इब्न सिना
इब्न सिना वा अबु अली हुसेन बिन अब्दुल्लाह बिन हसन बिन अली बिन सिना (بوعلی حسین بن عبدالله بن حسن بن علی بن سینا)(फारसी: ابن سینا, थ्यं-मथ्यं ९८० – २२ जुन १०३७) वा पश्चिम हलिमय् "एभिसिना"या नामं म्हसीम्ह मनू मुस्मां हलिंया छम्ह मू दार्शनिक व चिकित्सक ख। इस्लामया स्वर्ण युगया ई याम्ह वय्कलं थी-थी इरानी शासकतेगु लाय्कूलि सेवा यानादिल। वय्कःयात प्रायः प्रारम्भिक आधुनिक चिकित्साया अबुया रुपय् वर्णन यानातःगु दु। वय्कःया दर्शन एरिस्तोतलियनवादं वःगु पेरिपेटेटिक परम्पराया दुने ला।
वय्कःया दकलय् नांजाःगु सफू किताब अल शिफा (अरबी: کتاب الشفاء) वा लंकेगु सफू, छगू दार्शनिक व वैज्ञानिक हलिंसफू ख। नापं, वय्कःया सफू अल कानून फि तिब (अरबी:القانون في الطب) वा फारसी भासय् कानून दर तेब (قانون در طب) वा चिकित्साया नियम (कानून) छगू चिकित्साया हलिंसफू ख गुकियात यक्व मध्यकालीन युरोपेली विश्वविद्यालयय् छगू मानक चिकित्सा पाठया कथं ब्वंकातल। थ्व सफूयात १६५० तक्क पाश्चात्य चिकित्साया मू सफूया कथं छ्यलातःगु ख। दर्शन व चिकित्सायात त्वया वय्कलं थीथी विषयय् दसु खगोलशास्त्र, एल्केमी, भूगोल व भूगर्भशास्त्र, मनोविज्ञान, इस्लामिक धर्मशास्त्र, तर्क, गणित, भौतिक विज्ञान, काव्य आदिइ च्वसुत च्वयादीगु दु।
इब्न सिनां थःगु अप्व दार्शनिक व वैज्ञानिक कृति अरबी भासं च्वयादिल तर फारसी भाषाय् नं यक्व मू कृति च्वयादिल। वय्कःया काव्यात्मक कृति निगु हे भाषाय् दु। वय्कलं च्वयादिगु ४५०पु च्वखँय् करिब २४०पु च्वखँ आःया ईलय् म्वानाच्वंगु दु, गुकिलि १५०पु दर्शन व ४०पु चिकित्सा विषयया च्वखँ ख।