, गुह्यकालिका थेंज्याःगु थीथी नां बियाः म्हसीकातःगु दु। गुह्येश्वरीयात मन्थनभैरव तन्त्रय् पशुपतिया कलाया रुपय् उल्लेख यानातःगु दु।

वाराही तन्त्रय्, सतीया म्हया गुगु ब्व कुतुवन धइगु खँया उल्लेख मया। थुकि नेपालया गुह्यमण्डलय् मेमेगु थाय् स्वया १ कोटि गुणां यक्व पुण्य लाइगु धका उल्लेख यानातगु दु व गुह्येश्वरी स्वया तःधंगु शक्तिपीठ गननं मदु धकाः न्ह्यथनातःगु दु।

गुह्येश्वरी देगःयात तन्त्र चुडामणिपाखें पीठनिर्णयय् उल्लेख यानातःगु शक्तिपीठलिसे म्हमसीके मज्यू, गन सतीया निपां पुलि नेपालय् कुतुं वंगु व पीठया द्यः महामाया खः धकाः धयातःगु दु । नेपाल महात्म्य ११।१०७ व १।३८ कथं सतीया निगु पुलि विष्णुमति व बागमति खुसिया संगम लिक्क लाः व थ्व पीठया द्यः महामाया खः, धाःसा गुह्यांग बागमति खुसिया लिक्क, पशुपति देगःया मृगस्थली नापसं लाः व थनया द्यः गुह्येश्वरी वा गुह्यकाली धका धयातगु दु।

त्रिपुरा रहस्यया माहात्म्य खण्डय् देवी ललिता सदां च्वनीगु १२ गू थाय् न्ह्यथनातःगु दुसा नेपालय् वय्कयागु रुपयात गुह्यकेश्वरी धकाः उल्लेख यानातःगु दु (त्रिपुर रहस्य १।४८।७४ : नेपाले गुह्यकेश्वरी) । ललिता सहस्रनामय् देवीया ७०७गु नां "गुह्यरूपिणी" (ललिता सहस्रनाम १३७गु श्लोक: सरस्वती शास्त्रमयी, गुहांबा गुह्यरूपिणी) धकाः उल्लेख यानातःगु दु। ५१ शक्तिपीठ नं संस्कृत वर्णमालाया ५१ आखः प्रतिनिधि या, गुकि गुह्येश्वरी "इ" आखःया प्रतिनिधित्व याइ । थ्व देगःयात तान्त्रिक अभ्यास यक्व माने व पूज्य या। मोहनी नखः व जात्राया इलय् देगलय् तसकं मनूतेगु हुल जुइ।