क्लाउदियो मोन्तेभर्दि

क्लाउदियो जोभानी एन्तोनियो मोन्तेभर्दि ( मे१५, १५६७ - नोभेम्बर २९, १६४) खः इटालियन संगीतकार, कोइरमास्तर, व तारबाजं वाद्यक ख। वय्कलं सेकुलर व धार्मिक सङ्गीतया विधाय् थीथी म्ये दयेकादील व वय्कःयात ओपेरा विकासया छम्ह न्ह्यलुवाःया कथं म्हसीकिगु या। युरोपियन शास्त्रीय संगीतया पूनर्जागरण कालं बारोक कालय् हिउपा हःम्ह मू संगीतकारय् वय्कःया यक्व योगदान दु।

क्रेमोनाय् जन्म जूसें वय्कलं थःगु न्हापांगु संगीत अध्ययन व रचना जन्मस्थानं हे यानादिल। मोन्तेभर्दिं थःगु सांगीतिक लजगा मन्तुआ (क. १५९०-१६१३)या लाय्कूलि यानादिल। मन्तुआ मदयेधुंका वय्कः भेनिस गणतन्त्रय् सान मार्कोया बेसिलिकाय् मायस्त्रो दि कपेला (maestro di cappella)या पद कयादिल। वर्तमानय् ल्यंगु वय्कःया पौतेसं वय्कःया ईलय् इतालिइ लजगामि संगीतकारया म्वापूय् जः क्यनि, गुकिलि वय्कःया आर्थिक समस्या, लाय्कूलि संरक्षण, राजनीति आदिया खँ ब्वनेछिं।

मोन्तेभर्दिया आपालं च्वखँ मदयावने धुंकल, वय्कःया दबू-संगीत नं अथे हे मदयावने धुंकल। आया इलय् ल्यनाच्वंगु वय्कःया संगीतय् माद्रिगालया ९गू सफू, वृदह धार्मिक ज्या (दसु सन् १६१०या भेस्पो देला बियाता भर्जिन), व स्वपू पूर्ण ओपेरा ला। वय्कःया ओपेरा L'Orfeo (१६०७) ओपेरा विधाया वय्कःया दकलय् पुलांगु रचना खः गुकियात आःया ओपेराय् तक थाइगु या। वय्कःया जीवनया अन्तपाखे वय्कलं भेनिसया निंतिं च्वयादिल, गुकिलि निता कृति Il ritorno d"Ulisse in patria व l'incoronazione di Poppea ला।